.jpg)
ការលក់ដូរតាមដងផ្លូវរបស់ប្រជាពលរដ្ឋ។ ហេង ជីវ័ន
ភ្នំពេញៈ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) និងដៃគូពាក់ព័ន្ធ នឹងរួមគ្នាប្រារព្ធទិវាអ្នកលក់ដូរតាមដងផ្លូវអន្តរជាតិលើកទី៩ ដើម្បីចែករំលែកពីសារៈសំខាន់នៃអ្នកលក់ដូរតាមដងផ្លូវនៅក្នុងបរិយាបន្នសង្គម និងការរួមចំណែករបស់ពួកគេក្នុងការអភិវឌ្ឍសេដ្ឋកិច្ចជាតិ។
វេទិកានេះនឹងធ្វើឡើងនៅភោជនីយដ្ឋាន ទន្លេបាសាក់២ ថ្ងៃទី១៤ ខែវិច្ឆិកា ដែលមានអ្នកចូលរួមផ្ទាល់ប្រមាណ ៥០ នាក់ ដែលជាអ្នកលក់ដូរតាមផ្លូវ តំណាងមកពីវិស័យសេដ្ឋកិច្ចក្រៅប្រព័ន្ធ អង្គការសង្គមស៊ីវិល ដៃគូអភិវឌ្ឍ និងតំណាងក្រសួងពាក់ព័ន្ធ ព្រមទាំងមានអ្នកចូលរួមពីចម្ងាយ (Online) ចំនួនប្រមាណ ៣០០ នាក់ទៀត។
សេចក្តីប្រកាសព័ត៌មានរបស់ IDEA បានឱ្យដឹងថា វេទិកា “កិច្ចគាំពារសង្គមសម្រាប់អ្នកលក់ដូរតាមផ្លូវនៅកម្ពុជា” ត្រូវបានរៀបចំឡើងដើម្បីរំឭក និងទទួលស្គាល់សិទ្ធិអ្នកលក់ដូរតាមដងផ្លូវ ពិភាក្សាអំពីស្ថានភាព និងបញ្ហាជួបប្រទះរបស់ពួកគេ ព្រមទាំងចែករំលែកព័ត៌មាន និងបទពិសោធន៍ ស្តីពីគោលនយោបាយ និងការអនុវត្តកិច្ចគាំពារសង្គម។
សេចក្តីប្រកាសព័ត៌មានដដែលបញ្ជាក់ថា អ្នកលក់ដូរតាមដងផ្លូវ ជួបប្រទះបញ្ហាប្រឈមមួយចំនួនដូចជា គ្មានសុវត្ថិភាព គ្មានអនាម័យ គ្មានកិច្ចគាំពារសង្គម រងការបៀតបៀន និងការរើសអើងគ្រប់រូបភាព។ ក៏ប៉ុន្តែ ពួកគេពុំទាន់បានទទួលស្គាល់ និងចុះបញ្ជីក្នុងប្រព័ន្ធរបបសន្តិសុខសង្គមនៅឡើយ។ បន្ថែមពីនេះ ការរីករាលដាលនៃជំងឺរាតត្បាតសកលកូវីដ១៩ បានធ្វើឱ្យក្រុមអ្នកលក់ដូរតាមដងផ្លូវកាន់តែជួបការលំបាកបន្ថែមទៀត ហើយធ្វើឱ្យពួកគេកាន់តែងាយរងគ្រោះ ព្រមទាំងប្រឈមនឹងហានិភ័យ និងភាពមិនជាក់លាក់កាន់តែច្រើន។
