ព្រះសីហនុៈ បុរសម្នាក់ត្រូវបានរថភ្លើងបុកស្លាប់ កាលពីថ្ងៃទី ១៣ វិច្ឆិកា ខណៈគាត់កំពុងជិះម៉ូតូឆ្លងផ្លូវរថភ្លើងនៅភូមិអូរត្រជាក់ចិត្ត ឃុំសំរុង ស្រុកព្រៃនប់ ខេត្តព្រះសីហនុ ដែលនេះជាគ្រោះថ្នាក់លើកទី២ ហើយនៅក្នុងឃុំនេះ បន្ទាប់ពីលើកទី១ កើតឡើងពីខែតុលា ឆ្នាំ ២០២១ ដោយរថភ្លើងបុកជាមួយរថយន្តបណ្តាលឱ្យអ្នកបើករថយន្តស្លាប់ម្នាក់ ក្រោយពីបញ្ជូនទៅមន្ទីរពេទ្យ។
លោក សួន គឹមសំ អធិការរងនគរបាលស្រុកព្រៃនប់បានឱ្យដឹងពីថ្ងៃទី ១៤ វិច្ឆិកាថា ជនរងគ្រោះឈ្មោះ លីវ ហុង អាយុ ៦៦ ឆ្នាំ រស់នៅភូមិ-ឃុំ កើតហេតុ។
លោក គឹមសំ បានបន្តថា កន្លែងបុកមនុស្សស្លាប់ពីថ្ងៃ ១៣ វិច្ឆិកានោះ គឺគេមិនមានដាក់បារ៉ាសឱ្យអ្នកដំណើរបានដឹងទេព្រោះជាផ្លូវលំ។ ប៉ុន្តែតាមក្បួនច្បាប់នៅពេលមានរថភ្លើងបើកជិតដល់ផ្លូវឆ្លងកាត់គឺអ្នកបើកបររថភ្លើងត្រូវតែទាក់ទងតាមវិទ្យុទាក់ទងទៅឆ្មាំយាមផ្លូវ ដើម្បីឱ្យដាក់បារ៉ាសកុំឱ្យឆ្លងកាត់ ឬស៊ីផ្លេឱ្យដឹង។
លោកថា៖ «ជនរងគ្រោះគាត់ធ្វេសប្រហែស។ និយាយរួមទៅយើងអត់ចោទខាងរថភ្លើងហ្នឹងយ៉ាងម៉េចទេ ព្រោះយើងជាអ្នកបើកម៉ូតូខ្លួនឯងហ្នឹងមិនប្រយ័ត្ន។
ឯរថភ្លើងអាងតែផ្លូវអាទិភាពក៏ចេះតែបើកដែរ»។
លោកបានរំឭកដែរថា កាលពីខែតុលាឆ្នាំនេះក៏មានរថភ្លើងបុករថយន្ត ១ គ្រឿងដែរពេលឆ្លងកាត់ផ្លូវជាតិលេខ ៤ ធ្វើឱ្យបុរសអ្នកបើករថយន្តស្លាប់ពេលនាំទៅមន្ទីរពេទ្យ។
លោក ពៅ សុវណ្ណ នាយប៉ុស្តិ៍នគរបាលឃុំសំរុង បានប្រាប់តាមសម្តីអ្នកភូមិនៅថ្ងៃទី ១៤ វិច្ឆិកាថា គ្រោះថ្នាក់នៅរសៀលថ្ងៃទី ១៣ វិច្ឆិកានោះ គឺខណៈរថភ្លើងបានចេញពីភ្នំពេញទៅខេត្តព្រះសីហនុ។ កន្លែងកើតហេតុនោះមិនមានដាក់បារ៉ាសជាសញ្ញាអ្វីទេ។ ប៉ុន្តែពេលនេះអាជ្ញាធរកំពុងគិតគូរ ដើម្បីដាក់ស្លាកសញ្ញា។ លោក សុវណ្ណ ឱ្យដឹងដែរថា ក្រោយពីបុកមនុស្សស្លាប់គឺរថភ្លើងមិនបានឈប់ចុះមើលជនរងគ្រោះទេ។ រីឯសពជនរងគ្រោះត្រូវបានប្រគល់ឱ្យសាច់ញាតិយកទៅធ្វើបុណ្យហើយ។
លោកថា ករណីនេះ គ្រួសារជនរងគ្រោះថា នឹងដាក់ពាក្យស្នើសុំថវិកាខ្លះពីខាងភាគីរថភ្លើងក្រោយធ្វើបុណ្យរួចរាល់៕