បាត់ដំបងៈ សមត្ថកិច្ចនគរបាលស្រុកភ្នំព្រឹក នៅថ្ងៃទី ១៤ ខែវិច្ឆិកានេះ បាននិងកំពុងបន្តស្រាវជ្រាវករណីរប្រទះឃើញអាវុធ AK ជាច្រើនដើម នៅភូមិអូររំដួល ឃុំអូររំដួល ស្រុកភ្នំព្រឹក ខេត្តបាត់ដំបង កាលពីថ្ងៃទី ១២ ខែវិច្ឆិកា។
លោក ហេង បារាំង អធិការនគរបាលស្រុកភ្នំព្រឹក ថ្លែងប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ១៣ ខែវិច្ឆិកាថា កម្លាំងសមត្ថកិច្ចកំពុងធ្វើការស្រាវជ្រាវជុំវិញករណីរកឃើញអាវុធនោះ ដែលព័ត៌មានលម្អិតយ៉ាងណាមិនទាន់អាចបញ្ជាក់ប្រាប់បានទេ។
លោកថ្លែងថា៖ «យើងកំពុងស្រាវជ្រាវរឿងហ្នឹង អ៊ីចឹង មិនទាន់អាចបញ្ជេញព័ត៌មានបានទេ យើងត្រូវរក្សាការសម្ងាត់សិន ដើម្បីស្រាវជ្រាវ»។
លោក សុង សុភ័ក្ត្រ អភិបាលស្រុកភ្នំព្រឹកបានឱ្យអ្នកសារព័ត៌មានដឹងថា សមត្ថកិច្ចបានរកឃើញកាំភ្លើងវែងប្រភេទអាកាស្វ័យ AK ចំនួន ៤០ ដើម និងអាវុធ M79 នៅភូមិអូររំដួល ឃុំអូររំដួល ស្រុកភ្នំព្រឹក ខេត្តបាត់ដំបង។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា ថ្លែងនៅថ្ងៃទី ១៤ ខែវិច្ឆិកាថា ការរកឃើញអាវុធខុសច្បាប់ទោះតិច ឬច្រើន ក៏អាចបង្កការបារម្ភពីសុវត្ថិភាពនៅក្នុងសង្គមដែរ ហេតុនេះអាជ្ញាធរពាក់ព័ន្ធគួរតែពន្លឿនការស្រាវជ្រាវ និងធ្វើយ៉ាងណាធានាឱ្យបាននូវការគ្រប់គ្រងអាវុធ និងការចរាចរណ៍ឱ្យបានល្អប្រសើរ ដើម្បីសុខសុវត្ថិភាពសម្រាប់សង្គមជាតិ។
លោកថ្លែងថា៖ «អាជ្ញាធរពាក់ព័ន្ធគួរតែបង្កើនការយកចិត្តទុកដាក់ និងស៊ើបអង្គេតករណីនេះ ជាពិសេសលើកកម្ពស់ប្រសិទ្ធភាពនៃការគ្រប់គ្រងអាវុធនិងការចរាចរណ៍អាវុធ នៅក្នុងប្រទេសយើង ដើម្បីធានាបាននូវសុខសុវត្ថិភាពសម្រាប់សង្គមជាតិទាំងមូល»៕