.jpg)
សកម្មភាពចម្លងអ្នកភូមិក្នុងស្រុករុក្ខគិរីខេត្តបាត់ដំបងមកទីទួលកាលពីថ្ងៃទី ១៤ វិច្ឆិកា ។ រូបថត រដ្ឋបាលស្រុក
បាត់ដំបងៈជំនន់ទឹកភ្លៀងជាថ្មីនៅក្នុងស្រុករុក្ខគិរី ខេត្តបាត់ដំបង បានបង្កការជន់លិចដីស្រែចម្ការប្រជាពលរដ្ឋជិត ៣០០ ហិកតា ហើយអ្នកភូមិ ៦៥ គ្រួសារ ត្រូវបានជម្លៀសចេញទៅកាន់ទីទួលសុវត្ថិភាពកាលពីយប់ថ្ងៃទី ១៤ ខែ វិច្ឆិកា ឆ្នាំ ២០២១។ នេះបើតាមការអះអាងរបស់អាជ្ញាធរមូលដ្ឋាន។
លោក ស៊ា ស៊ី មេឃុំបាសាក់ ស្រុករុក្ខគិរី បានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ១៥ ខែ វិច្ឆិកា ឆ្នាំ ២០២១ ថា ក្រោយពីភ្លៀងនៅតែបន្តធ្លាក់នៅផ្នែកខាងលើនៃតំបន់ជួរភ្នំក្រវាញបានធ្វើឲ្យទឹកនៅក្នុងទំនប់អាងស្នាក់ទឹកបាសាក់ជន់ឡើងលើសកម្រិតប្រកាសអាសន្នជាថ្មីម្ដងទៀត កាលពីយប់ថ្ងៃទី ១៤ ខែវិច្ឆិកា ដែលធ្វើឲ្យមន្ត្រីប្រចាំការនៅទំនប់អាងទឹកនេះបានសម្រេចបើកទ្វារទឹកទាំង ៧ នៃទំនប់អាងស្នាក់ទឹកបាសាក់ ដើម្បីរំដោះទឹកចេញធ្វើឲ្យដីស្រែចម្ការ និងលំនៅឋានពលរដ្ឋចំនួន ៣ ភូមិ នៅក្នុងឃុំបាសាក់ជន់លិចយ៉ាងគំហុក។
លោកបានថ្លែងថា៖ «សមត្ថកិច្ចបានជួយអន្តរាគមន៍ជម្លៀសពលរដ្ឋ ៦៥ គ្រួសារ នៅភូមិឈូកទៅកាន់ទីទួលសុវត្ថិភាពទាំងយប់ក្រោយពីទឹកជនលិចផ្ទះរបស់ពួកគាត់ កាលពីវេលាម៉ោង ១១ យប់ថ្ងៃទី ១៤ ខែ វិច្ឆិកា ឆ្នាំ ២០២១»។
លោក ស៊ី បានថ្លែងពេលកំពុងចែកថ្នាំពេទ្យសម្រាប់ព្យាបាលជំងឺគ្រុនក្ដៅ និងផ្ដាសាយជូនគ្រួសាររងគ្រោះ ដែលកំពុងស្នាក់នៅទីទួលសុវត្ថិភាពនៅចំណុចទួលព្រះអង្គកែវ និងចំណុចទួលបឹងតាសុខនាព្រឹកថ្ងៃចន្ទ [ម្សិលមិញ] ថា នៅវេលាម៉ោង៣ទៀបភ្លឺថ្ងៃទី ១៤ ខែ វិច្ឆិកា ឆ្នាំ ២០២១ ទឹកក្នុងអាងទំនប់បាសាក់បានជន់ឡើងដល់ ៦,៤ ម៉ែត្រ លើសពីចំណុចប្រកាសអាសន្ន ៤ តឹកហើយហូរលើទំនប់បង្ហៀរ។
