កំពង់ឆ្នាំងៈ ភ្លៀងលាយឡំខ្យល់កន្ត្រាក់ កាលពីល្ងាចថ្ងៃទី ៨ វិច្ឆិកា បានបង្កឱ្យកុមារីអាយុ ៥ ឆ្នាំម្នាក់ស្លាប់ និងបាក់រលំផ្ទះសរុបជិត ៧០ ខ្នង នៅឃុំផ្លូវទូក ស្រុកកំពង់លែង ខេត្តកំពង់ឆ្នាំង។ នេះបើតាមមន្ត្រីមូលដ្ឋាន។
លោក អ៊ុំ សំអុន នាយនគរបាលប៉ុស្តិ៍ផ្លូវទូកប្រាប់ ភ្នំពេញ ប៉ុស្តិ៍ នាថ្ងៃទី ៩ វិច្ឆិកា ថា កុមារីរងគ្រោះ ឈ្មោះ ហុន ណាវី ជាកូនទី២ នៃគ្រួសារកសិករក្រីក្រមួយនៅភូមិពាមខ្នង ឃុំផ្លូវទូក។ មុនពេលកើតមានគ្រោះធម្មជាតិភ្លៀងលាយឡំខ្យល់កន្ត្រាក់នោះ នាងបានស្នាក់នៅក្នុងផ្ទះជាមួយម្ដាយ និងបងប្អូនប្រុស ២ នាក់ទៀត ដែលមានអាយុ ៣ ឆ្នាំ និង ៧ ឆ្នាំ។
លោក សំអុន និយាយថា៖ «បើតាមសម្ដីស្ត្រីជាម្ដាយ ឈ្មោះ យ៉ត ឡៃអ៊ី អាយុ ២៦ ឆ្នាំ នៅពេលផ្ទះបាក់រលំធ្លាក់ចូលទៅក្នុងទឹកដោយសារភ្លៀង និងខ្យល់កន្ត្រាក់ ប្ដីរបស់គាត់មិនទាន់ត្រឡប់ពីធ្វើការនោះទេ។ ក្នុងខណៈនោះ គាត់បានព្យាយាម ស្រវាចាប់កូនស្រីគាត់ផងដែរ ប៉ុន្តែគាត់ម្នាក់ឯងមិនអាចជួយកូនៗរបស់គាត់ទាំង ៣ ក្នុងពេលតែ ១ បានឡើយ»។
លោកបន្តថា៖ «គាត់បានឱបកូនប្រុសពៅម្នាក់ហែលចេញពីក្នុងផ្ទះនោះ ហើយក្រុមសង្គ្រោះក៏បានមកដល់ជួយមុជទឹករាវរកកូនរបស់គាត់ ២ នាក់ទៀតនៅក្នុងផ្ទះដែលលិចនោះ។ តែជួយសង្គ្រោះបានតែកូនប្រុសច្បងរបស់គាត់ប៉ុណ្ណោះ ចំណែកកូនស្រីគាត់បានដាច់ខ្យល់ស្លាប់បាត់ទៅហើយ»។
បើតាមនាយប៉ុស្តិ៍រូបនេះ ក្រៅពីបង្កឱ្យស្លាប់កុមារីម្នាក់ គ្រោះធម្មជាតិភ្លៀង និងខ្យល់កន្ត្រាក់នេះបានបង្កឱ្យផ្ទះចំនួន ៦៩ ខ្នង និងទ្រព្យសម្បត្តិមួយចំនួនទៀតរបស់ប្រជាពលរដ្ឋក្នុងភូមិពាមខ្នង និងភូមិស្លតនៃឃុំផ្លូវទូក រងការខូចខាតយ៉ាងដំណំ ក្នុងនោះផ្ទះ ៥០ ខ្នងបានបាក់រលំ និងក្រឡាប់ផ្ងារជើងលិចចូលទៅក្នុងទឹក និង ១៩ ខ្នងទៀតបានប៉ើងរបើកដំបូល។
លោកបន្តថា ភូមិពាមខ្នង និងភូមិស្លត ស្ថិតនៅតំបន់ព្រៃរនាមលិចទឹកក្នុងរដូវវស្សា។ អ្នកភូមិភាគច្រើនសង់ផ្ទះបណ្ដែតទឹក ដោយប្រើធុងសាំងជាគ្រឿងកំណល់ទប់ទ្រផ្ទះកុំឱ្យលង់លិចនៅក្នុងរដូវវស្សា។
លោក ឈួន ប៊ុនឈឿន មេភូមិពាមខ្នងប្រាប់ថា នៅពេលមានករណីនោះកើតឡើង លោក និងប្រជាការពារភូមិមួយចំនួនបានជិះកាណូត ៣ គ្រឿងទៅជួយ។ ប៉ុន្តែពេលទៅដល់ក្រុមការងារជួយសង្គ្រោះបានជួយស្រង់កុមារាម្នាក់ រីឯកុមារីម្នាក់ទៀតបានស្លាប់ក្នុងផ្ទះដែលលិចចូលទៅក្នុងទឹកនោះបាត់ទៅហើយ។
