ភ្នំពេញៈ កម្ពុជាធ្វើជាម្ចាស់ផ្ទះនៃកិច្ចប្រជុំក្រុមការងារត្រួតពិនិត្យគ្រឿងញៀនប្រចាំកំពង់ផែអាស៊ានលើកទី៦ តាមប្រព័ន្ធអនឡាញនៅថ្ងៃទី ១០ វិច្ឆិកា ខណៈក្រសួងកិច្ចការនារី សហការជាមួយអាជ្ញាធរជាតិ ប្រយុទ្ធប្រឆាំងគ្រឿងញៀន បានបើកវគ្គបណ្តុះបណ្តាលគ្រូបង្គោលថ្នាក់តំបន់ទូទាំងប្រទេស ដើម្បីចូលរួមទប់ស្កាត់ការចែកចាយ និងការប្រើប្រាស់គ្រឿងញៀន។
ទំព័រហ្វេសប៊ុករបស់អគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានឱ្យដឹងនៅថ្ងៃទី ១០ វិច្ឆិកាថា កិច្ចប្រជុំក្រុមការងារត្រួតពិនិត្យគ្រឿងញៀន ប្រចាំកំពង់ផែអាស៊ាន លើកទី៦ ដែលមានកម្ពុជាជាម្ចាស់ផ្ទះនេះ បានប្រព្រឹត្តទៅដោយមានសមាសភាពចូលរួមមកពីបណ្ដាប្រទេសអាស៊ានទាំង ១០ និងមន្ត្រីលេខាធិការដ្ឋានអាស៊ាន។
គោលបំណងសំខាន់នៃកិច្ចប្រជុំលើកនេះ ផ្តោតលើបញ្ហាទី១ ព័ត៌មានបច្ចុប្បន្នភាព និងស្ថានភាពគ្រឿងញៀន ២ ធ្វើបច្ចុប្បន្នភាព មន្ត្រីទំនាក់ទំនងរបស់ក្រុមការងារ ត្រួតពិនិត្យគ្រឿងញៀន កំពង់ផែ និងពិភាក្សាលើកិច្ចសហប្រតិបត្តិការទៅថ្ងៃអនាគត ដើម្បីលើកម្ពស់ និងពង្រឹងសមត្ថភាពមន្ត្រីអនុវត្តច្បាប់។
ក្នុងនាមម្ចាស់ផ្ទះ និងជាប្រធានកិច្ចប្រជុំ លោក ម៉ក់ ជីតូ អគ្គលេខាធិការរងនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងថា ទោះបីប្រទេសទាំងអស់កំពុងជួបវិបត្តិនៃជំងឺកូវីដ ១៩ តែបញ្ហាគ្រឿងញៀន នៅតែជាកង្វល់ ពីព្រោះលោកកត់សម្គាល់ឃើញថា មិនមានសញ្ញាថយចុះនោះទេ នេះបើតាមរបាយការណ៍គ្រឿងញៀនពិភពលោក និងរបាយការណ៍គ្រឿងញៀនប្រចាំប្រទេសអាស៊ាន។
លោកបន្ថែមថា គ្រឿងញៀនសំយោគ និងសារធាតុគីមីផ្សំត្រូវបានចរាចរនៅក្នុងតំបន់ដើម្បីផ្គត់ផ្គង់ទីផ្សារ គ្រឿងញៀនក្រោមការចាត់ចែងដោយឧក្រិដ្ឋជនអន្តរជាតិក្នុងរូបភាពជាបទលើ្មសឆ្លងកាត់ព្រំដែន ដោយឧក្រិដ្ឋជនបានចាត់ចែងបទល្មើសក្រោមរូបភាពកាន់តែស្មុគស្មាញ និងពិបាកត្រួតពិនិត្យ។
លោកបានអំពាវនាវដល់ប្រទេសជាសមាជិកអាស៊ានទាំងអស់ត្រូវដោះស្រាយរួមគ្នាឱ្យកាន់តែមានប្រសិទ្ធភាពបន្ថែមទៀតលើករណីគ្រឿងញៀនព្រោះបញ្ហាគ្រឿងញៀន នៅតែជាកង្វល់ទាំងក្នុងតំបន់អាស៊ាន ក៏ដូចជាពិភពលោក។
លោកបញ្ជាក់ថា៖ «ខ្ញុំសង្ឃឹមជឿជាក់ថា កិច្ចប្រជុំយើងថ្ងៃនេះនឹងបន្តរួមគ្នាបន្តគិតពិចារណា និងស្វែងរកការផ្ដួចផ្ដើមគំនិតថ្មីៗថែមទៀត ដើម្បីធ្វើយ៉ាងណាឱ្យយន្តការទាំងអស់ត្រូវបានបន្តពង្រឹង និងពង្រីក ស្របតាមស្ថានភាពវិវត្តប្រែប្រួលនៃបញ្ហាគ្រឿងញៀនក្នុងបរិបទជំងឺកូវីដ ១៩»។
ជាមួយនឹងការធ្វើជាម្ចាស់ផ្ទះនេះ នៅថ្ងៃដដែលនេះដែរ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនក៏បានរួមគ្នាជាមួយក្រសួងកិច្ចការនារី និងគណ:កម្មាធិការត្រួតពិនិត្យគ្រឿងញៀនខេត្តកោះកុង រៀបចំវគ្គបណ្តុះបណ្តាលគ្រូបង្គោលថ្នាក់តំបន់ផងដែរ។
អគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានឱ្យដឹងថា គ្រូបង្គោលថ្នាក់តំបន់ទាំងអស់ត្រូវបានរើសចេញពីខេត្តចំនួន ០៨ មានរាជធានី-ភ្នំពេញ ខេត្តព្រះសីហនុ កែប កំពត តាកែវ កំពង់ស្ពឺ កណ្តាល និងខេត្តសៀមរាប ដោយពួកគេ ត្រូវបានបណ្តុះបណ្តាលពាក់ព័ន្ធនឹងការលើកកម្ពស់ការចូលរួមរបស់អ្នកម្តាយ ដើម្បីទប់ស្កាត់ការប្រើប្រាស់ និងការចែកចាយគ្រឿងញៀន។
អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបញ្ជាក់ថា៖ «គោលបំណង គឺអភិវឌ្ឍចំណេះដឹងដល់មន្ត្រី កិច្ចការនារី ដើម្បីឱ្យប្រតិបត្តិករទាំងនេះយកទៅប្រើប្រាស់ជាមូលដ្ឋានក្នុងការកៀរគរការចូលរួមពីស្ត្រី ជាលោកយាយ អ៊ំស្រី ម្តាយ ម្តាយមីង បងប្អូនស្ត្រី រួមគ្នាទប់ស្កាត់ការប្រើប្រាស់រក្សាទុក និងចែកចាយគ្រឿងញៀនខុសច្បាប់ឱ្យអស់ពីសហគមន៍យើង»។
លោក ទូ សាវុធ អភិបាលរងខេត្តកោះកុងបានលើកឡើងថា គ្រឿងញៀនជាមូលហេតុមួយដែលជំរុញ និងបង្កឱ្យមានបទល្មើសផ្សេងៗ គំរាមកំហែងដល់សន្តិសុខសណ្តាប់ធ្នាប់សហគមន៍ ដែលទាមទារឲ្យមានការរួមគ្នាប្រយុទ្ធប្រឆាំងគ្រឿងញៀន ទប់ស្កាត់កាត់បន្ថយ និងឈានទៅលុបបំបាត់នូវការប្រើប្រាស់ និងចែកចាយគ្រឿងញៀន។
លោកស្រី ឡុង សុផល្លី អនុរដ្ឋលេខាធិការក្រសួងកិច្ចការនារី បានឲ្យដឹងថា ក្នុងឆ្នាំ ២០១៩ កន្លងទៅ ការចុះពិនិត្យស្ថានភាពស្ត្រីកំពុងជាប់ឃុំក្នុងពន្ធនាគារចំនួន ២៨ នៅទូទាំង ២៥ រាជធានី-ខេត្តគឺបានរកឃើញថាស្ត្រីកំពុងជាប់ពន្ធនាគារភាគច្រើន បានប្រព្រឹត្តបទល្មើសពាក់ព័ន្ធនឹងការជួញដូរ ចែកចាយ និងរក្សាទុកគ្រឿងញៀន។
ដូច្នេះលោកស្រីមើលឃើញថា៖ «គ្រឿងញៀន ក៏ជាកត្តារួមចំណែកក្នុងការជំរុញឱ្យអ្នកប្រើប្រាស់ ប្រព្រឹត្តអំពើហិង្សាក្នុងគ្រួសារ ហិង្សាលើស្ត្រី ការជួញដូរមនុស្ស និងឧក្រិដ្ឋកម្មផ្សេងៗទៀតផងដែរ»។ នេះបើផ្អែកតាមការចុះប្រមូលទិន្នន័យតាមរយៈកិច្ចសម្ភាសន៍ផ្ទាល់ជាមួយស្ត្រីក្រុមគោលដៅនៅថ្នាក់ក្រោមជាតិក្នុងខេត្តចំនួន ៧ (រួមមានខេត្តសៀមរាប កំពង់ស្ពឺ កំពង់ចាម បាត់ដំបងស្វាយរៀង កោះកុង និងខេត្តរតនគិរី)។
ដូច្នេះលោកជឿជាក់ថា ការបង្កើតក្រុមការងារទប់ស្កាត់ការប្រើប្រាស់គ្រឿងញៀន នឹងចូលរួមបង្ការទប់ស្កាត់ការប្រើប្រាស់គ្រឿងញៀនខុសច្បាប់ និងជំរុញការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងគោលនយោបាយភូមិឃុំមានសុវត្ថិភាពឱ្យកាន់តែសកម្ម និងទទួលបាននូវប្រសិទ្ធភាពខ្ពស់។
លោក មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន បានសាទរចំពោះកិច្ចសហប្រតិបត្តិការរវាងក្រសួងកិច្ចការនារី ដែលជាសមាជិករបស់អាជ្ញាធរជាតិប្រយុទ្ធប្រឆាំងគ្រឿងញៀន ដែលបានចូលរួមអនុវត្តនូវយុទ្ធសាស្ត្រ ពហុវិស័យ ក្នុងការបណ្តុះបណ្តាលនេះ។
លោកបន្តថា៖ «ការចូលរួមសកម្មភាពនាពេលនេះ មានសារៈសំខាន់ណាស់ ស្របពេលដែលស្ថានភាពគ្រឿងញៀននៅកម្ពុជាបានរីករាលដាល ដល់ទីជនបទមានផលប៉ះពាល់ដល់ប្រជាពលរដ្ឋទូទៅក្នុងនោះមានយុវនារី ដែលតម្រូវឱ្យយើងត្រូវតែរួមគ្នាដោះស្រាយ»៕