.jpg)
លោក គួច ចំរើន អភិបាលខេត្តព្រះសីហនុ។ រូបថត សហការី
រដ្ឋបាលខេត្តព្រះសីហនុណែនាំឱ្យម្ចាស់រោងចក្រ សហគ្រាស ក្រុមហ៊ុន សណ្ឋាគារ កាស៊ីណូ និងមូលដ្ឋានអាជីវកម្មទាំងអស់ បញ្ចប់ការធ្វើចត្តាឡីស័ក ចំពោះបុគ្គលិក កម្មករ និយោជិត ដើម្បីចាប់ផ្តើមធ្វើការងារធម្មតា សំដៅបើកទទួលទេសចរវ៉ាក់សាំង សម្រាប់ការមកទស្សនាកម្សាន្ត នៅក្នុងក្រុងព្រះសីហនុ។
ការណែនាំនេះធ្វើឡើង បន្ទាប់ពីរាជរដ្ឋាភិបាលអនុញ្ញាតឱ្យបើកដំណើរការមុនគេក្នុងការទទួលទេសចរវ៉ាក់សាំង សម្រាប់ការមកទស្សនាកម្សាន្តនៅក្នុងក្រុងព្រះសីហនុ និងក្រុងកោះរ៉ុង។
យោងតាមលិខិតរបស់លោក គួច ចំរើន ប្រាប់ទៅម្ចាស់អាជីវកម្មទាំងអស់ ភ្នំពេញប៉ុស្តិ៍ទទួលបាននៅថ្ងៃនេះ បានឱ្យដឹងថា រដ្ឋបាលខេត្តព្រះសីហនុបានណែឱ្យម្ចាស់ ឬអ្នកគ្រប់គ្រងរោងចក្រ សហគ្រាស ក្រុមហ៊ុន សណ្ឋាគារ កាស៊ីណូ និងមូលដ្ឋានអាជីវកម្ម ទាំងអស់ត្រូវអនុញ្ញាតឱ្យបុគ្គលិក កម្មករ និយោជិតរបស់ខ្លួនអាចចេញចូលទីតាំងអាជីវកម្ម បានតាមការកំណត់ព្រមព្រៀងគ្នា ឬអាចចេញទៅសម្រាកនៅផ្ទះ ឬទីសំណាក់របស់ខ្លួនបាន នៅក្រោយពេលបញ្ចប់ម៉ោងការងារ។
លោកអភិបាលខេត្តបានលើកឡើងថា ម្ចាស់ ឬអ្នកគ្រប់គ្រងរោងចក្រ សហគ្រាស ក្រុមហ៊ុន សណ្ឋាគារ កាស៊ីណូ និងមូលដ្ឋានអាជីវកម្មទាំងអស់ត្រូវពង្រឹងការងារអនុវត្តវិធានការសុខាភិបាល និងវិធានការ ៣ការពារ ៣កុំ របស់លោកនាយករដ្ឋមន្ត្រី ឱ្យបានម៉ឺងម៉ាត់ ជាមួយបុគ្គលិក កម្មករ និងយោជិតរបស់ខ្លួន ក៏ដូចជាអ្នកមកទទួលសេវា។
លោក គួច ចំរើន បានឱ្យដឹងទៀតថា ម្ចាស់ ឬអ្នកគ្រប់គ្រងរោងចក្រ សហគ្រាស ក្រុមហ៊ុន សណ្ឋាគារកាស៊ីណូ និងមូលដ្ឋានអាជីវកម្មទាំងអស់ ត្រូវធានាថាបុគ្គលិក កម្មករ និងយោជិត និងភ្ញៀវចេញចូលទាំងអស់ ត្រូវតែពាក់ម៉ាស់ ត្រូវបានវាស់ម្តៅ ដើម្បីពិនិត្យសុខភាពជាបឋម មុនពេលចូលទៅកាន់ទីកន្លែងបំពេញការងារ ផ្តល់សេវា និងចូលទៅទទួលសេវា។
លោកថ្លែងថា៖ «ត្រូវរៀបចំឱ្យមាន ការស្គេន QR Code (stop covid-19) មានឧបករណ៍វាស់កម្តៅ ម៉ាស៊ីនបាញ់ថ្នាំសម្លាប់មេរោគ អាល់កុល ឬជែល សាប៊ូលាងសម្អាតដៃ»។ ជាមួយគ្នានោះ ត្រូវខិតខំអនុវត្តតាមវិធីស្តងដាអប្បបរមា SOP សម្រាប់ភ្ញៀវ និងកម្មករ បុគ្គលិក។ ម្ចាស់ ឬអ្នកគ្រប់គ្រង ទីតាំងត្រូវម្ចាស់ការ ចាត់ចែងយកវត្ថុសំណាក ដើម្បីវិភាគមេរោគកូវីដ ១៩ ដោយប្រើឧបករណ៍តេស្តរហ័សជាបន្ទាន់។
លោកថា ក្នុងករណីបានរកឃើញមានករណីឆ្លងជំងឺកូវីដ ១៩ ដល់បុគ្គលិក កម្មកររបស់ខ្លួនម្ចាស់ទីតាំងត្រូវរាយការណ៍ជូន អាជ្ញាធរមូលដ្ឋាន និងមន្ត្រីសុខាភិបាល ដែលនៅជិតបំផុត ដើម្បីចាត់បញ្ជូនអ្នកជំងឺទៅកាន់មន្ទីរព្យាបាលអ្នកជំងឺកូវីដ ១៩ ឬអនុញ្ញាតឱ្យអ្នកជំងឺទៅព្យាបាលនៅតាមផ្ទះ។
លោកអភិបាលខេត្តបញ្ជាក់ថា ក្រោយពេលបុគ្គលិក កម្មករ និយោជិត បានជាសះស្បើយពីជំងឺកូវីដ ១៩ ដោយមានការបញ្ជាក់ពីមន្ទីរសុខាភិបាលខេត្ត ត្រូវអនុញ្ញាតឱ្យគាត់ចូលបម្រើការងារនៅកន្លែងដើមវិញដោយគ្មានការរើសអើងឡើយ៕
វីដេអូ៖
