កណ្ដាលៈ អាជ្ញាធរខេត្តកណ្តាលបានសម្រេចបិទអាជីវកម្មជីករណ្ដៅដី ចំនួន ៣ កន្លែងក្នុងស្រុកកណ្ដាលស្ទឹង បន្ទាប់ពីរកឃើញថាបានធ្វើឡើងដោយគ្មានច្បាប់អនុញ្ញាត និងខុសពីលក្ខខណ្ឌ និងបទដ្ឋានបច្ចេកទេសដែលបានកំណត់ដោយច្បាប់។
លោក ណុប ដារ៉ា អភិបាលរងខេត្តកណ្ដាលបានប្រាប់ភ្នំពេញប៉ុស្តិ៍នៅថ្ងៃទី ១១ ខែវិច្ឆិកា ឆ្នាំ ២០២១ ថា ក្រុមគណៈកម្មការចម្រុះ ខេត្តកណ្ដាលកាលពីថ្ងៃទី ១០ ខែវិច្ឆិកា ឆ្នាំ ២០២១ បានចុះត្រួតពិនិត្យ និងអនុវត្តច្បាប់ចំពោះអាជីវកម្មជីកដី និងដឹកជញ្ជូនដី និងខ្សាច់ពុំមានច្បាប់អនុញ្ញាត និងខុសបច្ចេកទេស ដែលបានណែនាំដោយអាជ្ញាធរជំនាញ។
លោកបញ្ជាក់ថា៖ «នៅក្នុងនោះក្រុមគណៈកម្មការចម្រុះយើងបានសម្រេចបិទអាជីវកម្មការដ្ឋានជីករណ្ដៅដីចំនួន ៣ កន្លែងក្នុងស្រុកកណ្ដាលស្ទឹងជាបណ្ដោះអាសន្ន ក្នុងនោះ ១ កន្លែងគ្មានច្បាប់អនុញ្ញាត និង ២ កន្លែងទៀតបានអនុវត្ត ឬធ្វើសកម្មភាពខុសបទដ្ខានបច្ចេកទេសដែលបានកំណត់នៅក្នុងអាជ្ញាប័ណ្ណអាជីវកម្ម»។
លោក ដារ៉ា ថ្លែងថា ម្ចាស់អាជីវកម្មជីកអាចម៍ដីនៅចំណុចភូមិត្រោះ ឃុំទ្រា ស្រុកកណ្ដាលស្ទឹង ខេត្តកណ្ដាល ដែលត្រូវបានគេស្គាល់ជាទូទៅថាឈ្មោះ «តា ម៉ាប់»ពុំមានច្បាប់អនុញ្ញាតនោះទេ ខណៈឈ្មោះ រ៉ុង រ៉ា និងឈ្មោះ គង់ គៀង ដែលមានអាជ្ញាប័ណ្ណអាជីវកម្មជីកកាយលក់អាចម៍ដីនៅក្នុងស្រុកនេះ ដែលចេញដោយមន្ទីររ៉ែ និងថាមពលខេត្តកណ្ដាលត្រូវបានរកឃើញថា បានប្រព្រឹត្តល្មើសទៅនឹងច្បាប់អនុញ្ញាត។
ម្ចាស់ការដ្ឋានអាជីវកម្មជីកលក់អាចម៍ដី ឈ្មោះ រ៉ុង រ៉ា និងឈ្មោះ គង់ គៀង មានអាជ្ញាប័ណ្ណអាជីវកម្មជីកកាយលក់អាចម៍ដីនៅចំណុចភូមិថ្មី និងភូមិក្រាំងតី ឃុំថ្មី ស្រុកកណ្ដាលស្ទឹង ក្នុងទំហំផ្ទៃដីត្រឹមតែ ១ ហិកតាប៉ុណ្ណោះ ប៉ុន្តែម្ចាស់អាជីវកម្មជីកកាយរណ្ដៅដីទាំង ២ នេះបានធ្វើសកម្មភាពជីកកាយអាចម៍ដីរហូតដល់ ៣ ហិកតា លើសពីការកំណត់នៃច្បាប់។ ជុំវិញករណីនេះ ម្ចាស់អាជីវកម្មរណ្ដៅដីទាំង ៣ ទីតាំង មិនអាចទាក់ទងស្នើសុំការបំភ្លឺ ឬអត្ថាធិប្បាយបានទេកាលពីថ្ងៃទី ១១ ខែវិច្ឆិកា ឆ្នាំ ២០២១។
