.jpg)
ការដាក់សំរាមនៅមុខកាស៊ីណូវ៉ាន់ឆាវពីថ្ងៃ ១១ វិច្ឆិកា។ រូប រដ្ឋបាលខេត្តព្រះសីហនុ
ព្រះសីហនុៈ រដ្ឋបាលខេត្តព្រះសីហនុបានព្រមានដល់ម្ចាស់កាស៊ីណូមួយឈ្មោះថា វ៉ាន់ឆាវ ករណីយកកាកសំណល់ផ្ទះបាយជាច្រើនមកដាក់លើចំណីផ្លូវខុសពេលវេលាបញ្ចេញសំរាមរបស់ក្រុមហ៊ុនសំរាម KSWM ធ្វើឱ្យប៉ះពាល់សោភណភាព សណ្តាប់ធ្នាប់ និងបានបង្កឱ្យមានខ្លាញ់ហៀរហូរប្រឡាក់ពេញលើការ៉ូឡា។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែវិច្ឆិកាថា ករណីនេះត្រូវបានក្រុមការងារចម្រុះខេត្តចុះទៅត្រួតពិនិត្យនៅកាស៊ីណូនេះពីថ្ងៃទី ១០ ខែវិច្ឆិកា ដែលមានទីតាំងតាមបណ្តោយផ្លូវលេខ ១០០ (វិថីឯករាជ្យ) ភូមិ ៤ សង្កាត់លេខ ៤ ក្រុងព្រះសីហនុ ហើយបានរកឃើញមានការបញ្ចេញសំរាម និងសំណល់ផ្ទះបាយខុសពេល ដែលផ្ទុយពីការណែនាំរបស់អាជ្ញាធរ និងក្រុមហ៊ុនប្រមូលសំរាម KSWM។
លោកបន្តថា អ្នកទទួលខុសត្រូវកាស៊ីណូនេះមិនបានវេចខ្ចប់សំរាមឱ្យបានត្រឹមត្រូវទេ បណ្តាលឱ្យហៀរទឹកប្រឡាក់ពេញផ្លូវថ្មើរជើង (កម្រាលថ្មក្រានីត) ប៉ះពាល់ដល់ការធ្វើដំណើររបស់ពលរដ្ឋ សណ្តាប់ធ្នាប់សាធារណៈ បរិស្ថាន និងសោភណភាពទីក្រុងជាខ្លាំង។
លោកបានឱ្យដឹងដែរថា ករណីនេះ ក្រុមការងារចម្រុះបានណែនាំដល់ម្ចាស់កាស៊ីណូឱ្យប្រមូលកាកសំណល់ទាំងនោះទៅទុកដាក់ និងវេចខ្ចប់ឱ្យបានត្រឹមត្រូវ ហើយបានតម្រូវឱ្យលាងសម្អាតកម្រាលថ្មក្រានីតឱ្យស្អាតឡើងវិញ ព្រមទាំងបានអប់រំឱ្យបញ្ចេញសំរាមទៅតាមម៉ោងដែលអាជ្ញាធរ និងក្រុមហ៊ុនប្រមូលសំរាមបានកំណត់។
លោកបញ្ជាក់ថា៖ «ករណីម្ចាស់កាស៊ីណូខាងលើមិនព្រមធ្វើតាមការណែនាំ នោះក្រុមការងារនឹងអនុវត្តវិធានការរដ្ឋបាល ព្រមទាំងធ្វើការផាកពិន័យដោយគ្មានការលើកលែងឡើយ»។
បើតាមលោក ឃាង ភារម្យ ទាំងអ្នកបញ្ចេញសំរាមខុសពេល និងក្រុមហ៊ុនដែលមិនទៅប្រមូលសំរាមតាមការកំណត់គឺត្រូវរងនូវការពិន័យដូចគ្នាទៅតាមអនុក្រឹត្យលេខ ១១៣ ស្តីពីការគ្រប់គ្រងសំរាមសំណល់រឹងនៅក្នុងទីប្រជុំជន។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) ប្រចាំខេត្តព្រះសីហនុបានឱ្យដឹងថា បច្ចុប្បន្ននេះ ការទុកដាក់សំរាម និងការដឹកជញ្ជូនសំរាមនៅក្រុងព្រះសីហនុមានភាពប្រសើរជាងមុន ប៉ុន្តែទាំងអាជ្ញាធរទាំងក្រុមហ៊ុន និងពលរដ្ឋត្រូវខិតខំធ្វើឱ្យល្អបន្ថែមទៀត ព្រោះសេវាសំរាម គឺជាបរិស្ថាន និងសោភណភាព។
លោកបន្តថា ប្រសិនបើទុកសំរាមឱ្យកាន់តែយូរដោយមិនមានការយកចេញវានឹងធ្វើឱ្យប៉ះពាល់សុខភាពពលរដ្ឋ ក៏ដូចភ្ញៀវទេសចរទូទៅដែលមកកម្សាន្តនៅខេត្តមាត់សមុទ្រមួយនេះ និងប៉ះពាល់ដល់ជីវភាពរស់នៅរបស់ពលរដ្ឋផងដែរ។
លោកថ្លែងថា៖ «អ៊ីចឹងបានថា បញ្ហាបរិស្ថានគឺអ្វីៗដែលស្ថិតនៅជុំវិញខ្លួនយើងឱ្យស្រស់បំព្រងឱ្យបរិស្ថានល្អ ទើបមានសុខភាពល្អ ហើយជីវភាពគ្រួសារនៅក្នុងសង្គមមានការរីកចម្រើន តែបើកាលណាអ្វីៗនៅជុំវិញខ្លួនយើង អួអាប់ វាអួអាប់តាមហ្នឹងហើយ»។
បើតាមលោក សុខ សុខុម បច្ចុប្បន្ននេះ អាជ្ញាធរបានរៀបចំឱ្យមានការប្រមូលសំរាមចេញពីហាងពីគេហដ្ឋាន និងពីកាសីណូតាមពេលវេលាដែលបានកំណត់ និងរថយន្តដឹកសំរាមម៉ោងណាទៅយកនៅទីតាំងណាក៏ត្រូវបានកំណត់ត្រឹមត្រូវផងដែរ។
យ៉ាងណាក្ដីលោកថា មានម្ចាស់ផ្ទះ និងហាងមួយចំនួនតូចនៅតែល្មើសដោយមិនបានអនុវត្តត្រឹមត្រូវតាមពេលវេលាឡើយ។
ជាមួយគ្នានេះ រថយន្តដឹកសំរាមក៏មានការខកខាន និងយឺតពេលមកប្រមូលសំរាមឱ្យបានទាន់ពេលខ្លះដែរ ជាហេតុធ្វើឱ្យសំរាមពេលខ្លះមានក្លិនស្អុយ ជាពិសេសគឺគ្រឿងសមុទ្រ វាឆាប់ធុំក្លិនណាស់ ហើយវាប៉ះពាល់បរិស្ថាន និងសណ្តាប់ធ្នាប់សាធារណៈទៀតផង។
ជុំវិញករណីនេះ ភ្នំពេញ ប៉ុស្ដិ៍ មិនអាចទាក់ទងអ្នកទទួលខុសត្រូវកាស៊ីណូ វ៉ាន់ឆាវ ដើម្បីសុំការបំភ្លឺបានឡើយ កាលពីថ្ងៃទី ១១ វិច្ឆិកា៕
