ស្ទឹងត្រែងៈ គិតត្រឹមរសៀលថ្ងៃទី ១០ ខែ វិច្ឆិកា ឆ្នាំ ២០២១ នេះ កម្លាំងសមត្ថកិច្ចនគរបាលខេត្តស្ទឹងត្រែងបានស្រាវជ្រាវចាប់ឃាត់ខ្លួនអ្នកទោស ៣ នាក់ ក្នុងចំណោម ៧ នាក់បានមកវិញហើយ និងកំពុងបន្តធ្វើការឡោមព័ទ្ធ និងរុករកចាប់ខ្លួនអ្នកទោស ៤ នាក់ទៀត ដែលកំពុងរត់គេចទៅក្នុងព្រៃមួយកន្លែងក្នុងភូមិសាស្ត្រ ស្រុកថាឡាបរិវ៉ាត់។ នេះបើតាមសម្ដី លោក អូត ស៊ីវុត្ថា ស្នងការនគរបាលខេត្តស្ទឹងត្រែង។
យោងតាមរបាយការណ៍របស់មន្ត្រីអនុរក្សពន្ធនាគារខេត្តស្ទឹងត្រែងនៅវេលាម៉ោង ៣:២០ នាទីទៀបភ្លឺថ្ងៃទី ៨ ខែ វិច្ឆិកា ឆ្នាំ ២០២១ មានអ្នកទោស ៧ នាក់ ដែលក្នុងនោះមានជនជាតិឡាវ ២ នាក់ និងខ្មែរ ៥ នាក់ បាននាំគ្នាវាយទម្លុះជញ្ជាំងគុកហើយលួចរត់ចេញពីគុក។ តាមរយៈវត្ថុតាងដែលឆ្មាំពន្ធនាគារបានរកឃើញនៅកន្លែងកើតហេតុ ក្រុមអ្នកទោសបានប្រើប្រដាប់ខួង ដែកត្រសេះ កំណាត់ឈើ ខ្នើយ និងភួយ ដើម្បីខ្ទប់វាយជញ្ជាំងគុកនោះមិនឱ្យឮសំឡេង។
របាយការណ៍បានបន្តថា ក្រោយពីបានដឹងអំពីករណីនោះ ឆ្មាំពន្ធនាគារ បានផ្ទុះអាវុធ ៤ គ្រាប់ ដើម្បីបញ្ឈប់សកម្មភាពនៃការលួចរត់របស់អ្នកទោសផ្សេងទៀត។ អ្នកទោសទាំងនោះភាគច្រើនពាក់ព័ន្ធក្នុងបទល្មើសគ្រឿងញៀន និងលួចប្លន់មានស្ថានទម្ងន់ទោស។
លោក អូត ស៊ីវុត្ថា បានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ១០ ខែវិច្ឆិកា ឆ្នាំ ២០២១ ថា គិតមកដល់រសៀលថ្ងៃទី ១០ ខែវិច្ឆិកា ឆ្នាំ ២០២១ នេះ កម្លាំងសមត្ថកិច្ចបានចាប់អ្នកទោស ៣ នាក់ក្នុងចំណោមអ្នកទោស ៧ នាក់ ដែលបានលួចរត់ពីពន្ធនាគារខេត្តស្ទឹងត្រែង កាលពីព្រឹកថ្ងៃទី ៨ ខែវិច្ឆិកា ឆ្នាំ ២០២១ នោះ មកវិញហើយ។ ក្នុងនោះអ្នកទោសឈ្មោះ ទូច រ៉ាត់ អាយុ ៤០ ឆ្នាំត្រូវបានកម្លាំងសមត្ថកិច្ចនគរបាលជំនាញស្រាវជ្រាវ និងចាប់ខ្លួនបានមកវិញកាលពីល្ងាចថ្ងៃទី ៩ ខែវិច្ឆិកា ឆ្នាំ ២០២១។
អ្នកទោសរូបនេះត្រូវបានតុលាការខេត្តស្ទឹងត្រែង កាលពីថ្ងៃទី ២០ ខែមីនា ឆ្នាំ ២០២០ សម្រេចផ្ដន្ទាទោសដាក់ពន្ធនាគាររយៈពេល ៣០ ឆ្នាំពីបទជួញដូរគ្រឿងញៀន បន្ទាប់ពីត្រូវបានកម្លាំងនគរបាលជំនាញប្រឆាំងបទល្មើសគ្រឿងញៀន ខេត្តស្ទឹងត្រែងចាប់ខ្លួននៅចំណុចសង្កាត់ស្រះឫស្សី ក្រុង-ខេត្តស្ទឹងត្រែង កាលពីថ្ងៃទី ៧ ខែឧសភា ឆ្នាំ ២០១៩ ជាមួយវត្ថុតាងគ្រឿងញៀនជាច្រើនគីឡូក្រាម។