លោក វន់ ពៅ ប្រធានសមាគម IDEA ថ្លែងថា ចាប់តាំងពីឆ្នាំ២០០៧ មក សមាគមរបស់លោក បានធ្វើសកម្មភាពជាច្រើនដើម្បីលើកកម្ពស់លក្ខខណ្ឌការងារទូទៅ រួមទាំងកិច្ចគាំពារសង្គមសម្រាប់អ្នកលក់ដូរតាមដងផ្លូវ ដើម្បីបញ្ចូលពួកគេទៅក្នុងគោលនយោបាយគាំពារសង្គម ក៏ដូចជាការជំរុញច្បាប់ស្តីរបបសន្តិសុខសង្គមដើម្បីពង្រីកវិសាលភាពក្នុងការគាំពារពួកគេក្នុងច្បាប់នេះផងដែរ។
លោកថា អ្នកលក់ដូរតាមដងផ្លូវ ក៏ត្រូវការកិច្ចគាំពារសង្គមពីច្បាប់នេះ ដើម្បីកម្ពុជាឈានទៅរកសង្គមមួយប្រកបដោយសមភាព និងសមធម៌។
លោកបានបន្ថែមថា៖ «បច្ចុប្បន្ន IDEA បាន និងកំពុងសម្របសម្រួល បណ្តុះបណ្តាល និងចងក្រងអ្នកលក់ដូរតាមដងផ្លូវ ក្នុងរាជធានីភ្នំពេញ និងបណ្តាខេត្តនានា បានចំនួន ២២ក្រុម ដើម្បីផ្តួចផ្តើមឱ្យមានការសន្ទនាសមស្របជាមួយស្ថាប័នរាជរដ្ឋាភិបាលពាក់ព័ន្ធមួយចំនួន ដើម្បីទទួលបានការទទួលស្គាល់កាន់តែច្រើនពីសិទ្ធិរបស់ពួកគេ ដើម្បីផ្តល់លទ្ធភាពដល់ពួកគេអាចទទួលបានកិច្ចគាំពារសង្គម និងលក្ខខណ្ឌរស់នៅសមរម្យ»។
លោកស្រី ភាណ សោភ័ណ នាយិកាអង្គការអុកស្វាម មានប្រសាសន៍ថា អ្នកលក់ដូរតាមផ្លូវចូលរួមយ៉ាងសកម្មក្នុងការលើកកម្ពស់សេដ្ឋកិច្ចគ្រួសារ និងសេដ្ឋកិច្ចជាតិ។ ពួកគាត់មានសិទ្ធិដូចកម្មករក្នុងវិស័យដទៃទៀតដែរ។ ការទទួលបាននូវរបបកិច្ចគាំពារសង្គម និងសុខុមាលភាពដែលរួមបញ្ចូលទាំងការធានាសុខភាព ការថែទាំកុមារ កិច្ចគាំពារមាតុភាព ការអប់រំ ការមានអនាម័យ និងសុវតិ្ថភាពនៅកន្លែងលក់ដូរ និងការទទួលបានសេវាហិរញ្ញវត្ថុ គឺជារឿងសំខាន់ខ្លាំងណាស់ ហើយដែលពួកគាត់គួរទទួលបានដូចកម្មករដទៃទៀតដែរ ជាពិសេសនៅក្នុងបរិបទកូវីដ១៩នេះ។
លោកស្រីបានបន្ថែមថា៖ «អង្គការ អុកស្វាម យល់ឃើញថា ដើម្បីឆ្លើយតបទៅនឹងតម្រូវការរបស់អ្នកលក់ដូរតាមផ្លូវឱ្យមានប្រសិទ្ធភាព ជាការចាំបាច់ដែលទាមទារបន្តឱ្យមានការគាំទ្រ ផ្តល់កិច្ចគាំពារសង្គម និងមានការសិក្សាស្រាវជ្រាវច្បាស់លាស់ អំពីតម្រូវការ និងស្ថានភាពជាក់លាក់របស់ពួកគាត់ ដើម្បីអភិវឌ្ឍទៅជាគោលនយោបាយដែលឆ្លុះបញ្ចាំង និងឆ្លើយតបនឹងតម្រូវការជាក់ស្តែងរបស់អ្នកលក់ដូរតាមផ្លូវ»៕