លោក អ៊ូច សារឿន អភិបាលស្រុកកណ្ដាលស្ទឹងបានប្រាប់ភ្នំពេញប៉ុស្តិ៍ថា ការពិតម្ចាស់អាជីវកម្មរណ្ដៅដី ឈ្មោះ «តាម៉ាប់» នោះ គាត់បានដាក់សំណើធ្វើអាជីវកម្មជីកកាយអាចម៍ដីទៅមន្ទីររ៉ែ និងថាមពលរួចហើយ ប៉ុន្តែនៅមិនទាន់ធ្លាក់អាជ្ញាប័ណ្ណ។ ទោះយ៉ាងណាក៏ដោយ សកម្មភាពរបស់គាត់ កន្លងមកនេះជាអំពើល្មើសទៅនឹងច្បាប់អាជីវកម្ម ដែលបានកំណត់ដោយច្បាប់។
ចំណែកម្ចាស់អាជីវកម្មរណ្ដៅដីចំនួន ២ នាក់ទៀត ក៏បានប្រព្រឹត្តល្មើសទៅនឹងច្បាប់អាជីវកម្មផងដែរ បើទោះជាពួកគាត់មានអាជ្ញាប័ណ្ណក៏ដោយ ព្រោះពួកគាត់បានធ្វើអាជីវកម្មលើសពីការកំណត់នៃអាជ្ញាប័ណ្ណ។ សមត្ថកិច្ចជំនាញបានសម្រេចបិទអាជីវកម្មរបស់ពួកគាត់ជាបណ្ដោះអាសន្ន និងបានណែនាំឱ្យពួកគាត់ទៅបង់ប្រាក់ផាកពិន័យទៅតាមការកំណត់នៃច្បាប់ និងទៅសុំច្បាប់អនុញ្ញាតធ្វើអាជីវកម្មដល់មន្ទីរ និងក្រសួងជំនាញឱ្យបានត្រឹមត្រូវតាមនីតិវិធីនៃច្បាប់ មុនពេលបន្តសកម្មភាពអាជីវកម្មរបស់ខ្លួនឡើងវិញ។
លោកថា៖ «ក្រោយពីមានការធ្វើប្រតិភូកម្មអំណាចមកថ្នាក់មូលដ្ឋាន រដ្ឋបាលស្រុកកណ្ដាលស្ទឹងយើងបានលើកទឹកចិត្តដល់ម្ចាស់អាជីវកម្មឱ្យប្រកបនូវរបរសុចរិត គឺមានច្បាប់អនុញ្ញាតត្រឹមត្រូវ និងគោរពតាមបទដ្ឋានបច្ចេកទេស ដែលបានកំណត់ដោយច្បាប់។ ចំពោះអាជីវកម្មជីកលក់អាចម៍ដីទាំង ៣ កន្លែង ដែលគណៈកម្មការចម្រុះខេត្តបានរកឃើញកំហុសនាពេលថ្មីៗនេះ រដ្ឋបាលស្រុកកណ្ដាលស្ទឹងយើងបានណែនាំឱ្យពួកគាត់ទៅបង់ការផាកពិន័យអន្តរកាលជាសួយសាររ៉ែចូលរដ្ឋឱ្យបានត្រឹមត្រូវមុនពេលបន្តអាជីវកម្មរបស់ខ្លួនឡើងវិញ»។
លោក ជា សារិទ្ធ ប្រធានមន្ទីររ៉ែ និងថាមពលខេត្តកណ្ដាលថ្លែងថា ម្ចាស់អាជីវកម្មជីកកាយ លក់អាចម៍ដីទាំង ៣ ទីតាំងនោះត្រូវជាប់ពិន័យអន្តរកាលតាមមាត្រា ៣៥ និងមាត្រា ៣៦ នៃច្បាប់ស្ដីពីការគ្រប់គ្រង និងការធ្វើអាជីវកម្មធនធានរ៉ែ។ ម្ចាស់អាជីវកម្មរណ្ដៅដីទាំង ៣ ទីតាំងនោះបានទទួលស្គាល់ និងយល់ព្រមនឹងបង់ការផាកពិន័យអន្តរកាលជាសួយសារនៃអាជីវកម្មនោះតាមមាត្រា ៣៥ និងមាត្រា ៣៦ នៃច្បាប់នេះ៕