.jpg)
ជនសង្ស័យវ័យ ៥៤ ឆ្នាំចាប់រំលោភកូនស្រីចុងវ័យ ១១ ឆ្នាំ។ រូប នគរបាល
សៀមរាបៈ នគរបាលប្រឆាំងការជួញដូរមនុស្សខេត្តសៀមរាបនៅរសៀលថ្ងៃទី ១០ វិច្ឆិកា បានបញ្ជូនបុរសម្នាក់ទៅសាលាដំបូងខេត្ត ពាក់ព័ន្ធករណីចាប់រំលោភកូនស្រីចុងអាយុ ១១ ឆ្នាំ ចំនួន ២ លើក ប្រព្រឹត្តនៅឃុំបឹងមាលា ស្រុកស្វាយលើ។
លោកស្រី ដួង ថាវរី ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជនខេត្តសៀមរាបប្រាប់នៅរសៀលថ្ងៃទី ១០ វិច្ឆិកាថា មន្ត្រីនគរបាលជំនាញបានបញ្ជូនជនសង្ស័យឈ្មោះ ឈន់ ឈី អាយុ ៥៤ ឆ្នាំ ទៅសាលាដំបូងខេត្តសៀមរាប នៅរសៀលថ្ងៃទី ១០ វិច្ឆិកា។ លោកស្រីថា៖ «ជនសង្ស័យគាត់សារភាពថា គាត់ពិតជាបានប្រព្រឹត្តលើកូនស្រីចុងរបស់គាត់មែន»។
លោក អឿម តូឡូ នាយផ្នែកនគរបាលព្រហ្មទណ្ឌ ស្រុកស្វាយលើប្រាប់នៅរសៀលថ្ងៃទី ១០ វិច្ឆិកាថា ក្មេងរងគ្រោះឈ្មោះ ស.ន អាយុ ១១ ឆ្នាំជាសិស្ស រស់នៅក្នុងបន្ទុករបស់ជនសង្ស័យក្នុងឃុំបឹងមាលាស្រុកស្វាយលើ។ «រឿងនេះក្រោយចាប់ខ្លួនជនសង្ស័យបានសារភាពដូចអ្វីដែលក្មេងស្រីនិយាយ»។
លោកបានរៀបរាប់តាមសម្តីស្ត្រីម្តាយក្មេងរងគ្រោះថា ជនសង្ស័យឈ្មោះ ឈន់ ឈី បានស្រឡាញ់ និងរួមរស់ជាមួយម្តាយក្មេងស្រីរងគ្រោះមិនមានកូនទេ។ ប៉ុន្តែម្តាយក្មេងរងគ្រោះមានកូនជាមួយប្តីមុនចំនួន ៣ នាក់ប្រុស ២ នាក់ និងស្រីម្នាក់ ដែលជាកូនពៅ (ក្មេងរងគ្រោះ)។ ចំពោះអង្គហេតុក្នុងរឿងនេះលោក តូឡូ មិនបានបញ្ជាក់ប្រាប់លម្អិតទេ។
ទោះយ៉ាងណា បើតាមមន្ត្រីម្នាក់នៅអធិការដ្ឋាននគរបាលស្រុកស្វាយលើដែលសុំមិនបញ្ចេញឈ្មោះប្រាប់តាមចម្លើយរបស់ជនសង្ស័យថា ករណីចាប់កូនស្រីចុងរំលោភនេះបានកើតឡើងកាលពីដើមខែតុលាឆ្នាំ ២០២១។ ដោយលើកទី១ ជនសង្ស័យ បានចាប់បង្ខំក្មេងរងគ្រោះរំលោភនៅលើផ្ទះរបស់ខ្លួនរហូតបានសម្រេចហើយជនសង្ស័យគំរាមមិនឱ្យក្មេងរងគ្រោះនិយាយប្រាប់ម្តាយ ឬនរណាទេ បើហ៊ានប្រាប់គឺសម្លាប់ចោល។
បន្ទាប់មកជនសង្ស័យបានចាប់ក្មេងរងគ្រោះរំលោភម្តងទៀត នៅទ្រុងមាន់ក្បែរផ្ទះរបស់ខ្លួនបានសម្រេចជាលើកទី២។ ប៉ុន្តែនៅថ្ងៃទី ៨ វិច្ឆិកា ដោយខ្លាចឪពុកចុងរបស់ខ្លួនចាប់រំលោភទៀត ក្មេងស្រីរងគ្រោះក៏និយាយប្រាប់ម្តាយ។
ក្រោយពីបានស្តាប់ការរៀបរាប់របស់កូនមកស្ត្រីជាម្តាយបានទៅប្តឹងនៅប៉ុស្តិ៍នគរបាលបឹងមាលា ហើយនគរបាលប៉ុស្តិ៍ បានរាយការណ៍បន្តទៅលោក ស៊ុន អេង អធិការនគរបាល ស្រុកស្វាយលើ ហើយនៅថ្ងៃទី ៩ ខែវិច្ឆិកា សមត្ថកិច្ចបានចុះមកចាប់ខ្លួនជនសង្ស័យនៅផ្ទះរបស់គាត់តែម្តង៕
