ភ្នំពេញៈ អយ្យការអមសាលាដំបូងរាជធានីភ្នំពេញ បន្តបើកការស៊ើបករណីម្ចាស់ហាង Mode Store ពាក់ព័ន្ធនឹងការលក់ផលិតផលក្លែងក្លាយ បន្ទាប់ពីមន្ត្រីគណៈកម្មាធិការប្រយុទ្ធប្រឆាំងផលិតផលក្លែងក្លាយហៅកាត់ថា «គ.ប.ផ.ក» បានចុះបង្ក្រាបទីតាំងនេះកាលពីថ្ងៃទី ៣ ខែ វិច្ឆិកា ឆ្នាំ ២០២១។
ប្រតិបត្តិការចុះបង្ក្រាបនេះធ្វើឡើងក្រោយពីគណៈកម្មាធិការប្រយុទ្ធប្រឆាំងផលិតផលក្លែងក្លាយទទួលបានពាក្យបណ្តឹងបរិហារពីប្រជាពលរដ្ឋ ដែលបានទិញផលិតផលនៅហាង Mode Store ប៉ះចំផលិតផលក្លែងក្លាយ។
យ៉ាងណាលោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ១០ វិច្ឆិកាថា ព្រះរាជអាជ្ញាដែលកាន់សំណុំរឿងនេះកំពុងបន្តការស៊ើបអង្កេតលើករណីនេះ។ ប៉ុន្តែលោកមិនអាចបញ្ជាក់បានទេថា ចំណាត់បន្តនឹងមានការសម្រេចយ៉ាងណាដោយរង់ចាំការស៊ើបអង្កេតចប់ជាស្ថាពរសិន។
លោកបានបញ្ជាក់ថា៖ «ខ្ញុំគិតថារយៈពេលត្រឹមតែមួយអាទិត្យ (៧ ថ្ងៃ) គិតមកទល់ថ្ងៃនេះ មិនទាន់អាចមានចំណាត់ការចុងក្រោយណាមួយទេ។ ប៉ុន្តែខ្ញុំច្បាស់ណាស់ថា តំណាងអយ្យការកំពុងតែបំពេញកិច្ចរបស់ខ្លួនក្នុងការស៊ើបអង្កេតលើសំណុំរឿងនេះ»។
កាលពីថ្ងៃទី ៣ ខែ វិច្ឆិកា ឆ្នាំ ២០២១ សមត្ថកិច្ចនៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលមានការចូលរួមសម្របសម្រួលនីតិវិធីពីលោក ចែ សុង ព្រះរាជអាជ្ញារងឣមសាលាដំបូងភ្នំពេញ បានចុះបង្ក្រាបហាង Mode Store ដែលមានទីតាំងស្ថិតនៅផ្ទះលេខ 14BC ផ្លូវលេខ ៣៣៧ សង្កាត់បឹងកក់ ១ ខណ្ឌទួលគោក និងមានម្ចាស់ហាងឈ្មោះខេង ពិទូពុធធីតា។
ក្នុងប្រតិបត្តិការនោះ សមត្ថកិច្ចបានប្លុំបេវត្ថុតាងផលិតផល កាបូប នាឡិកា គ្រឿងសម្អាង វ៉ែនតា ព្រមទាំងផលិតផលដែលសង្ស័យជាច្រើនមុខទៀត និងបានឃាត់ខ្លួនម្ចាស់ទីតាំងនាំទៅកាន់ស្នងការដ្ឋាននគរបាលនគរបាលរាជធានីភ្នំពេញ ប៉ុន្តែក្រោយមកម្ចាស់ហាងត្រូវបានអនុញ្ញាតឱ្យត្រឡប់ទៅផ្ទះបណ្តោះអាសន្ន។
បុគ្គលិកហាង Mode Store ម្នាក់ដែលសុំមិនបញ្ចេញឈ្មោះ បានប្រាប់ ភ្នំពេញ ប៉ុស្តិ៍ នៅថ្ងៃទី ១០ វិច្ឆិកាថា លោកមិនច្បាស់ពីព័ត៌មានលម្អិតនោះទេ ខណៈដែលម្ចាស់ហាងកំពុងពិនិត្យពីការចោទប្រកាន់នេះ។ យ៉ាងណា លោកអះអាងថា ហាង Mode Store នៅតែបន្តបើកដំណើរការជាធម្មតា ហើយម្ចាស់ហាងក៏មិនត្រូវបានឃាត់ខ្លួននោះដែរ។
លោកបានរៀបរាប់ថា៖ «ទាក់ទងនឹងព័ត៌នេះដែរ ខាងប្អូនកំពុងពិនិត្យមើលមិនទាន់អាចផ្តល់ព័ត៌មានបានទេជុំវិញការចោទប្រកាន់ថា ហាងប្អូនលក់ផលិតផលលក្លែងក្លាយនេះ។ ថ្នាក់លើរបស់ខ្ញុំកំពុងពិនិត្យមើលថា ព័ត៌មានលក់ផលិតផលក្លែងក្លាយនេះ លិចឮមកពីខាងណា? នៅពេលដឹងច្បាស់ ថ្នាក់លើនឹងចេញបកស្រាយហើយ»៕