ភ្នំពេញៈ រដ្ឋាភិបាល សង្គមស៊ីវិល និងវិស័យឯកជន បានរួមគ្នាធ្វើយុទ្ធនាការ ស្តីពីការបើកបរដោយសុវត្ថិភាពលើកទី ៥ ឆ្នាំ ២០២១ ដើម្បីផ្សព្វផ្សាយ និងជំរុញឱ្យប្រជាពលរដ្ឋចូលរួមគោរពច្បាប់ចរាចរណ៍ ខណៈបញ្ហាគ្រោះថ្នាក់ចរាចរណ៍ នៅតែជាមូលហេតុនាំមុខគេនៃការស្លាប់ និងរបួសនៅក្នុងប្រទេសកម្ពុជា។
យុទ្ធនាការនេះបង្កើតឡើងដោយមានការចូលរួមពីក្រសួងអប់រំ យុវជន និងកីឡា ក្រសួងសាធារណការ និងដឹកជញ្ជូន គណៈកម្មាធិការជាតិសុវត្ថិភាពចរាចរណ៍ផ្លូវគោក និងអង្គការ SIPAR និងបណ្តាវិស័យឯកជនជាច្រើនទៀត។ តាមសេចក្តីប្រកាសព័ត៌មានរួមរបស់ស្ថាប័នទាំងនេះឲ្យដឹងថា យុទ្ធនាការនេះមានរយៈពេល ៥ ថ្ងៃចាប់ពីថ្ងៃទី ១០ ដល់ថ្ងៃទី ១២ វិច្ឆិកា និងថ្ងៃទី ១៥ ដល់ថ្ងៃទី ១៦ វិច្ឆិកា ឆ្នាំ ២០២១ នៅភ្នំពេញ និងធ្វើឡើងនៅតាមបណ្តាស្ថាប័នដែលស្ថិតក្រោមការគ្រប់គ្រងរបស់ក្រសួងអប់រំ ក្រសួងសាធារណការ និងគណៈកម្មាធិការជាតិសុវត្ថិភាពចរាចរណ៍ផ្លូវគោក។
សេចក្តីប្រកាសរួមបញ្ជាក់ថា៖ «យុទ្ធនាការនេះមានឈ្មោះថា “បើកបរដោយសុវត្ថិភាព” ផ្តោតលើការគោរពច្បាប់ចរាចរណ៍ និងច្បាប់ចរាចរណ៍ផ្លូវគោកក្រោមពាក្យស្លោក“ មួកសុវត្ថិភាពមួយ ជីវិតមួយ»។
តាមរយៈយុទ្ធនាការនេះ ក្រុមហ៊ុនតូតាល់កម្ពុជា និងដៃគូនានានឹងចូលរួមចំណែកក្នុងកិច្ចខិតខំប្រឹងប្រែងរបស់រដ្ឋាភិបាលក្នុងការធានាសុវត្ថិភាពផ្លូវថ្នល់ តាមរយៈការជំរុញឱ្យអ្នកប្រើប្រាស់យានជំនិះទាំងអស់គោរពច្បាប់ចរាចរណ៍។
សេចក្តីប្រកាសបញ្ជាក់ថា៖ «យុទ្ធនាការបើកបរដោយសុវត្ថិភាពនេះគឺធ្វើឡើងដើម្បីដាស់តឿនដល់អ្នកបើកបរ និងអ្នកបើកបរថា ការគោរពច្បាប់ចរាចរណ៍នឹងជួយសន្សំសំចៃដល់ពួកគេ ខណៈការបំពានអាចបណ្តាលឱ្យបាត់បង់ជីវិត»។
អង្គការ SIPAR បានឲ្យដឹងថា គ្រោះថ្នាក់ចរាចរណ៍នៅតែជាមូលហេតុនាំមុខគេ នៃការស្លាប់ និងរបួសនៅក្នុងប្រទេសកម្ពុជា ខណៈគិតចាប់ពីខែមករា ដល់ខែកញ្ញា ឆ្នាំ ២០២១ ដែលមានគ្រោះថ្នាក់ចរាចរណ៍ចំនួន ១ ៨៨៨ ករណី ក្នុងនោះ ១ ០៥៨ នាក់បានស្លាប់។
