ភ្នំពេញៈ លោក ស ខេង រដ្ឋមន្ត្រីក្រសួងមហាផ្ទៃ និងមន្ត្រីជាច្រើនរូបទៀតកាលពីថ្ងៃទី ១១ ខែ វិច្ឆិកា ឆ្នាំ ២០២១ បានចូលរួម ប្រកាសបើកការដ្ឋានសាងសង់អគារថ្មីនៃទីស្ដីការក្រសួងមហាផ្ទៃកម្ពស់ ៩ ជាន់ បណ្ដោយជាង ១៥០ ម៉ែត្រ និងទទឹងជាង ៨០ ម៉ែត្រ នៅក្នុងបរិវេណទីតាំងចាស់ ដែលចំណាយថវិការដ្ឋប្រមាណជាង ៦០ លានដុល្លារសហរដ្ឋអាមេរិក។
លោក ខៀវ សុភ័គ អ្នកនាំពាក្យក្រសួងមហាផ្ទៃ ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ១១ វិច្ឆិកានេះថា អគារទីស្ដីការក្រសួងមហាផ្ទៃថ្មីនេះ មានកន្លែងការងារសម្រាប់មន្ត្រីប្រមាណ ៨ ៥០០ នាក់ និងមានកន្លែងចតយានយន្តប្រមាណ ៣៣០ គ្រឿង។
លោកថ្លែងថា៖ «តាមគម្រោងរបស់យើង គឺប្រើរយៈពេលពេល ២ ឆ្នាំដើម្បីសាងសង់ និងចំណាយថវិកា ៦០ លានដុល្លារអាមេរិក ជាថវិការបស់រដ្ឋទាំងអស់»។
លោក ខៀវ សុភ័គ បានឱ្យដឹងថា៖ «ប្លង់ស្ថាបត្យកម្មនៃអគារទីស្តីការថ្មីនេះ ជាប្រភេទស្ថាបត្យកម្ម ក្លាសិក រចនាប័ទ្មខ្មែរលំនាំតាមប្រាសាទអង្គរវត្តកំពូល ៥ និងបានគិតគូរយ៉ាងហ្មត់ចត់អំពីពន្លឺ ខ្យល់ធម្មជាតិ ចេញចូលគ្រប់គ្រាន់ ប្រកបដោយផាសុខភាព ស័ក្តិសមជាទីកន្លែងធ្វើការបែបសម័យទំនើបថ្មី»។
លោកបានបញ្ជាក់ថា ការសាងសង់ចាប់ផ្ដើមដំណើរការពីខែវិច្ឆិកា ឆ្នាំ ២០២១ ហើយនឹងបញ្ចប់ការសាងសង់នៅខែសីហា ឆ្នាំ ២០២៣ ដែលទទួលសិទ្ធិម៉ៅការសាងសង់ដោយក្រុមហ៊ុនឈ្មោះ គីម ម៉ិច ខនស្ត្រាក់សិន និងអ៊ិនវេសមេន៕