ភ្នំពេញៈ នគរបាលព្រហ្មទណ្ឌខណ្ឌមានជ័យគ្រោងនឹងបញ្ជូនស្ត្រីវ័យចំណាស់ម្នាក់ទៅតុលាការនៅថ្ងៃទី ១៦ ខែវិច្ឆិកា ក្រោយពីបានដុតសម្លាប់ប្ដីដោយប្រើទឹកអាល់កុល នៅភូមិព្រែកតានូ ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
លោក ហ៊ុន រតនា អធិការរងទទួលផែនការងារនគរបាលព្រហ្មទណ្ឌខណ្ឌមានជ័យ បានឱ្យដឹងនៅថ្ងៃទី ១៥ វិច្ឆិកាថា ស្ត្រីសង្ស័យមានឈ្មោះ ទៀង ស៊ីម អាយុ ៧៧ ឆ្នាំ រីឯជនរងគ្រោះជាប្តីឈ្មោះភៅ ម៉ៅ អាយុ ៨៥ ឆ្នាំ ពួកគេរស់នៅភូមិព្រែកតានូ ២ សង្កាត់ចាក់អង្រែលើ ខណ្ឌមានជ័យ។
លោកថ្លែងថា «នៅ(ថ្ងៃទី ១៥ វិច្ឆិកា) យើងកំពុងតែដំណើរការនីតិវិធីបន្តសាកសួរស្ត្រីសង្ស័យ។ នៅពេលយើងបំពេញសំណុំរឿងចប់គឺយើងគ្រោងនឹងបញ្ជូនគាត់ទៅតុលាការនៅពេលរសៀល (ថ្ងៃទី ១៦ វិច្ឆិកា)»។
លោក រតនា បានថ្លែងដោយយោងតាមចម្លើយសារភាពរបស់ស្ត្រីជនសង្ស័យថា មូលហេតុដែលសម្លាប់ប្ដីខ្លួនឯងនោះ ដោយសារតែធុញទ្រាន់និងតប់ប្រមល់ជាមួយការរអ៊ូរបស់ប្ដីដែលមានជំងឺប្រេះឆ្អឹងចង្កេះ មិនដឹងដោះស្រាយយ៉ាងម៉េចបាន លុះវេលាម៉ោង ២ ភ្លឺនៅថ្ងៃទី ១៤ វិច្ឆិកា ស្ត្រីសង្ស័យបានយកអាល់កុលកន្លះលីត្រចាក់លើពូកដែលប្តីរបស់គាត់កំពុងដេកលក់ ហើយបានយកដែកកេះដុតលើកម្រាលពូកនោះបណ្តាលឱ្យឆាបឆេះរលាកពេញខ្លួនរហូតដល់ជនរងគ្រោះដាច់ខ្យល់ស្លាប់នៅក្នុងផ្ទះ។
លោក រតនា ថ្លែងថា លុះព្រឹកថ្ងៃទី ១៤ វិច្ឆិកាក្រោយពីមានហេតុការណ៍នេះមកក៏មានការភ្ញាក់ផ្អើលដល់ប្រជាពលរដ្ឋ និងរាយការណ៍ប្រាប់នគរបាលសង្កាត់ចាក់អង្រែលើ។ពេលនោះនគរបាលបុស្តិ៍បានចុះដល់ផ្ទះកើតហេតុក្រោយពីទទួលបានសេចក្ដីរាយការណ៍អំពីរឿងឃាតកម្មនេះ ដើម្បីពិនិត្យសាកសព និងហៅស្ត្រីសង្ស័យទៅសាកសួរនៅប៉ុស្តិ៍នគរបាល និងឃាត់ខ្លួនតែម្តង។
លោកបញ្ជាក់ថា ចំពោះវត្ថុតាងដែលបន្សល់នៅកន្លែងកើតហេតុមានដបទឹកសុទ្ធកន្លះលីត្រសម្រាប់ដាក់អាល់កុលចំនួន ១ ដែកកេះចំនួន២ អំបោស១ឆេះខាងចុង ប្រដាប់កើបសំរាម ១ និងកម្ទេចពូកឆេះផង៕