«ដោយសារបញ្ហាសេដ្ឋកិច្ចនៃជំងឺរាតត្បាតកូវីដ ១៩ នៅតែមានឥទ្ធិពល បញ្ហាចរាចរណ៍របស់កម្ពុជា គឺជាបន្ទុកបន្ថែមសម្រាប់ប្រទេសជាតិ។ ចាប់តាំងពីឆ្នាំ ២០២០ មក គណៈកម្មាធិការជាតិសុវត្ថិភាពចរាចរណ៍ផ្លូវគោកបាននិងកំពុងពង្រឹងការអនុវត្តច្បាប់ចរាចរណ៍ផ្លូវគោករបស់កម្ពុជាក្នុងកិច្ចខិតខំប្រឹងប្រែងកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍»។
អង្គការនេះរំពឹងថា យុទ្ធនាការនេះនឹងចូលរួមលើកកម្ពស់ការយល់ដឹង និងការប្រកាន់ខ្ជាប់នូវច្បាប់ចរាចរណ៍ក្នុងអំឡុងពេល និងក្រោយជំងឺកូវីដ ១៩ ខណៈយុទ្ធនាការបើកបរប្រកបដោយសុវត្ថិភាពលើកទី ៥ របស់បណ្តាដៃគូនានានឹងរៀបចំសកម្មភាពផ្សេងៗពេញ ១ សប្តាហ៍។
សូមជម្រាបថា ជាមួយនឹងយុទ្ធនាការនេះ បណ្តាដៃគូរនានាបានអនុវត្តសកម្មភាពជាច្រើនតាមរយៈព្រឹត្តិការណ៍នានាតាមគោលដៅ និងតាមរយៈអនឡាញ ខណៈសកម្មភាពចូលរួមមានជាកម្រងសំណួរ និងការលេងហ្គេមពាក់ព័ន្ធនឹងចំណេះដឹងស្តីពីចរាចរណ៍ផ្លូវគោករបស់កម្ពុជា។
លោក សុខ ទិវ័ន្ត អ្នកបើកបរម្នាក់ ដែលបានចូលរួមក្នុងយុទ្ធនាការនេះថ្លែងថា ការបង្កើតព្រឹត្តិការណ៍ទាំងនេះគឺបានចូលរួមឱ្យពលរដ្ឋកាន់តែមានការចង់ដឹងចង់ឮបន្ថែមទៀតអំពីច្បាប់ ដែលពួកគេមិនទាន់មានការយល់ដឹង។ លោកចង់ឱ្យស្ថាប័នពាក់ព័ន្ធចូលរួមបង្កើតយុទ្ធនាការ និងកម្មវិធីបែបនេះឱ្យបានធំទូលាយជាងនេះ ដើម្បីងាយស្រួលឱ្យប្រជាពលរដ្ឋបានចូលរួម និងទទួលបានចំណេះដឹងស្តីពីច្បាប់ចរចារណ៍គ្រប់ទីកន្លែង។
លោកថា៖ «ពេលខ្ញុំចូលរួមឆ្លើយសំណួរនេះ ពេលខ្ញុំមិនដឹងកន្លែងណា វាធ្វើឱ្យខ្ញុំកាន់តែចង់ដឹង ពីច្បាប់ហ្នឹងបន្ថែមទៀតដូចអ្នកបើកបរខ្លះគាត់ស្គាល់ស្លាកសញ្ញាតិចទេ គាត់អាចស្គាល់មិនអស់ ពេលមានយុទ្ធនាការបែបនេះធ្វើឱ្យគាត់ចង់ដឹងបន្ថែម»៕