លោកថា ក្នុងស្ថានភាពនោះមន្ត្រីប្រចាំការនៅទំនប់នោះបានសម្រេចបើកទ្វារទឹកទាំង ៧ ដើម្បីរំដោះទឹកចេញពីអាងចៀសវាងការបាក់ខ្នងទំនប់ហើយបានបិទទៅវិញ ក្រោយពីទឹកបានស្រកមកនៅ ៥ ម៉ែត្រផុតពីកម្រិតប្រកាសអាសន្ន ដើម្បីរក្សាទឹកទុក។ ក៏ប៉ុន្តែដល់ម៉ោង ៩ យប់ថ្ងៃដដែលភ្លៀងបានធ្លាក់មកបន្ថែមទៀត បណ្ដាលឲ្យទឹកក្នុងអាងខាងលើនេះ បានជន់ឡើងដល់កម្រិតប្រកាសអាសន្នជាថ្មីម្ដងទៀតគឺកម្ពស់ ៦,២ ម៉ែត្រហើយមន្ត្រីប្រចាំការនៅទីនោះបានបើកទ្វារទឹកទាំង ៧ ឡើងវិញ បណ្ដាលឲ្យទឹកជន់លិចភូមិចំនួន ៣ គឺភូមិច្រាំងខ្ពស់ភូមិកំរែង និង ភូមិឈូក។
លោក ស៊ី បានបញ្ជាក់ថា៖«នៅភូមិច្រាំងខ្ពស់ និង ភូមិកំរ៉ែង ទឹកបានជន់លិចដល់ត្រឹមចង្កេះ ប៉ុន្តែពលរដ្ឋក្នុងភូមិទាំង ២ នេះ មិនបានជម្លៀសចេញពីលំនៅឋាននោះទេ។ ចំណែកភូមិឈូកទឹកបានជន់ឡើងលិចក្បាលមនុស្សចាស់ គឺដល់កម្ពស់ជាង ២ ម៉ែត្រ ទើបអ្នកភូមិនេះចំនួន ៦៥ គ្រួសារ បាននាំគ្នាជម្លៀសទៅទីទួលសុវត្ថិភាពទាំងយប់»។
បើតាមលោក ស៊ី ទឹកជំនន់នេះ បានប៉ះពាល់ផលដំណាំរបស់ប្រជាកសិករនៅក្នុងភូមិឈូក សរុប ២៣០ ហិកតា ក្នុងនោះផ្ទៃដីដំណាំពោត សណ្ដែក ម្នាស់ និងត្រសក់ផ្អែមសរុប ១៨៥ ហិកតា និងផ្ទៃដីដំណាំស្រូវ ៤៥ ហិកតា។
ជុំវិញផលប៉ះពាល់ដំណាំនេះ លោក ព្រឿង ព្រឿន មេភូមិឈូក ដែលថាបានជួលដីស្រែចម្ការចំនួន ២១ ហិកតា ពីពលរដ្ឋក្នុងភូមិរបស់លោកក្នុង ១ ហិកតា ៤០ ម៉ឺនរៀលក្នុង ១ រដូវ [រយៈពេល ៦ ខែ] សម្រាប់ដាំសណ្ដែកបាយ ពោត និងស្រូវ បានប្រាប់ ភ្នំពេញ ប៉ុស្តិ៍ថា ក្នុងរយៈពេល ២ ឆ្នាំចុងក្រោយនេះ គ្រួសាររបស់គាត់មានការខាតបង់ថវិកាច្រើនណាស់ដោយសារតែគ្រោះទឹកជំនន់នេះ។
លោកបានបន្តថា នៅពេលនេះស្ថានភាពទឹកជំនន់នៅក្នុងភូមិរបស់គាត់ទឹកនៅលិចក្បាលនៅឡើយទេ។ ចំណែកផ្ទៃដីស្រែចម្ការកាន់តែនៅជ្រៅជាងនេះហេតុនេះ ហើយទើបគាត់គ្មានក្ដីរំពឹងថានឹងទទួលបានផលពីដំណាំទាំងអស់របស់គាត់ឡើយ បើទោះជាពោតខ្លះបានចេញស្នៀត និងផ្លែក៏ដោយ។
លោកព្រឿងបានបញ្ជាក់ថា៖ «ក្នុងរយៈពេល ២ ឆ្នាំចុងក្រោយនេះ គ្រោះទឹកជំនន់បានធ្វើឲ្យគ្រួសារខ្ញុំកើនបំណុលធនាគារច្រើនណាស់គឺបុលយកមកជួលដីអ្នកភូមិធ្វើស្រែចម្ការ។ដំណាំយើងកំពុងតែល្អចេញស្នៀតចេញផ្លែទៅហើយនោះស្រាប់តែទឹកជន់លិចរលួយអស់គ្មានសល់»។
