ភ្នំពេញៈ ទីតាំងល្បែងស៊ីសងខុសច្បាប់ចំនួន ៤ កន្លែង ស្ថិតនៅក្នុងសង្កាត់ស្រះចក ខណ្ឌដូនពេញ ដែលបម្រុងបើកដំណើរការត្រូវបានអាជ្ញាធរខណ្ឌនេះចុះរឹបអូសយកឧបករណ៍កុំព្យួទ័រ និងបិទមិនឱ្យដំណើរការកាលពីថ្ងៃទី ១៣ វិច្ឆិកា។
លោក ចាប ឌីណា នាយករដ្ឋបាលសាលាខណ្ឌដូនពេញប្រាប់ ភ្នំពេញ ប៉ុស្តិ៍ នៅរសៀលថ្ងៃទី ១៤ វិច្ឆិកាថា ឧបករណ៍ និងសម្ភារដែលអាជ្ញាធរខណ្ឌដូនពេញដកហូតបានពីទីតាំងដែលបម្រុងបើកលេងល្បែងខុសច្បាប់នោះមាន ៤ ទីតាំង ស្ថិតនៅក្នុងសង្កាត់ស្រះចក។ លោកថា ២ ទីតាំងក្នុងចំណោម ៤ ទីតាំងនោះ ត្រូវអាជ្ញាធរដកហូតកុំព្យូទ័របាន ៣៨ គ្រឿង ម៉ូនីទ័រចំនួន ២៧ គ្រឿង និងទូរទស្សន៍បានចំនួន ២៧ គ្រឿងរួមនឹងសម្ភារមួយចំនួនទៀត។
លោកបន្តថាការដែលអាជ្ញាធរខណ្ឌចុះបិទ និងរឹបអូសយកឧបករណ៍ និងសម្ភារពីទីតាំងបម្រុងបើកលេងល្បែងខុសច្បាប់ខាងលើ គឺបន្ទាប់ពីបានទទួលព័ត៌មានពីប្រជាពលរដ្ឋដែលបានរាយការណ៍មកប្រាប់អាជ្ញាធរ។
បើតាមលោក ចាប ឌីណា ផ្អែកតាមសេចក្តីរាយការណ៍និងយោងតាមការចុះពិនិត្យជាក់ស្តែងគឺថា ជនខិលខូចបម្រុងបើកលេងល្បែងលួចលាក់ខុសច្បាប់។ ចំពោះឧបករណ៍និងសម្ភារទាំងអស់នោះ គឺលោកបានយកទៅរក្សាទុកនៅខណ្ឌ ដើម្បីទុកឱ្យម្ចាស់ទីតាំងទាំងនោះចូលខ្លួនដោះស្រាយ។
លោកបានបញ្ជាក់ថា៖ «ទាំងនេះ គឺជាការចូលរួមរបស់ប្រជាពលរដ្ឋជាមួយអាជ្ញាធរក្នុងការទប់ស្កាត់បទល្មើសល្បែងស៊ីសងខុសច្បាប់។ នេះគឺជាការរួមចំណែកយ៉ាងសកម្មរបស់ប្រជាពលរដ្ឋយើង»។
យោងតាមមន្ត្រីនគរបាលខណ្ឌមួយរូបស្នើមិនបញ្ចេញឈ្មោះបាននិយាយនៅរសៀលថ្ងៃទី ១៤ វិច្ឆិកាថា កន្លងមកនៅក្នុងភូមិសាស្ត្រខណ្ឌដូនពេញ មុនសម័យកូវីដ គឺក្រុមជនខិលខូចតែងលួចបើកល្បែងលួចលាក់បង្កឱ្យមានអសន្តិសុខក្នុងមូលដ្ឋាន។ ប៉ុន្តែដោយមានការរឹតបន្តឹងផ្នែកសន្តិសុខសណ្តាប់ធ្នាប់ និងការអនុវត្តគោលនយោបាយភូមិឃុំមានសុវត្ថិភាព អាជ្ញាធរបានទប់ស្កាត់ និងបិទទីតាំងល្បែងជាបន្តបន្ទាប់។
មន្ត្រីនគរបាលរូបនោះបន្តថា រហូតចូលមកទល់ពេលមានការរាតត្បាតជំងឺកូវីដកាន់តែខ្លាំង គឺអាជ្ញាធរនិងសមត្ថកិច្ចបានបិទមិនអនុញ្ញាតឱ្យមានទីតាំងល្បែងតែម្តង សូម្បីតែស្របច្បាប់ក៏ដោយ។ កិច្ចការនេះក៏មានការចូលរួមពីប្រជាពលរដ្ឋនៅក្នុងមូលដ្ឋានដែរទើបទទួលបានជោគជ័យ ។
មន្ត្រីដដែលបញ្ជាក់ថា៖ «ជារួមរាល់បទល្មើសនៅក្នុងមូលដ្ឋានឬក្នុងភូមិសាស្ត្រក្នុងខណ្ឌដូនពេញទាំងមូលមិនសូវកើតមានទេ។ បញ្ហានេះដោយសារទាំងកម្លាំងមានសមត្ថកិច្ចទាំងអាជ្ញាធរគ្រប់លំដាប់ថ្នាក់ចូលរួមសហការបានយ៉ាងល្អ»៕