.jpg)
ជនសង្ស័យដែលកាប់ប្រពន្ធស្លាប់ ពេលសមត្ថកិច្ចនាំមកមន្ទីរពេទ្យ ។ រូបថត ប៉ូលិស
ក្រចេះ តុលាការខេត្តក្រចេះកាលពីថ្ងៃទី ១៤ វិច្ឆិកា បានឃុំខ្លួនជនត្រូវចោទម្នាក់ បន្ទាប់ពីឃាត់ខ្លួនបាន ១ ថ្ងៃ ពាក់ព័ន្ធករណីកាប់ប្រពន្ធរបស់ខ្លួនឯងស្លាប់ក្នុងជម្លោះគ្រួសារប្រព្រឹត្តនៅភូមិវឌ្ឍនៈឃុំរលួសមានជ័យ ស្រុកសំបូរ ខេត្តក្រចេះ ខណៈទាំង ២ នាក់ប្តីប្រពន្ធ កំពុងមានវិជ្ជមានជំងឺកូវីដ ១៩។
លោក កែវ ចន្ធី នាយការិយាល័យប្រឆាំងការជួញដូរមនុស្ស និងការពារអនីតិជនខេត្តក្រចេះ ឱ្យដឹងនៅថ្ងៃទី ១៥ វិច្ឆិកាថា បុរសឈ្មោះ ជេម សុធា អាយុ ២៦ ឆ្នាំ ត្រូវបានចៅក្រមស៊ើបសួរសាលាដំបូងខេត្តក្រចេះ សម្រេចចេញដីកាឃុំក្នុងពន្ធនាគារ កាលពីថ្ងៃទី ១៤ វិច្ឆិកា។ ទាំងស្ត្រីរងគ្រោះ និងជនត្រូវចោទមានផ្ទុកវីរុសកូវីដ ១៩ នៅក្នុងខ្លួន ហើយលោកគ្រូពេទ្យបានតម្រូវឱ្យបុរសរូបនោះស្លៀកពាក់ខោអាវកូវីដ ក្នុងពេលសាកសួរនៅតុលាការ។
លោកបន្តថា ករណីនេះខាងពន្ធនាគារខេត្តមិនបានយកជនត្រូវចោទម្នាក់នោះទៅធ្វើចត្តាឡីស័កនៅកន្លែងផ្សេងក្រៅពីពន្ធនាគារទេ។ ព្រោះក្នុងពន្ធនាគារក៏មានគ្រូពេទ្យ និងមានបន្ទប់មួយដាច់ដោយឡែកទុកសម្រាប់ដាក់អ្នកឆ្លងជំងឺកូវីដដែរ បើទោះជាបច្ចុប្បន្នស្ថានភាពជំងឺកូវីដបានធូរស្បើយក្តី។
លោកថា៖ «តាមខ្ញុំដឹងនៅក្នុងពន្ធនាគារគេមានពេទ្យរបស់គេ។គេមានបន្ទប់ដាច់ដោយឡែកសម្រាប់ដាក់អ្នកជំងឺកូវីដ។ បញ្ហាជនត្រូវចោទម្នាក់នេះគាត់មានបទល្មើសឧក្រិដ្ឋហើយបើយកគាត់ទៅមន្ទីរពេទ្យគឺត្រូវចំណាយកម្លាំងច្រើនដើម្បីយាមគាត់»។
លោក ជ្រិន សុទ្ធា អធិការនគរបាលស្រុកសំបូរប្រាប់តាមសម្តីសាក្សីនៅថ្ងៃទី ១៥ វិច្ឆិកាថា កាលពីព្រលប់ថ្ងៃទី ១៣ វិច្ឆិកា គេបានឮសំឡេងស្ត្រីរងគ្រោះឈ្មោះ បាន រដ្ឋាណា អាយុ ២៦ ឆ្នាំ ឈ្លោះគ្នាជាមួយប្តី (ជនល្មើស)។ លុះដល់ម៉ោងប្រហែល ៩ យប់ ស្រាប់តែគេឮសំឡេងស្ត្រីរងគ្រោះស្រែកឱ្យជួយ ហើយពលរដ្ឋបានរាយការណ៍ទៅនគរបាលប៉ុស្តិ៍ឃុំរលួសមានជ័យទើបកម្លាំងនគរបាលប៉ុស្តិ៍រួមនឹងប្រជាការពារ ២ ទៅ ៣ នាក់ ទៅផ្ទះកើតហេតុ។ នៅពេលនោះសមត្ថកិច្ចឃើញស្ត្រីរងគ្រោះស្លាប់ដោយមានស្នាមកាប់ចំនួន ៨ កាំបិត រីឯជនសង្ស័យបានកាប់ខ្លួនឯងត្រូវរបួសភ្លៅទាំងសងខាង និងពោះ ហើយបានយកខែ្សចងកភ្ជាប់នឹងធ្នឹមផ្ទះបម្រុងសម្លាប់ខ្លួន តែត្រូវសមត្ថកិច្ចកាត់ទាន់ពេល ហើយក៏បញ្ជូនទៅមន្ទីរពេទ្យបង្អែកស្រុកសំបូរទាំងយប់។
លោកបន្តថា បន្ទាប់ពីសមត្ថកិច្ចបញ្ជូនដល់មន្ទីរពេទ្យនៅយប់ថ្ងៃទី ១៣ វិច្ឆិកានោះ គឺគ្រូពេទ្យបានធ្វើតេស្តរកឃើញក្នុងខ្លួនរបស់ជនសង្ស័យមានផ្ទុកវីរុសកូវីដ។ លុះព្រឹកឡើងថ្ងៃទី ១៤ វិច្ឆិកាសមត្ថកិច្ចស្រុកក៏បានបញ្ជូនជនសង្ស័យទៅសាលាដំបូងខេត្តក្រចេះ។ ប៉ុន្តែគ្រូពេទ្យបានតម្រូវឱ្យសមត្ថកិច្ច និងជនសង្ស័យស្លៀកពាក់ខោអាវកូវីដ។
បើតាមលោក សុទ្ធា «ឥឡូវនេះ សមត្ថកិច្ចរបស់ខ្ញុំមួយចំនួនដែលចុះទៅចាប់ជនសង្ស័យគឺនាំគ្នាធ្វើចត្តាឡីស័ក និងគ្រូពេទ្យកំពុងចាក់ច្រមុះ ដើម្បីពិនិត្យមើលរកមេរោគកូវីដ»៕
