ពោធិ៍សាត់ៈ នគរបាលព្រហ្មទណ្ឌខេត្តពោធិ៍សាត់នៅថ្ងៃទី ១១ វិច្ឆិកា កំពុងស្រាវជ្រាវតាមចាប់ជនសង្ស័យម្នាក់ ករណីប្លន់សម្លាប់នាយសង្កាត់រដ្ឋបាលព្រៃឈើក្នុងស្រុកវាលវែងខេត្តពោធិ៍សាត់ ខណៈសមត្ថកិច្ចបានកំណត់អត្តសញ្ញាណជនល្មើសរួចហើយ។
លោកឧត្តមសេនីយ៍ត្រី ម៉ូ លីដា ស្នងការរងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តពោធិ៍សាត់ឱ្យដឹងនៅរសៀលថ្ងៃទី ១១ វិច្ឆិកាថា ការស្លាប់របស់លោក សេង វិសាល អាយុ ៥២ ឆ្នាំ ជានាយសង្កាត់រដ្ឋបាលព្រៃឈើ (ប្រមោយ) ជាករណីឃាតកម្មប្លន់សម្លាប់យកទ្រព្យសម្បត្តិ។ ចំណែកជនសង្ស័យវិញក៏សមត្ថកិច្ចកំណត់អត្តសញ្ញាណបានហើយដែរ និងកំពុងតាមចាប់ខ្លួន។
លោកថ្លែងថា៖ «យើងកំណត់ជាករណីឃាតកម្មប្លន់សម្លាប់ព្រោះបាត់ម៉ូតូ ១ គ្រឿង ទូរស័ព្ទដៃ ៣ គ្រឿង និងចិញ្ចៀនពេជ្រ ១ វង់ តម្លៃ ២ ពាន់ដុល្លារ»។
លោក ធាង ឡេង អធិការនគរបាលស្រុកវាលវែងបានប្រាប់នៅរសៀលថ្ងៃទី ១១ វិច្ឆិកាថា ការដឹងព័ត៌មានពីការស្លាប់នេះ គឺដោយសារពេលថ្ងៃនៃថ្ងៃទី ៩ និងទី ១០ វិច្ឆិកា ភរិយាជនរងគ្រោះបានទូរស័ព្ទទាក់ទងជនរងគ្រោះមិនចូល។លុះនៅប្រហែលម៉ោងយប់ថ្ងៃទី ១០ វិច្ឆិកា ភរិយារបស់ជនរងគ្រោះបានទៅតាមប្តីដល់ទីស្នាក់ការស្ថិតនៅភូមិស្ទឹងថ្មី ឃុំប្រមោយ ស្រុកវាលវែង ទើបប្រទះឃើញជនរងគ្រោះដេកស្លាប់ដែលមានឈាមជោកខ្លួនក៏រាយការណ៍ទៅនគរបាលប៉ុស្តិ៍ឃុំប្រមោយទាំងយប់។
លោកបានបន្តថា ភ្លាមៗនោះកម្លាំងនគរបាលឃុំប្រមោយសហការជាមួយនគរបាលស្រុកវាលវែងរួមនឹងមន្ត្រីជំនាញបានចុះដល់កន្លែងកើតហេតុ។ជាលទ្ធផលធ្វើកោសល្យវិច័យបង្ហាញថាជនរងគ្រោះត្រូវបានជនល្មើសកាប់នឹងកាំបិតផ្គាក់ ឬអារក ព្រោះមានស្នាមដាច់សាច់ជុំវិញក។ រីឯកាំបិតផ្គាក់ជាមធ្យោបាយសម្លាប់ក៏ត្រូវជនដៃដល់ទុកនៅកន្លែងកើតហេតុដែរ។
លោកបន្តថា៖ «តាមមន្ត្រីកោសល្យវិច័យពិនិត្យសាកសពព្រឹកមិញនេះ (ថ្ងៃទី ១១ វិច្ឆិកា) សន្និដ្ឋានថា សាកសពស្លាប់លើសពី ៣៦ ម៉ោងហើយ»។
លោក ធាង ឡេង បានប្រាប់ដោយយោងតាមសម្តីរបស់ភរិយាជនរងគ្រោះថា ប្តីរបស់គាត់បានយកមនុស្សប្រុសម្នាក់ដែលមិនមែនជាសាច់ញាតិទេឱ្យនៅជាមួយនៅស្នាក់ការសង្កាត់រដ្ឋបាលព្រៃឈើ ហើយក្រោយកើតហេតុបុរសម្នាក់នោះក៏បានបាត់ខ្លួនពីកន្លែងកើតហេតុដែរ។ ហេតុដូច្នេះសមត្ថកិច្ចបានដាក់ការសង្ស័យថា អ្នកដែលសម្លាប់ជនរងគ្រោះមានតែជនម្នាក់នោះទេ៕
វីដេអូ៖