.jpg)
លោក លី ធុជ ក្នុងកិច្ចប្រជុំជាមួយតំណាង UNDP ថ្មី ប្រចាំនៅកម្ពុជា។ រូបថត គេហទំព័រ លី ធុជ
ភ្នំពេញៈ លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនបានស្នើតំណាង UNDP ថ្មី ប្រចាំនៅកម្ពុជាបន្តជួយកៀរគរធនធានបន្ថែមពីសហគមន៍ផ្តល់ជំនួយ និងដៃគូអភិវឌ្ឍន៍ ដើម្បីចូលរួមជាមួយរាជរដ្ឋាភិបាលកម្ពុជា ក្នុងការលើកកម្ពស់ជីវភាពរស់នៅរបស់ប្រជាពលរដ្ឋមូលដ្ឋាន តាមរយៈការចូលរួមបោសសម្អាតមីនមនុស្សធម៌នៅកម្ពុជា។
លោក លី ធុជ បានស្នើបែបនេះ ក្នុងពេលដែលអនុញ្ញាតឱ្យលោកស្រី Alissar CHAKER តំណាង UNDP (ថ្មី) ប្រចាំនៅកម្ពុជាចូលជួបសម្តែងការគួរសម និងពិភាក្សាការងារ ស្តីពីកិច្ចសហប្រតិបត្តិការ វិស័យសកម្មភាពមីននៅកម្ពុជានៅថ្ងៃទី១០ ខែវិច្ឆិកានេះ នៅទីស្នាក់ការអាជ្ញាធរមីន។
លោក លី ធុជ បានថ្លែងអំណរគុណ និងវាយតម្លៃខ្ពស់ចំពោះ UNDP ដែលបានចូលរួមគាំទ្រដល់ការងារអភិវឌ្ឍន៍នៅកម្ពុជាក្នុងនោះបានចូលរួមដល់ការងារសកម្មភាពមីនមនុស្សធម៌ ចាប់តាំងពីឆ្នាំ ២០០៦ តាមរយៈគម្រោងបោសសម្អាតមីនដើម្បីលទ្ធផល ដែលរហូតមកដល់ពេលនេះ គឺជាការអនុវត្តគម្រោងដំណាក់កាលទី៤។
លោថ្លែងថា៖ «ក្នុងនាមរាជរដ្ឋាភិបាលកម្ពុជា ខ្ញុំបានសំណូមពរឱ្យលោកស្រី Alissar CHAKER បន្តជួយកៀរគរធនធានបន្ថែមពីសហគមន៍ផ្តល់ជំនួយ និងដៃគូអភិវឌ្ឍន៍ ដើម្បីចូលរួមជាមួយរាជរដ្ឋាភិបាលកម្ពុជា ក្នុងការលើកកម្ពស់ជីវភាពរស់នៅរបស់ប្រជាពលរដ្ឋមូលដ្ឋាន ការជួយសង្គ្រោះជីវិតប្រជាជន និងផ្តល់ដីមានសុវត្ថិភាព តាមរយៈការចូលរួមបោសសម្អាតមីនមនុស្សធម៌នៅកម្ពុជា»។
លោកស្រី Alissar CHAKER លើកឡើងក្នុងជំនួបនេះថា UNDP សប្បាយរីករាយដែលបានចូលរួមធ្វើការជាមួយរាជរដ្ឋាភិបាលកម្ពុជា ព្រមទាំងបានតាំងចិត្តបន្តជួយគាំទ្រដល់រាជរដ្ឋាភិបាល ក្នុងការងារបោសសម្អាតមីនមនុស្សធម៌ឈានឆ្ពោះទៅរកការបញ្ចប់ការគំរាមកំហែងដោយសារមីន ឆ្នាំ ២០២៥ ខាងមុខនេះ។
បើតាមអាជ្ញាធរមីនចាប់ពីឆ្នាំ ២០០៦ ដល់ខែកញ្ញា ឆ្នាំ ២០២១ គម្រោងបោសសម្អាតមីនដើម្បីលទ្ធផលនេះ បានចូលរួមបោសសម្អាតផ្ទៃដីប្រមាណ ២៧៥ គីឡូម៉ែត្រក្រឡា សម្រាប់យកមកប្រើប្រាស់ដើម្បីបង្កបង្កើនផល និងសាងសង់លំនៅឋានដោយសហគមន៍ដែលរងផលប៉ះពាល់។
តាមរយៈគម្រោងបោសសម្អាតមីនដើម្បីលទ្ធផលនេះក៏បានរកឃើញ និងកម្ទេចគ្រាប់មីនប្រឆាំងមនុស្សចំនួន ៧១ ៨៤៩ គ្រាប់ មីនប្រឆាំងរថក្រោះចំនួន ១ ៥១៥ គ្រាប់សំណល់ជាតិផ្ទុះពីសង្គ្រាមចំនួន ២១៤ ៥៤២ និងបានផ្តល់អត្ថប្រយោជន៍ដល់ប្រជាជនជនបទចំនួន ១ ០៧៨ ០២២ នាក់ ដែលក្នុងនោះ ៥០ ភាគរយ គឺជាអ្នកទទួលផលជាស្ត្រី៕
