បាត់ដំបងៈ អាជ្ញាធរស្រុកឯកភ្នំ ខេត្តបាត់ដំបងបានព្រមានចាត់វិធានការតាមផ្លូវច្បាប់ដោយគ្មានការលើកលែងចំពោះបុគ្គលទាំងឡាយណា ដែលលបលួចចូលទៅនេសាទត្រីក្នុងទីតាំងតំបន់អភិរក្សសត្វស្លាបទឹកនៃតំបន់រ៉ាមសារព្រែកទាល់។
លោក ម៉ិល សុផល អភិបាលស្រុកឯកភ្នំបានប្រាប់ ភ្នំពេញ ប៉ុស្តិ៍ថា កាលពី ៣ ថ្ងៃមុនលោកបានដឹកនាំកម្លាំងបញ្ជាការឯកភាពចុះបង្ក្រាបបទល្មើសនេសាទខុសច្បាប់ជាច្រើនករណីដោយបានកាប់បំផ្លាញចោលនូវឧបករណ៍នេសាទមួយចំនួនធំ ដែលត្រូវបានគេលួចបង្កប់ចោលនៅក្នុងទឹក ក្នុងតំបន់ដែនអភិរក្សសត្វស្លាបទឹកនៃតំបន់រ៉ាមសារព្រែកទាល់។
លោកបានបន្តថា ការនេសាទត្រីក្នុងតំបន់ដែនអភិរក្សសត្វស្លាបទឹកមិនត្រឹមធ្វើឱ្យបាត់បង់ពូជត្រីប៉ុណ្ណោះទេ ថែមទាំងបាត់បង់នូវជីវចម្រុះ និងធ្វើឱ្យចំនួនសត្វស្លាបទឹកក្នុងតំបន់រ៉ាមសារព្រែកទាល់ដ៏ធំចុងក្រោយក្នុងអាស៊ីអាគ្នេយ៍មួយនេះថយចុះផងដែរ។
លោកបានបញ្ជាក់ថា៖ «គ្មានត្រី គ្មានសត្វស្លាបទឹក គ្មានភ្ញៀវទេសចរ ពលរដ្ឋបាត់បង់ចំណូល ដូច្នេះយើងត្រូវរួមគ្នាការពារ និងអភិរក្សតំបន់អភិរក្សសត្វស្លាបទឹកនេះឱ្យបាន ដោយរួមគ្នាបង្ការទប់ស្កាត់ និងបង្ក្រាបនូវរាល់បទល្មើសគ្រប់ទម្រង់ពិសេសបទល្មើសនេសាទ និងការកាប់រានដីព្រៃលិចទឹកក្នុងតំបន់នេះ»។
បើតាមលោក សុផល ក្រៅពីការរកឃើញ និងបំផ្លាញចោលនូវឧបករណ៍នេសាទនៅក្នុងតំបន់នេះ ក្រុមការងាររបស់លោកក៏បានរកឃើញទីតាំងនេសាទដែលប្រើឧបករណ៍ល្មើសច្បាប់ចំនួន ១៦ កន្លែងផងដែរ ប៉ុន្តែដោយសារទីតាំងទាំងនោះស្ថិតនៅខាងក្រៅតំបន់អភិរក្ស លោកបានផ្ដល់ឱកាសដល់ប្រជានេសាទទាំងនោះរុះរើដោយខ្លួនឯងឱ្យហើយរួចរាល់ក្នុងរយៈពេល ៣ ថ្ងៃ។
លោកបានបញ្ជាក់ទៀតថា៖ «គិតត្រឹមថ្ងៃទី ១០ ខែវិច្ឆិកា គឺគ្រប់ ៣ ថ្ងៃហើយ អ៊ីចឹងទេនៅពេលក្រុមការងារយើងចុះទៅពិនិត្យហើយរកឃើញនៅមិនទាន់រុះរើនោះគឺយើងនឹងកាប់បំផ្លាញចោលនូវឧបករណ៍នេសាទទាំងនោះ ហើយកសាងសំណុំរឿងបញ្ជូនទៅតុលាការតែម្ដង»។
លោកបានបន្ថែមថា នៅថ្ងៃទី ១០ ខែវិច្ឆិកាឆ្នាំនេះ មន្ត្រីបរិស្ថានក្នុងតំបន់រ៉ាមសារព្រែកទាល់បានរាយការណ៍ថា ហ្វូងសត្វស្លាបទឹកជាច្រើនបានបំផ្លាស់ទីពីតំបន់ផ្សេងៗមកកាន់តំបន់ព្រែកទាល់ក្នុងនោះក៏មានសត្វត្រដក់ធំផងដែរ។ យ៉ាងណាក្ដី គេនៅមិនទាន់ដឹងអំពីចំនួនសត្វស្លាបទឹកទាំងនោះមានការថយចុះ ឬកើនឡើងនៅឡើយទេ ដោយសារតែពួកវាទើបតែចាប់ផ្ដើមបំផ្លាស់ទីមកដល់ជាបណ្ដើរៗ។
