.jpg)
លោក ឡុង ឌីម៉ង់ អភិបាលរងខេត្តព្រះសីហនុ។ រូបថត រដ្ឋបាលខេត្តព្រះសីហនុ
ព្រះសីហនុៈ អាជ្ញាធរខេត្តព្រះសីហនុ កំពុងរៀបចំក្រុមការងារចម្រុះ ដើម្បីចុះទៅត្រួតពិនិត្យដល់ទីតាំងរោងម៉ាស៊ីន រោងសន្និធិ និងរោងសិប្បកម្មកែច្នៃឈើចំនួន ២២ ទីតាំង ដែលនៅក្នុងនិងក្បែរតំបន់ការពារធម្មជាតិ នៃក្រុងស្រុកទាំង ៣ ក្នុងខេត្តព្រះសីហនុ។
លោក ឡុង ឌីម៉ង់ អភិបាលរងខេត្តព្រះសីហនុ ថ្លែងនៅថ្ងៃទី ១១ វិច្ឆិកាថា ក្រុមការងារចម្រុះក្នុងការចុះប្រតិបត្តិការពិនិត្យរោងសិប្បកម្មកែច្នៃឈើនេះ មានរដ្ឋបាលខេត្តព្រះសីហនុ រដ្ឋបាលស្រុក និងក្រុងទាំង ៣ មន្ទីរបរិស្ថាន មន្ទីរកសិកម្ម ព្រមទាំងខណ្ឌរដ្ឋបាលព្រៃឈើ។ ក្រុមការងារនេះ នឹងចុះទៅត្រួតពិនិត្យដល់ទីតាំងជាក់ស្តែងម្តងមួយៗ យ៉ាងយូរក្រោយរយៈពេល ២ សប្តាហ៍ទៀត។
រោងម៉ាស៊ីន រោងសន្និធិ និងរោងសិប្បកម្មកែច្នៃឈើ ទាំង ២២ ទីតាំងនោះ គឺសុទ្ធតែស្ថិតនៅក្នុង និងក្បែរតំបន់អភិរក្ស ហេតុនេះការចុះទៅពិនិត្យ គឺដើម្បីកំណត់ថា ទីតាំងណាមានច្បាប់ ទីតាំងណាអត់ច្បាប់។ ចំពោះទីទាំងដែលអត់មានច្បាប់អនុញ្ញាតត្រឹមត្រូវ គឺត្រូវតែរាយការណ៍ជូនថ្នាក់ដឹកនាំ និងសុំគោលការណ៍ដើម្បីបិទទីតាំងតែម្តង ។
លោក ឡុង ឌីម៉ង់ ប្រាប់ថា កាលពីថ្ងៃទី ១០ វិច្ឆិកា ឆ្នាំ ២០២១ រូបលោក និងអភិបាលរងខេត្តម្នាក់ទៀតបាន ដឹកនាំកិច្ចប្រជុំពិភាក្សាពិនិត្យ និងត្រៀមចុះបញ្ឈប់ទីតាំងរោងម៉ាស៊ីន រោងសន្និធិ និងរោងសិប្បកម្មកែច្នៃឈើគ្មានច្បាប់អនុញ្ញាតនៅក្នុងនិងក្បែរតំបន់ការពារធម្មជាតិក្នុងក្រុងស្រុកទាំង ៣ នៃខេត្តព្រះសីហនុ ក្រោយទទួលព័ត៌មានថា មានរោងសិប្បកម្មខ្លះ មិនសហការបង្ហាញលិខិតអនុញ្ញាតនៅពេលមន្ត្រីជំនាញបរិស្ថាន ចុះទៅពិនិត្យក្នុងពេលកន្លងទៅ។
