ភ្នំពេញៈ រថយន្តពិសោធន៍ចល័តផ្នែកម្ហូបអាហារចំនួន ៥ គ្រឿង ត្រូវបានប្រគល់ជូនបណ្តាសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាប ការក្លែងបន្លំ «ក.ប.ប» រាជធានី-ខេត្ត ខណៈពេញ ១ ខែតុលា ស្ថាប័ននេះបានរកឃើញ និងបង្ក្រាបទំនិញដែលមិនមានអនុលោមភាពជាង ៤ តោន និងជាង ២ ម៉ឺនលីត្រ។
នៅថ្ងៃទី ៨ វិច្ឆិកា ក្រសួងពាណិជ្ជកម្មបានរៀបចំពិធីប្រគល់រថយន្តពិសោធន៍ចល័តផ្នែកម្ហូបអាហារចំនួន ៥ គ្រឿង សម្រាប់ប្រើប្រាស់នៅតាមបណ្តារាជធានី-ខេត្ត ដោយមានការចូលរួមពីរដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ និងជាប្រធានគណៈកម្មាធិការជាតិការពារអ្នកប្រើប្រាស់។
ទំព័រហ្វេសប៊ុករបស់ ក.ប.ប បានឱ្យដឹងថា ការប្រគល់រថយន្តពិសោធន៍ចល័តផ្នែកម្ហូបអាហារ ដល់បណ្តារាជធានីខេត្តនាពេលនេះ គឺដើម្បីគាំទ្រដល់សកម្មភាពការងាររបស់បណ្តាសាខា ក.ប.ប ក្នុងការវាយតម្លៃអំពីអនុលោមភាព នៃផលិតផលម្ហូបអាហារឱ្យប្រព្រឹត្តទៅបានទាន់ពេលវេលាកាត់បន្ថយការចំណាយថវិកាក្នុងការចល័តរថយន្តពិសោធន៍ និងមន្ត្រីជំនាញពីរាជធានីភ្នំពេញ»។
ក្រសួងបញ្ជាក់ថា៖ «គោលបំណងសំខាន់គឺដើម្បីបង្ខិតទាំងបច្ចេកទេស និងសម្ភារឱ្យកាន់តែជិតគោលដៅប្រតិបត្តិការ សំដៅគាំទ្រដល់សកម្មភាពត្រួតពិនិត្យទំនិញដែលចរាចរនៅលើទីផ្សារ ពិសេសផ្សារនៅតាមបណ្តាតំបន់ដាច់ស្រយាល»។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប បានផ្តាំផ្ញើដល់មន្ត្រីតាមបណ្តាសាខា ត្រូវថែទាំ និងប្រើប្រាស់រថយន្ត និងឧបករណ៍វិភាគ ប្រកបដោយការទទួលខុសត្រូវមានប្រសិទ្ធភាព និងប្រសិទ្ធផល។ លោក ក៏បានផ្តាំផ្ញើដល់មន្ត្រីជំនាញវិភាគត្រូវខិតខំសិក្សាស្រាវជ្រាវរកវិធីសាស្ត្រថ្មីៗ ដើម្បីធានាដល់ការត្រួតពិនិត្យ និងវិភាគគុណភាពទំនិញពិសេសម្ហូបអាហារ សំដៅធានាការពារសុខុមាលភាពជូនប្រជាពលរដ្ឋ ដែលជាអ្នកប្រើប្រាស់។
លោករំពឹងថា៖ «រថយន្តទាំងនេះនឹងចូលរួមប្រតិបត្តិការគាំទ្រដល់សកម្មភាពពិនិត្យ ស្រាវជ្រាវ ករណីពុលអាហារដែលអាចកើតមានជាយថាហេតុ និងប្រតិបត្តិការគាំទ្រដល់ការអនុវត្តប្រកាសអន្តរក្រសួងរវាងក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្មលើការត្រួតពិនិត្យទំនិញនីហរ័ណ អាហរ័ណ និងបង្ក្រាបការក្លែងបន្លំ (កាំកុងត្រូល) ដែលបច្ចុប្បន្នជាអគ្គនាយកដ្ឋាន ក.ប.ប ដើម្បីសហការត្រួតពិនិត្យទំនិញនាំចេញ នាំចូលនៅតាមច្រកព្រំដែន»។
ជាមួយគ្នានេះបើតាមរបាយការណ៍របស់ ក.ប.ប ក្នុងខែតុលា ឆ្នាំ ២០២១ មន្ត្រីជំនាញអគ្គនាយកដ្ឋាន ក.ប.ប បានចុះប្រតិបត្តិការតាមបណ្តាគោលដៅត្រួតពិនិត្យ ដោយបានរកឃើញ និងបង្ក្រាបបានទំនិញជាច្រើនដែលមិនមានអនុលោមភាព។
របាយការណ៍ដដែលបានបញ្ជាក់ថា៖ «ដោយក្នុងនោះផលិតផលម្ហូបអាហារ និងភេសជ្ជ:ចំនួន ៤ តោន និង ២៩ គីឡូក្រាម។ អាល់កុលក្លែងក្លាយចំនួន ២១ ៣១០ លីត្រ និងត្រួតពិនិត្យស្ថានីយ និងដេប៉ូប្រេងឥន្ធន: ចំនួន ៤៧៨ ទីតាំង រកឃើញដេប៉ូចំនួន ១៩១ ធ្វើអាជីវកម្មមិនសុចរិត»។
សូមជម្រាបថា កាលពីថ្ងៃទី ៦ វិច្ឆិកាអគ្គនាយកដ្ឋាន ក.ប.ប ប្រចាំរាជធានីភ្នំពេញបាននាំយកផលិតផលក្លែងក្លាយ មានសារធាតុពុល និងទំនិញខូចគុណភាពសរុបជិត ៥០ តោនធ្វើការបំផ្លាញចោល បន្ទាប់ពីមន្ត្រីបង្ក្រាបបានក្នុងរយ:ពេលកន្លងមកក្នុងភូមិសាស្ត្ររាជធានីភ្នំពេញ។
ផលិតផលដែលបំផ្លាញចោលនេះគឺរួមមានផលិតផលអាល់កុលក្លែងក្លាយ ឬមេតាណុលចំនួន ៤៥ ៣៥៣ លីត្រ ស្រាស និងស្រាទំពាំងបាយជូរដែលរឹបអូសបានក្នុងករណីពុលស្រាបណ្តាលឱ្យស្លាប់មនុស្ស ៣ នាក់នៅភ្នំពេញ ចំនួន ៣៤៧ យួរ និង ៧៦ ប៊ីដុង ស្មើ ៤ ២៧៥ លីត្រ និងផលិតផលម្ហូបអាហារខូចគុណភាព ដែលរឹបអូសបានពីបណ្តាទីផ្សារ និងឃ្លាំងស្តុកទំនិញចំនួន ៣៥៨ គីឡូក្រាម៕