បាត់ដំបងៈ អាជ្ញាធរស្រុករុក្ខគិរី ខេត្តបាត់ដំបង បានអំពាវនាវដល់ប្រជាពលរដ្ឋឱ្យបង្កើនការប្រុងប្រយ័ត្នចំពោះគ្រោះជំនន់ទឹកភ្លៀង ខណៈទំនប់ស្ទាក់ទឹកបាសាក់បានជន់ឡើងសាជាថ្មីកាលពីម៉ោង ៣ ទៀបភ្លឺថ្ងៃទី ១៤ ខែ វិច្ឆិកា ឆ្នាំ ២០២១ បន្ទាប់ពីមានភ្លៀងធ្លាក់ខ្លាំងជាប់ៗគ្នានៅផ្នែកខាងលើនៃតំបន់ជួរភ្នំក្រវាញភាគខាងជើងនាប៉ុន្មានថ្ងៃមកនេះ។
លោក ផេង ផល អភិបាលរងស្រុករុក្ខគិរី បានប្រាប់ ភ្នំពេញ ប៉ុស្តិ៍ថា នៅពេលនេះកម្ពស់ទឹកនៃទំនប់អាងស្ទាក់ទឹកបាសាក់ បានជន់ឡើងដល់ ៦,៤ ម៉ែត្រ លើសពីកម្រិតប្រកាសឲ្យប្រុងប្រយ័ត្ន ២០ សង់ទីម៉ែត្រ ដែលតម្រូវឲ្យមានការបើកទ្វារទំនប់ដើម្បីរំដោះទឹកចេញពីអាង ការពារការបាក់ស្រុតខ្នងទំនប់។
លោកផលបានបញ្ជាក់ថា៖ «នៅពេលនេះស្ថានភាពទឹកជំនន់បានជន់លិចលំនៅឋានពលរដ្ឋមួយចំនួនក្នុងឃុំបាសាក់ និងឃុំព្រែជីក ប៉ុន្តែនៅមានកម្រិតស្រាលជាងបើធៀបទៅនឹងការជន់លិចកាលពីអំឡុងខែតុលាកន្លងទៅថ្មីៗនេះ។ថ្វីបើយ៉ាងដូច្នេះក្ដីរដ្ឋបាលស្រុករុក្ខគិរីយើង បានត្រៀមកម្លាំងនិងមធ្យោបាយ ដើម្បីអន្តរាគមន៍សង្គ្រោះប្រជាពលរដ្ឋ ពីតំបន់រងគ្រោះរួចជាស្រេចហើយ»។
បើតាម លោក ផល កាលពីខែតុលាកន្លងទៅនេះ ជំនន់ទឹកភ្លៀងបានបង្កផលប៉ះពាល់ផ្ទះប្រជាពលរដ្ឋ ជាង២០០គ្រួសារ ប៉ុន្តែមានពលរដ្ឋប្រមាណតែ៧៥គ្រួសារប៉ុណ្ណោះ ដែលបានសម្រេចចាកចេញមកស្នាក់នៅលើទីទួលសុវត្ថិភាព ។ ដោយឡែកកាលពីខែតុលា ឆ្នាំ ២០២០ ជំនន់ទឹកភ្លៀង ដែលហូរធ្លាក់ពីតំបន់ភ្នំ បានធ្វើឲ្យបាក់ទំនប់អាងបាសាក់ បង្កជន់លិចនិងប៉ះពាល់ប្រជាពលរដ្ឋជា ២ ០០០ គ្រួសារ នៅទូទាំងស្រុករុក្ខគិរី។
ជុំវិញករណីនេះ លោក ឆែ ម៉ាប់ អធិការស្រុករុក្ខគិរី បានប្រាប់ ភ្នំពេញ ប៉ុស្តិ៍ថា ពេលនេះ ទឹកបានជន់លិចខ្លាំងនៅចំណុចភូមិកែវមុនី្ន និងភូមិរំចេកឃុំបាសាក់ ហើយកំពុងហូរធ្លាក់ចុះទៅផ្នែកខាងក្រោម ដែលធ្វើឲ្យដំណាំចម្ការនិងលំនៅឋានប្រជាពលរដ្ឋមួយចំនួនទៀត នៅឃុំព្រៃជីករងការជន់លិចជាបណ្ដើរផងដែរ។
លោកថ្លែងថា៖«នៅពេលនេះ កម្លាំងសមត្ថកិច្ចយើងកំពុងចុះពិនិត្យស្ថានភាពប្រជាពលរដ្ឋនៅតាមមូលដ្ឋានភូមិឃុំ ដែលកំពុងរងការជន់លិចនិងណែនាំឲ្យពួកគាត់ត្រៀមលក្ខណៈដើម្បីជម្លៀសទៅកាន់ទីទួលសុវត្ថិភាពប្រសិនបើការជន់លិចមានរយៈពេលយូរនិងកាន់តែជ្រៅទៅៗ ព្រោះក្នុងខណៈនេះ នៅផ្នែកខាងលើនៃតំបន់ជួរភ្នំក្រវាញនៅមានភ្លៀងធ្លាក់នៅឡើយ»។
បើតាមសម្ដីលោក ឆែ ម៉ាប់ មន្ត្រីជំនាញផ្នែកធនធានទឹកប្រចាំនៅទំនប់អាងបាសាក់បានរាយការណ៍ប្រាប់សមត្ថកិច្ចនៅ ម៉ោង ១១ ព្រឹក ថ្ងៃទី ១៤ ខែវិច្ឆិកាថា ទឹកបានស្រកប្រមាណជា ២ តឹកវិញ បន្ទាប់ពីការបើកទ្វារទឹកបង្ហូរទឹកចេញពីអាងបានប្រមាណជាង ៦ ម៉ោងរួចមក ប៉ុន្តែស្ថានភាពអាកាសធាតុនៅផ្នែកខាងលើនៃតំបន់ជួរភ្នំក្រវាញ ផ្ទៃមេឃនៅមានសភាពអាប់អ៊ួរនៅឡើយ។
ជាមួយគ្នានេះ លោក ស៊ា ស៊ី មេឃុំបាសាក់បានប្រាប់ភ្នំពេញប៉ុស្តិ៍ថានៅរសៀលថ្ងៃទី ១៤ ខែ វិច្ឆិកា ឆ្នាំ ២០២១ ខាងមន្ត្រីជំនាញធនធានទឹកប្រចាំទំនប់អាងបាសាក់បានសម្រេចបិទទ្វារទឹកជាបណ្ដោះអាសន្នវិញក្រោយពីទឹកបានស្រកមកនៅក្រោមចំណុចទំនប់បង្ហៀរប្រមាណ ១ តឹក ដើម្បីរក្សាទឹកទុក ប្រើប្រាស់នៅរដូវប្រាំងខាងមុខនេះ។
លោកស៊ីបានបញ្ជាក់ថា៖ «ទោះយ៉ាងណាយើងនៅតែបារម្ភ ព្រោះនៅពេលនេះទឹកបានជន់លិចចូលក្រោមផ្ទះ ប្រជាពលរដ្ឋជាច្រើនគ្រួសារត្រឹមស្មងជើងទៅហើយ វានឹងអាចជន់ឡើងថែមទៀត ប្រសិនបើមានភ្លៀងធ្លាក់ខ្លាំងមួយមេពីរមេបន្តទៀត ព្រោះមន្ត្រីជំនាញគេបានប្រាប់យើងថា បើមានភ្លៀងធ្លាក់ខ្លាំងនៅផ្នែកខាងលើទៀត គេនឹងបើកទ្វារទឹកឡើងវិញទៀត»៕
វីដេអូ៖