លោកថ្លែងថា៖ «យើងប្រជុំគ្នា ដើម្បីត្រួតពិនិត្យថា កន្លែងណា មានកន្លែងណាអត់មានច្បាប់។ អ៊ីចឹងទេបានជាម្សិលមិញ (១០ វិច្ឆិកា) យើងបានកំណត់គ្នាបង្កើតក្រុមការងាររដ្ឋបាលឯកភាពមួយ ដើម្បីចុះពិនិត្យ ២២ ទីតាំងនោះឡើងវិញ តែលើកនេះ គឺមានការណែនាំពីខាងរដ្ឋបាលខេត្ត បានន័យថា លើកនេះចម្រុះមិនមែនដូចលើកមុនទេ» ។
ទីតាំងណាមានច្បាប់ត្រឹមត្រូវ និងសិប្បកម្មខ្លះជាសិប្បកម្មកែច្នៃឈើ ជាលក្ខណៈគ្រួសារ ជាលក្ខណៈសហគមន៍ នោះគឺមិនមានបញ្ហាអ្វីទេ ឱ្យតែមានក្រដាសស្នាមត្រឹមត្រូវ ឬមានអាជ្ញាបណ្ណពីស្ថាប័នជំនាញ ។
លោកថ្លែងថា៖ «យើងនិងពិនិត្យមើលជាក់ស្តែងថា តើប្រភេទឈើយ៉ាងម៉េច ហើយយើងនឹងអប់រំណែនាំគាត់ឱ្យបិទទីតាំង និងមិនត្រូវឱ្យធ្វើទៀត។ ក៏ប៉ុន្តែអាស្រ័យទៅលើកន្លែងខ្លះដែរ បើសិនជាការល្មើសខ្លាំង ធ្ងន់ធ្ងរ ខ្ញុំមិនទាន់ហ៊ានថា មានទោសទណ្ឌយ៉ាងណាទេ សំខាន់ពិនិត្យមើលឯកសារឱ្យបានគ្រប់អស់សិន»។
លោក ឡុង ឌីម៉ង់ បញ្ជាក់ថា ការបង្កើតក្រុមការងារចម្រុះចុះពិនិត្យទីតាំងសិប្បកម្មកែច្នៃឈើក្នុងខេត្តព្រះសីហនុនេះ គឺដើម្បីគ្រប់គ្រង និងអភិរក្សតំបន់ការពារធម្មជាតិឱ្យនៅគង់វង្ស និងមាននិរន្តរភាពសម្រាប់ប្រជាពលរដ្ឋនៅក្នុងមូលដ្ឋាន។
លោកថ្លែងថា៖ «ខ្ញុំនឹងប្រឹងធ្វើការលុបបំបាត់ភាពអសកម្ម ឬក៏ខុសច្បាប់ទាំងអស់ហ្នឹងឡើងវិញ ដើម្បីការពារធនធានធម្មជាតិរបស់យើង ឱ្យបានត្រឹមត្រូវ»។
លោក វ៉ាន់ លី មន្ត្រីអង្គការលីកាដូ ប្រចាំខេត្តព្រះសីហនុ ថ្លែងនៅថ្ងៃទី ១១ ខែវិច្ឆិកាថា ការដែលរដ្ឋបាលខេត្តលើកយកវិធានការដើម្បីចុះពិនិត្យទីតាំងកែច្នៃឈើខុសច្បាប់នោះ គឺជារឿងល្អ ដើម្បីទប់ស្កាត់ការកាប់ដើមឈើយកមកធ្វើការកែច្នៃ ខណៈកន្លងមក មិនមានការចុះហាមឃាត់នោះទេ ។
លោកថ្លែងថា៖ «វាជារឿងល្អ ដែលជួយរក្សាព្រៃឈើ ឱ្យបាននៅគងវង់ ប៉ុន្តែមួយទៀត ទាក់ទងការគ្រប់គ្រង មានន័យថាទាក់ទងនិងតំបន់ព្រៃឈើ តំបន់ដែលជាសមត្ថកិច្ចរបស់មន្ត្រីជំនាញហ្នឹង គាត់គួរតែមានការបង្កើននូវការដើរល្បាត ឬក៏មានវិធានការ ទៅលើជនខិលខូច អ្នកលួចកាប់ព្រៃឈើ បន្ថែមទៀត ដើម្បីឱ្យកាន់តែមានប្រសិទ្ធភាព»៕
