ពោធិ៍សាត់ៈ កម្លាំងសមត្ថកិច្ចនគរបាលខេត្តពោធិ៍សាត់ នៅថ្ងៃទី ១៣ ខែវិច្ឆិកានេះ បានឃាត់ខ្លួនជនសង្ស័យម្នាក់ដែលពាក់ព័ន្ធករណីសម្លាប់មន្ត្រីរដ្ឋបាលព្រៃឈើនៅឃុំប្រម៉ោយ ស្រុកវាលវែង ខេត្តពោធិ៍សាត់កាលពីថ្ងៃទី ៩ ខែវិច្ឆិកា។
សមត្ថកិច្ចបានឱ្យដឹងថា ជនសង្ស័យដែលត្រូវចាប់ខ្លួនគឺពាក់ព័ន្ធករណីប្លន់សម្លាប់ ដោយកាប់ចំនួន ៧ កាំបិតទៅលើបុរសម្នាក់ ដែលជាមន្ត្រីរដ្ឋបាលព្រៃឈើប្រម៉ោយ ស្រុកវាលវែង ខេត្តពោធិ៍សាត់ បណ្តាលឱ្យស្លាប់ក្នុងថ្លុកឈាម រួចយកសម្ភារមួយចំនួនធំ គេចខ្លួនបាត់ស្រមោល។
សមត្ថកិច្ចបានឱ្យដឹងទៀតថា ជនសង្ស័យបានយកកាំបិតផ្គាក់កាប់ទៅលើជនរងគ្រោះកាលពីថ្ងៃទី ៩ ខែវិច្ឆិកា ឆ្នាំ ២០២១ ចំក ថ្គាម ស្មាខាងឆ្វេង ចំនួន ៧ កាំបិត បណ្តាលឱ្យស្លាប់នៅហ្នឹងកន្លែង (ក្នុងបន្ទប់លើគ្រែ) នៅស្នាក់ការរដ្ឋបាលព្រៃឈើប្រម៉ោយ ត្រង់ចំណុចទួលគ្រួស ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់។
សមត្ថកិច្ចបញ្ជាក់ថា ក្រោយពីធ្វើសកម្មភាពរួច ជនសង្ស័យបានប្រមូលសម្ភារ ដែលក្នុងនោះរួមមាន ម៉ូតូ ១ គ្រឿង ទូរស័ព្ទដៃអាយហ្វូន ៣ គ្រឿង និងចិញ្ចៀនពេជ្រ ១ វង់ រត់គេចខ្លួនបាត់ស្រមោល។
សមត្ថកិច្ចបានបំបែកសំណុំរឿង និងធ្វើការឃាត់ខ្លួនជនសង្ស័យបាននៅវេលាម៉ោង ៩ និង ៤០ នាទីព្រឹក ថ្ងៃទី ១៣ ខែវិច្ឆិកា ឆ្នាំ ២០២១ នេះ នៅវត្តកែវឧត្តម ហៅវត្តកណ្តាល ស្ថិតក្នុងភូមិគល់ទទឹង ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់។
ជនសង្ស័យឈ្មោះ រឿន រ៉ូ ភេទប្រុស អាយុ ១៥ ឆ្នាំ ជាឈ្នួលរស់នៅធ្វើការជាមួយជនរងគ្រោះមានទីលំនៅភូមិស្ទឹងតូច សង្កាត់រលាប ក្រុងពោធិ៍សាត់ ខេត្តពោធិ៍សាត់៕
វីដេអូ៖