លោក ប៊ុនឈឿន និយាយថា៖ «ពេលទៅដល់ ក្រុមការងារយើងឃើញស្ត្រីម្នាក់ប្រឹងត្រដរហែលទឹកដោយមានកូនតូចម្នាក់ឱបជាប់នឹងករបស់នាង។ បន្ទាប់មកក៏ឃើញកុមារាម្នាក់ទៀត ប្រឹងហែលចេញពីក្នុងទឹក ជាទីដែលផ្ទះរបស់គេបានលិចចូលទៅក្នុងទឹក។ ពួកយើងក៏បានជួយសង្គ្រោះពួកគេ។ បន្ទាប់មកស្ត្រីជាម្ដាយប្រាប់ថា មានកូនស្រីម្នាក់ទៀតនៅក្នុងផ្ទះនោះ ពួកយើងក៏នាំគ្នាចុះមុជទឹករាវរកកុមារីរងគ្រោះ។ ប៉ុន្តែទម្រាំយើងរាវរកនាងឃើញ នាងបានស្លាប់បាត់ទៅហើយ»។
នៅថ្ងៃទី ៩ វិច្ឆិកា លោក ចេង ចាន់បូណា អភិបាលស្ដីទីស្រុកកំពង់លែង បានដឹកនាំកម្លាំងបញ្ជាការឯកភាពស្រុកកំពង់លែង ចុះសួរសុខទុក្ខ និងនាំយកជំនួយទៅចែកជូនគ្រួសារជនរងគ្រោះ និង ឧបត្ថម្ភថវិកាមួយចំនួនដល់ឪពុកម្ដាយកុមារីរងគ្រោះ សម្រាប់រៀបចំពិធីបុណ្យសពតាមប្រពៃណី។
លោកអភិបាលស្ដីទីក៏បានប្រាប់ដែរថា ក្នុងស្ថានភាពដ៏លំបាកនេះ និងដើម្បីការពារគ្រោះថ្នាក់កើតឡើងជាយថាហេតុ រដ្ឋបាលស្រុកកំពង់លែងរៀបចំទីទួលសុវត្ថិភាព ១ កន្លែងនៅក្បែរវត្តឈើទាល សម្រាប់ឱ្យពលរដ្ឋរងគ្រោះ ស្នាក់នៅជាបណ្ដោះអាសន្នរហូតដល់ភូមិរបស់ពួកគេស្រកទឹកអស់។
លោកថ្លែងថា៖ «ក្រុមការងាររបស់យើងបានសម្រេចរៀបចំឱ្យពួកគាត់មកស្នាក់នៅទីទួលសុវត្ថិភាព ជាបណ្ដោះអាសន្ននៅក្បែរវត្តឈើទាល និងបានចាត់កងកម្លាំងប្រដាប់អាវុធទាំង ៣ ប្រភេទ រួមមានកម្លាំងនគរបាល យោធា និងកងរាជអាវុធហត្ថ ចុះជួយរុះរើ និងជួសជុលផ្ទះរបស់គ្រួសាររងគ្រោះទាំងនោះឡើងវិញ»។
បើតាមលោកអភិបាលស្រុកស្តីទីនៅថ្ងៃទី ៩ វិច្ឆិកា ក្រុមសមត្ថកិច្ចបានចុះជួយជួសជុលផ្ទះគ្រួសារពលរដ្ឋដែលរងការខូចខាតផ្នែកដំបូលជាមុន ដើម្បីឱ្យពួកគេបានស្នាក់នៅប្រកបដោយសុវត្ថិភាពឡើងវិញ។ បន្ទាប់មកនឹងបន្តជួយជួសជុលផ្ទះដែលបាក់ទ្រេតមួយចំហៀង ហើយបន្តបន្ទាប់ទៀត គឺផ្ទះដែលបាក់លិចចូលទៅក្នុងទឹក និងក្រឡាប់ផ្ងារជើងទៅក្នុងទឹក។
លោកថា នៅថ្ងៃទី ១០ វិច្ឆិកា រដ្ឋបាលស្រុកកំពង់លែង នឹងបន្តនាំយកអំណោយ ចែកជូនគ្រួសាររងគ្រោះនៅភូមិទាំង ២ នេះបន្ថែមទៀត ដើម្បីជួយសម្រួលការលំបាកក្នុងជីវភាពរស់នៅប្រចាំថ្ងៃ ៕