ភ្នំពេញៈ ប្រទេសកម្ពុជាប្រឈមនឹងភាពងាយរងគ្រោះខ្លាំងពាក់ព័ន្ធនឹងគ្រោះមហន្តរាយដោយស្ថិតនៅចំណាត់ថ្នាក់ទី៤ នៃប្រទេសក្នុងតំបន់អាស៊ីដែលស្ថិតនៅក្នុងប្រភេទមានហានិភ័យខ្ពស់បំផុត និងទី១៥ នៅទូទាំងពិភពលោក។ យោងតាមសេចក្ដីថ្លែងការណ៍រួមការប្រែប្រួលអាកាសធាតុនៅក្នុងសន្និសីទភាគីចូលរួមអនុសញ្ញាក្របខ័ណ្ឌរបស់អង្គការសហប្រជាជាតិស្ដីពីការប្រែប្រួលអាកាសធាតុលើកទី ២៦។
សេចក្ដីថ្លែងការណ៍រួមនេះបានឱ្យដឹងថា៖ «ទឹកជំនន់ គ្រោះរាំងស្ងួត និងខ្យល់ព្យុះ សុទ្ធតែជាមូលហេតុចម្បងនៃគ្រោះមហន្តរាយនៅក្នុងប្រទេសកម្ពុជា ដែលទឹកជំនន់បង្កឡើងដោយព្យុះ និងភ្លៀងធ្លាក់ខ្លាំងគឺជាទម្រង់គ្រោះមហន្តរាយទូទៅបំផុតដែលប្រទេសនេះជួបប្រទះជាប្រចាំពោលគឺ ៦៥ ភាគរយនៃគ្រោះមហន្តរាយដែលប៉ះពាល់ដល់ប្រទេសជាតិ»។
សេចក្ដីថ្លែងការណ៍រួមនេះបង្ហាញឱ្យដឹងថា ក្នុងឆ្នាំ ២០២០ ទឹកជំនន់ បានប៉ះពាល់ដល់ជីវភាពរស់នៅរបស់ប្រជាពលរដ្ឋជាង ១ សែន ៧ ម៉ឺន ៥ ពាន់គ្រួសារ នៅទូទាំង ១៤ ខេត្ត ដែលតំបន់ទាំងនោះត្រូវការនូវជំនួយស្បៀងអាហារ។
សេចក្តីថ្លែងការណ៍រួមរបស់ក្រុមធ្វើសកម្មភាពរួមកាត់បន្ថយហានិភ័យគ្រោះមហន្តរាយនៃអង្គការសង្គមស៊ីវិលដែលធ្វើការរួមគ្នា ដើម្បីពង្រឹងភាពធន់នឹងគ្រោះមហន្តរាយនៅកម្ពុជាបានចេញផ្សាយនៅថ្ងៃទី ១១ វិច្ឆិកាថា៖ «យើងបានសង្កេតយ៉ាងដិតដល់ទៅលើបញ្ហាទាក់ទងនឹងការប្រែប្រួលអាកាសធាតុ និងផលប៉ះពាល់របស់វាទៅលើសហគមន៍ ដែលងាយរងគ្រោះបំផុត រួមមានគ្រួសារក្រីក្រ អ្នកមានពិការភាព ជនជាតិដើមភាគតិច និងកុមារ។
យើងទទួលស្គាល់ថា បច្ចុប្បន្នភាពការចូលរួមចំណែកដើម្បីអនុវត្តអនុសញ្ញាក្របខ័ណ្ឌសហប្រជាជាតិ ស្ដីពីការប្រែប្រួលអាកាសធាតុ» របស់រាជរដ្ឋាភិបាលកម្ពុជាបានបង្ហាញពីការប្តេជ្ញាចិត្ត និងតម្រូវការរបស់ខ្លួន សម្រាប់ទសវត្សរ៍ក្រោយ ដើម្បីសម្រេចបាននូវចក្ខុវិស័យនៃសង្គម ដែលមានភាពធន់ និងកាបូនទាប»។
ក្រៅពីបង្ហាញក្តីខ្វល់ខ្វាយក្រុមធ្វើសកម្មភាពរួមកាត់បន្ថយហានិភ័យគ្រោះមហន្តរាយទាំងនោះក៏ស្នើឱ្យរដ្ឋាភិបាលធានាបាននូវការកៀរគរធនធាន ប្រកបដោយប្រសិទ្ធភាព តម្លាភាព និងនិរន្តរភាព និងការរក្សាគណនេយ្យភាព ដោយការបែងចែកមូលនិធិ សម្រាប់ទូទាត់ការខូចខាត និងសំណង ការពង្រឹងគំរូអាជីវកម្មប្រកបដោយក្រមសីលធម៌ ដែលផ្តោតលើការប្រែប្រួលអាកាសធាតុ និងបញ្ហាកាត់បន្ថយហានិភ័យនៃគ្រោះមហន្តរាយ ព្រមទាំងគាំទ្រទៅលើការសិក្សាដែលផ្អែកលើភ័ស្តុតាង ស្តីពីផលប៉ះពាល់អាកាសធាតុនៅក្នុងប្រទេសផងដែរ។ នេះបើតាមសេចក្តីថ្លែងការណ៍រួម។
លោក រស់ ចាន់បូរិទ្ធិ តំណាងអង្គការ Save the Children ប្រចាំប្រទេសកម្ពុជាបានថ្លែងថាក្រៅពីនេះរដ្ឋាភិបាល និងស្ថាប័នពាក់ព័ន្ធក៏ត្រូវធានាថា គោលនយោបាយសកលត្រូវបានផ្តោតលើសហគមន៍ រួមទាំងរង្វាន់ឥណទានកាបូន សម្រាប់ការអភិរក្សព្រៃឈើ និងការដាំដើមឈើឡើងវិញ ដោយគិតគូរដល់ជីវភាពរស់នៅរបស់សហគមន៍ និងហានិភ័យដែលប្រឈមនឹងវិបត្តិអាកាសធាតុ ក៏ដូចជាការលើកកម្ពស់បច្ចេកវិទ្យា ដែលមានតម្លៃទាប និងអាចប្រើប្រាស់បាន ដើម្បីកាត់បន្ថយវិបត្តិអាកាសធាតុ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានអះអាងថា ក្នុងនាមតំណាងឱ្យរដ្ឋាភិបាលកម្ពុជា បានប្រកាសយ៉ាងច្បាស់ហើយថា កម្ពុជាមិនបោះបង់ការទទួលខុសត្រូវរួមរបស់ខ្លួនចំពោះសកម្មភាពអាកាសធាតុទេ។
ថ្លែងក្នុងកិច្ចប្រជុំកំពូលលើកទី ២៦ នៃបណ្តាភាគីអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ (COP26) នៅទីក្រុងក្លាសហ្គោ ចក្រភពអង់គ្លេសកាលពីព្រឹកថ្ងៃទី ១០ ខែវិច្ឆិកា លោក សាយ សំអាល់ រដ្ឋមន្ត្រីក្រសួងបរិស្ថាន ថ្លែងថា៖ «ការប្រែប្រួលអាកាសធាតុក៏ដូចជាជំងឺរាតត្បាតសកលផងដែរមិនបញ្ឈប់ត្រឹមព្រំដែនរបស់យើងទេ ហើយវត្តមានរបស់យើងនៅទីនេះជាសញ្ញាដែលធានាថាក្នុងនាមជាមេដឹកនាំពិភពលោក យើងមិនបោះបង់ការទទួលខុសត្រូវរួមរបស់យើងចំពោះសកម្មភាពអាកាសធាតុទេ»៕
វីដេអូ៖