ភ្នំពេញៈ រដ្ឋមន្ត្រីក្រសួងមហាផ្ទៃចាត់ឱ្យមានការធ្វើអធិការកិច្ចប្រកបដោយការទទួលខុសត្រូវចំពោះបញ្ហាជនជាប់ឃុំរត់រួចពីពន្ធនាគារនៅខេត្តស្ទឹងត្រែង ក្រោយសមត្ថកិច្ចបានចាប់ខ្លួនជនជាប់ឃុំចំនួន ៥នាក់ ក្នុងចំណោម ៧នាក់ ដែលបានវាយទម្លុះជញ្ជាំងពន្ធនាគាររត់គេចខ្លួនកាលពីយប់ថ្ងៃទី៨ ខែវិច្ឆិកា មកវិញ។ នេះបើតាមហ្វេសប៊ុក លោក ស ខេង នៅព្រឹកនេះ។
លោក ស ខេង បានឱ្យដឹងតាមរយៈហ្វេសប៊ុកនៅព្រឹកនេះថា សមត្ថកិច្ចបានចាប់ខ្លួនជនជាប់ឃុំចំនួន ៥នាក់មកវិញហើយ ក្នុងចំណោមជនជាប់ឃុំចំនួន ៧នាក់ ដែលបានវាយទម្លុះជញ្ជាំងពន្ធនាគារលួចរត់គេចខ្លួនកាលពីយប់ថ្ងៃទី៨ ខែវិច្ឆិកា។ ជាមួយគ្នានោះ លោកបានចាត់ឱ្យមានការធ្វើអធិការកិច្ចប្រកបដោយការទទួលខុសត្រូវចំពោះបញ្ហាដែលបានកើតឡើងធ្វើឱ្យជនជាប់ឃុំរត់រួចពីពន្ធនាគារនៅខេត្តស្ទឹងត្រែង។
លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានឱ្យដឹងទៀតថា ជនជាប់ឃុំដែលសមត្ថកិច្ចចាប់បានមកវិញនោះគឺមានជនជាតិឡាវចំនួន ២នាក់ និងជនជាតិ ខ្មែរចំនួន ៣នាក់។ ដោយឡែក ទណ្ឌិត ២នាក់ជាជនជាតិឡាវដែលមានបទល្មើសគ្រឿងញៀន សមត្ថកិច្ចកំពុងតែស្វែងរកចាប់ខ្លួនមកវិញផងដែរ។
លោកថ្លែងថា៖«ជនរួមជាតិជាទីគោរព! អ្វីដែលខ្ញុំចង់បញ្ជាក់នៅពេលនេះគឺលទ្ធផលប្រតិបត្តិការនេះពិតជាកើតឡើងបានដោយសារតែមានការចូលរួមរបស់បងប្អូនប្រជាពលរដ្ឋយើង ដែលបានជួយស្រាវជ្រាវនិងរាយការណ៍ជូនសមត្ថកិច្ចឈានទៅដល់ការចាប់បានមកវិញនូវទណ្ឌិតដែលសុទ្ធតែជាឧក្រិដ្ឋជនគ្រឿងញៀនទាំងនេះ»។
បើតាមលោក ស ខេង លទ្ធផលនេះបានបង្ហាញថា គ្រប់សកម្មភាពសង្គមអាចសម្រេចបានដោយសារតែមានការចូលរួមរបស់ប្រជាពលរដ្ឋ ហើយវាជាមោទនភាពដែលលទ្ធផលនេះបានបង្ហាញថា បងប្អូនប្រជាពលរដ្ឋយើងពិតជាមានការយល់ដឹងនិងចូលរួមក្នុងគោលនយោបាយភូមិឃុំមានសុវត្ថិភាព ក៏ដូចជា ការថែររក្សាសន្តិសុខ សុវត្ថិភាពសង្គមផងដែរ។
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្ដែនូវការកោតសរសើរ ដល់សមត្ថកិច្ចពាក់ព័ន្ធទាំងអស់ដែលបានខ្នះខ្នែងធ្វើកិច្ចប្រតិបត្តិការប្រកបដោយវិជ្ជាជីវៈ និងស្មារតីទទួលខុសត្រូវខ្ពស់ និងបងប្អូនប្រជាពលរដ្ឋទាំងអស់ ដែលបានចូលរួមក្នុងប្រតិបត្តិការនេះហើយលោកសង្ឃឹមថា ការចាប់ខ្លួនទណ្ឌិត ២នាក់ទៀតនឹងសម្រេចបាននាពេលឆាប់ៗខាងមុខនេះ។
លោកថ្លែងថា៖ «ក្នុងឱកាសនេះ ខ្ញុំក៏សូមអំពាវនាវផងដែរ ដល់បងប្អូនជនរួមជាតិ គ្រប់មជ្ឈដ្ឋានសូមបន្តគាំទ្រនិងចូលរួមអនុវត្តគោលនយោបាយភូមិឃុំមានសុវត្ថិភាព ក៏ដូចជា ការគាំទ្រនិងចូលរួមបន្ត អនុវត្តតាម ពាក្យស្លោកជាតិប្រយុទ្ធប្រឆាំងគ្រឿងញៀន ៣កុំ ១រាយការណ៍ ទាំងអស់គ្នា ដើម្បីសុវត្ថិភាព និងភាពសុខសាន្តក្នុងសង្គមជាតិយើង»៕