.jpg)
កំណាត់ឧស ដែលកាប់ខុសច្បាប់ ក្នុងស្រុកសន្ទុក ខេត្តកំពង់ធំ។ រូបថត ទំរីងរេដបូក
កំពង់ធំៈ ក្រុមការងារពង្រឹងការអនុវត្តច្បាប់នៃគម្រោងរេដបូកទំរីង នៅថ្ងៃទី ១៣ ខែវិច្ឆិកា បានចុះប្រតិបត្តិការបង្ក្រាបបទល្មើសព្រៃឈើនៅតំបន់អូរព្រូស ក្នុងភូមិត្រពាំងឫស្សី ឃុំក្រយា ស្រុកសន្ទុក ខេត្តកំពង់ធំ ចាប់បានរណារយន្ត ១ គ្រឿង និងឈើអុសសរុបចំនួន ៨ ស្ទែរ។
លោក ឈៀង មាលា នាយសង្កាត់រដ្ឋបាលព្រៃឈើក្រយា ថ្លែងនៅថ្ងៃទី ១៤ ខែវិច្ឆិកាថា ការចុះបង្ក្រាបនេះសមត្ថកិច្ចបានចាប់រណារយន្តចំនួន ១ គ្រឿង និងតេអូរចំនួន ១ គ្រឿង ដែលជនល្មើសអារជ្រៀកឈើនៅពេលយប់ ប៉ុន្តែពេលសមត្ថកិច្ចទៅដល់ម្ចាស់បានរត់គេចខ្លួនបាត់។ ជាមួយគ្នានោះ សមត្ថកិច្ចក៏បានចាប់ឃាត់ការធ្វើសន្និធិ ដោយជនមិនស្គាល់អត្តសញ្ញាណនូវអុសចម្រុះចំនួន ៨ ស្ទែរ ដែលជនល្មើសបានកាប់ទម្លាក់ចោលរួចបើកគោយន្តគេចខ្លួនបាត់មុនពេលសមត្ថកិច្ចទៅដល់។ ចំណែកវត្ថុតាងប្រមូលយកមករក្សាទុកនៅទីស្នាក់ការសង្កាត់រដ្ឋបាលព្រៃឈើក្រយា។
លោកថ្លែងថា៖ «យើងចាប់មនុស្សអត់បានទេ ព្រោះពេលទៅសមត្ថកិច្ចទៅដល់គេរត់គេចខ្លួនអស់ ហើយភាគច្រើនគេសុទ្ធតែមានអាយកូម អាយអី ឱ្យព័ត៌មានគ្នាទៅវិញទៅមក អ៊ីចឹងទៅយើងចាប់អត់បានទេ យើងបង្ក្រាបបន្តបន្ទាប់បានតែវត្ថុតាង បញ្ជូនសំណុំរឿងទៅតុលាការ»។
លោក មាលា បញ្ជាក់ថា ពេលខ្លះសមត្ថកិច្ចក៏មានបញ្ហាប្រឈមក្នុងការចុះបង្ក្រាបផងដែរ ព្រោះជនប្រព្រឹត្តបទល្មើស មួយចំនួនបានតដៃជាមួយសមត្ថកិច្ចទៀតផង ប៉ុន្តែយ៉ាងណាសមត្ថកិច្ចនៅតែបន្តចុះល្បាតជាបន្តបន្ទាប់ ដែលចាប់បានរណារយន្ត កាំបិត ពូថៅ ម៉ូតូ ជាដើម។ លោកថា ក្នុងរយៈពេលជិត ២ ខែចុងក្រោយនេះ សមត្ថកិច្ចសង្កាត់រដ្ឋបាលព្រៃឈើ បានបញ្ជូនសំណុំរឿង ទៅកាន់តុលាការបានចំនួន ប្រមាណ ៤០ សំណុំរឿង។
លោកថ្លែងថា៖ «ទោះបីជាយើងចាប់មនុស្សមិនបាន ប៉ុន្តែវត្ថុតាងទាំងនោះយើងបានធ្វើសំណុំរឿងបញ្ជូនទៅតុលាការជាបន្តបន្ទាប់ដែរ ក្នុងរយៈពេលនៃខែតុលា និងវិច្ឆិកានេះ យើងបានបញ្ជូនទៅប្រមាណ ៤០ សំណុំរឿងហើយ តែបើគិតពីដើមឆ្នាំមក យ៉ាងតិចបំផុតក៏យើងបានធ្វើសំណុំរឿងបញ្ជូនទៅតុលាការបាន ៦០ ករណីដែរ»។
ដោយឡែក នៅខេត្តព្រះវិហារឯនោះវិញ លោក សុង ច័ន្ទសុជាតិ ប្រធានស្ដីទីមន្ទីរបរិស្ថានខេត្តព្រះវិហារ នៅថ្ងៃទី ១៤ ខែវិច្ឆិកានេះ បានបញ្ជាឱ្យមន្ត្រីបរិស្ថានចុះទៅពិនិត្យមើលនៅចំណុចអូរទីទុយ ឃុំព្រះឃ្លាំង ស្រុកត្បែងមានជ័យ បន្ទាប់ពីទទួលព័ត៌មានថា មានគំនរឈើលាក់ទុកនៅទីនោះដោយខុសច្បាប់។
លោកថ្លែងថា៖ «ករណីនេះខ្ញុំមិនទាន់ដឹងថា យ៉ាងណាទេ ខ្ញុំនឹងឱ្យមន្ត្រីបរិស្ថានចុះទៅពិនិត្យមើលដល់កន្លែង»៕