ទន្ទឹមនឹងនេះ លោក ជួង សុភា នាយខណ្ឌរដ្ឋបាលជលផលបាត់ដំបងបានប្រាប់ភ្នំពេញ-ប៉ុស្តិ៍ថាដើម្បីបង្កើនបរិមាណត្រីទឹកសាបឱ្យសម្បូរឡើងវិញ ការងារបង្ក្រាបបទល្មើសជលផលដែលរាប់បញ្ចូលទាំងបទល្មើសនេសាទ និងបទល្មើសកាប់រុករាន និងដុតបំផ្លាញព្រៃលិចទឹកត្រូវបានរឹតបន្តឹង និងចុះអនុវត្តបង្ក្រាបជាប្រចាំដោយគ្មានការលើកលែង។
លោកថ្លែងថា៖ «ដើម្បីបង្ក្រាបបទល្មើសជលផលឱ្យមានប្រសិទ្ធភាពគឺត្រូវធ្វើឡើងឱ្យមានតម្លាភាព និងដោយគ្មានការលើកលែង ជាពិសេសមន្ត្រីដែលជាប់ពាក់ព័ន្ធក្នុងបទល្មើស។ ប្រការនេះយើងបានណែនាំក្រើនរំឭកដល់មន្ត្រីយើងរួចរាល់ហើយ និងបានព្រមានផងដែរថានឹងកសាងសំណុំរឿងទៅតុលាការប្រសិនបើរកឃើញមានពាក់ព័ន្ធនឹងបទល្មើស»។
ជាមួយគ្នានេះ លោកបានអំពាវនាវសុំឱ្យពលរដ្ឋ ជាពិសេសប្រជានេសាទលក្ខណៈគ្រួសារចូលរួមសហការផ្តល់ព័ត៌មានពីបទល្មើសនេសាទ និងអ្នកប្រព្រឹត្តកាប់ទន្ទ្រានដុតបំផ្លាញព្រៃលិចទឹកក្នុងដែនត្រីពងយកធ្វើជាកម្មសិទ្ធិផ្ទាល់ខ្លួនដើម្បីសមត្ថកិច្ចជំនាញចុះចាត់វិធានការបង្ក្រាបបានទាន់ពេលវេលា។
ទាក់ទងនឹងការងារអភិរក្សធនធានជលផលនេះ លោក ជួង សុភា បានឱ្យដឹងថា ខណ្ឌរដ្ឋបាលជលផលបានទិញបង្គោលចំនួន ៦០ និងបានបោះបង្គោលកំណត់ខ្សែបន្ទាត់ព្រំដែនជម្រកមច្ឆជាតិពីចំណុចឃុំឫស្សីក្រាំងក្នុងស្រុកមោងឫស្សីរហូតដល់ឃុំព្រៃចាស់ស្រុកឯកភ្នំរួចរាល់ហើយនិងបន្តបោះបង្គោលបន្ថែមទៀតនៅឆ្នាំក្រោយ ដើម្បីភ្ជាប់ទៅដល់ស្រុកថ្មគោល។
ចំណែកលោក កត់ បូរ៉ាន់ ប្រធានមន្ទីរបរិស្ថានខេត្តបាត់ដំបងបានប្រាប់ ភ្នំពេញ ប៉ុស្តិ៍ថា ការពិតនៅក្នុងតំបន់អភិរក្សសត្វស្លាបទឹក ក្នុងតំបន់រ៉ាមសារព្រែកទាល់ មានករណីប្រជានេសាទលក្ខណៈគ្រួសារ លួចចូលមកនេសាទខ្លះដែរកាលពីកន្លងមក ប៉ុន្តែបច្ចុប្បន្ន ពុំមានទៀតទេ។
លោកថ្លែងថា៖ «ក្រុមមន្ត្រីអនុរក្សបរិស្ថានយើងប្រចាំតំបន់រ៉ាមសារព្រែកទាល់ បានចុះល្បាតស្ទើរតែរៀងរាល់ថ្ងៃ មិនមានករណីបទល្មើសនេសាទជាលក្ខណៈដុំកំភួនកើតឡើងនោះទេ តែការនេសាទលក្ខណៈគ្រួសារ ក្បែរតំបន់ដែនអភិរក្សពិតជានៅមានកើតឡើងខ្លះដែរ តែពួកគាត់ក៏មិនបានបំពានចូលក្នុងតំបន់ដែនអភិរក្សសត្វស្លាប យើងនោះដែរ»។
បើតាមលោក បូរ៉ាន់ ពេលនេះសត្វស្លាបទឹកជាច្រើនប្រភេទបានវិលត្រឡប់មករស់នៅ និងបន្តពូជក្នុងតំបន់រ៉ាមសារព្រែកទាល់ជាបន្តបន្ទាប់ ហើយប្រភេទត្រដក់ក៏បានកើនឡើងក្នុងរយៈពេល ២ ឆ្នាំជាប់គ្នាស្របពេលរដូវនេះសត្វប្រភេទនេះវាកំពុងបន្តកាច់សម្បុកបន្តពូជជាបន្តបន្ទាប់ផងដែរ៕
វីដេអូ៖