ចំណែកអ្នកទោសឈ្មោះ វ៉ាន់ ភូ ដែលត្រូវបានតុលាការផ្ដន្ទាទោសជាប់ពន្ធនាគារ ២០ ឆ្នាំពីបទល្មើសជួញដូរគ្រឿងញៀន និងអ្នកទោសឈ្មោះ កិន ងិន ដែលត្រូវបានតុលាការផ្ដន្ទាទោសជាប់ពន្ធនាគារ ៤ ឆ្នាំ ពីបទល្មើសជួញដូរគ្រឿងញៀនដែរនោះ ត្រូវបានចាប់ខ្លួននៅវេលាម៉ោង ១២ ថ្ងៃត្រង់ថ្ងៃទី ១០ ខែវិច្ឆិកា ឆ្នាំ ២០២១ នៅស្រុកថាឡាបរិវ៉ាត់ ខេត្តស្ទឹងត្រែង។
លោកបានបញ្ជាក់ថា៖ «នៅពេលនេះ កម្លាំងនគរបាលជំនាញយើងកំពុងបន្តធ្វើការឡោមព័ទ្ធ និងរុករកតាមចាប់អ្នកទោស ៤ នាក់ទៀត ដែលកំពុងរត់គេចខ្លួននៅក្នុងព្រៃនៅឡើយនោះ ដើម្បីនាំយកមកអនុវត្តទោសក្នុងពន្ធនាគារជាបន្តទៀត និងដើម្បីឱ្យតុលាការ ចាត់វិធានការបន្តតាមនីតិវិធីលើករណីលួចរត់ចេញពីគុកនេះបន្ថែមទៀត»។
បើតាមលោក ស៊ីវុត្ថា ក្រុមអ្នកទោសទាំងនោះអាចនឹងនាំគ្នាលួចចូលមកក្នុងភូមិ ដើម្បីធ្វើសកម្មភាពផ្សេងៗ ព្រោះពួកគេពេលដែលលួចរត់ចេញពីក្នុងគុកនោះគឺគ្មានស្បៀងអាហារជាប់ខ្លួននោះទេ ដូច្នេះពួកគេមិនអាចអត់ទ្រាំនៅក្នុងព្រៃបានយូរឡើយ។ ជាមួយគ្នានេះ លោកបានណែនាំឱ្យគ្រប់កងកម្លាំងនគរបាលទាំងអស់ បង្កើនការត្រួតពិនិត្យ និងឃ្លាំមើលគ្រប់ច្រកចេញចូលទាំងអស់ ដោយសហការគ្នាឱ្យបានល្អពីមូលដ្ឋានមួយទៅមូលដ្ឋានមួយ ធ្វើយ៉ាងណាស្ទាក់ចាប់ក្រុមអ្នកទោសដែលកំពុងរត់គេចខ្លួនទាំងនោះមកវិញឱ្យបាន។
លោក ឈុន តារា ប្រធានពន្ធនាគារខេត្តស្ទឹងត្រែងបានប្រាប់ ភ្នំពេញ ប៉ុស្តិ៍ថា ក្រុមអ្នកទោសដែលទើបចាប់បានមកវិញនោះ នៅពេលនេះត្រូវបានកម្លាំងនគរបាលជំនាញបញ្ជូនមកឃុំខ្លួនក្នុងពន្ធនាគារខេត្តស្ទឹងត្រែងវិញហើយ។
លោកបាននិយាយទៀតថា៖ «ទណ្ឌិតទាំង ៣ រូបនេះនឹងត្រូវប្រឈមការដាក់ទោសទណ្ឌបន្ថែមទៀត ក្នុងបទល្មើសលួចរត់ដោយវាយទម្លាយជញ្ជាំងពន្ធនាគារ»។
សម្រាប់ឆ្នាំ ២០២១ នេះ ករណីអ្នកទោសលួចរត់ពីពន្ធនាគារ មិនមែនកើតមានតែនៅពន្ធនាគារខេត្តស្ទឹងត្រែងនេះទេ។ ករណីដូចគ្នានេះក៏កើតនៅពន្ធនាគារខេត្តកណ្ដាល មានអ្នកទោសលួចរត់ចេញពីពន្ធនាគារចំនួន ២ ដងរួចមកហើយនៅក្នុងឆ្នាំ ២០២១ នេះ គឺក្នុងខែមករាម្ដង និងក្នុងខែសីហាម្ដងទៀត ដោយមានអ្នកទោសសរុប ៨ នាក់ ប៉ុន្តែពួកគេត្រូវបានកម្លាំងសមត្ថកិច្ចតាមចាប់ខ្លួនបានមកវិញភ្លាមៗទាំង ២ លើក៕
វីដេអូ៖