លោក ឆុំ រិទ្ធ អនុប្រធានសមាគមអ្នកប្រើប្រាស់ទឹក និងជាមន្ត្រីផ្នែកធនធានទឹក ប្រចាំការនៅទំនប់អាងស្នាក់ទឹកបាសាក់ បានប្រាប់ ភ្នំពេញ ប៉ុស្តិ៍ថា គិតត្រឹមម៉ោង ១១:៣០ នាទីព្រឹកថ្ងៃទី ១៥ ខែ វិច្ឆកា ឆ្នាំ ២០២១ ស្ថានភាពទឹកក្នុងទំនប់អាងស្ទាក់ទឹកបាសាក់ ទឹកបានស្រកចុះមកនៅត្រឹម ៥,២ ម៉ែត្រ ខណៈទ្វារទឹកនៅតែបន្តបើកបង្ហូរទឹកចេញពីអាងចំនួន ៥ នៅឡើយ។
លោកបានបញ្ជាក់ថា៖ «ខាងមន្ទីរធនធានទឹកខេត្តបាត់ដំបងបានប្រាប់ឲ្យក្រុមការងារយើងនៅទីនេះបិទទ្វារទឹកទាំង ៧ នៅពេលទឹកស្រកចុះមកនៅកម្ពស់ ៥ ម៉ែត្រ ប៉ុន្តែ ៣-៤ ម៉ោងកន្លងមកនេះ ទឹកមិនឡើងនិងមិនស្រកនោះទេ គឺនៅក្នុងកម្រិតកម្ពស់ ៥,២ ម៉ែត្រនៅឡើយ ដូច្នេះយើងនៅមិនអាចបិទទ្វារទឹក ៥ បន្ថែមទៀតបានទេ ព្រោះខ្លាចទឹកដែលហូរធ្លាក់ពីលើភ្នំជុំវិញតំបន់នេះ បណ្ដាលឲ្យជន់ឡើងជាថ្មីម្ដងទៀត»។
យ៉ាងណាក្ដី លោកបានស្នើសុំឲ្យពលរដ្ឋដែលរស់នៅប្របជាប់មាត់ស្ទឹង បឹង ព្រែក នៅផ្នែកខាងក្រោមនៃទំនប់អាងស្ទាក់ទឹកបាសាក់ទាំងអស់បង្កើនការប្រុងប្រយ័ត្ន និងត្រៀមខ្លួនជម្លៀសចេញទៅទីទួលសុវត្ថិភាពប្រសិនបើភ្លៀងនៅបន្តធ្លាក់ទៀតនោះ។
ចំណែកអ្នកស្រី ផាន់ ម៉ាច មេឃុំព្រៃជីកបានប្រាប់ ភ្នំពេញ ប៉ុស្តិ៍ថា នៅពេលនេះទឹកដែលហូរធ្លាក់ពីផ្នែកខាងលើបានមកជន់លិចប៉ះពាល់ការរស់នៅរបស់ប្រជាពលរដ្ឋចំនួន ៦ ភូមិ ដែលស្ថិតនៅប្របជាប់មាត់ស្ទឹងបាសាក់ និងស្ទឹងដូនទ្រី រួមមានភូមិបឹងអម្ពិល ភូមិធ្នួយ ភូមិព្រែកតាវេន ភូមិព្រៃជីក ភូមិខ្នំ និងភូមិខ្នាចអំព័រ សរុបចំនួន ៧៣៧ គ្រួសារ និងដីស្រែចម្ការប្រមាណជាង៤០ហិកតា។
អ្នកស្រីបានបន្ថែមថា៖ «ទោះយ៉ាងណា មកទល់ពេលនេះមិនទាន់មានអ្នកភូមិណាម្នាក់ជម្លៀសមកទីទួលសុវត្ថិភាពនោះទេ»។
ដោយឡែកនៅឯស្រុកព្រៃនប់ខេត្តព្រះសីហនុវិញខ្យល់កន្ត្រាក់ និងរលកសមុទ្របានបក់បោកពន្លិចទូកនេសាទ ១ គ្រឿង ដែលមានផ្ទុកអ្នកនេសាទចំនួន ៣ នៅចំណុចខាងត្បូងកោះតាកៀវស្ថិតក្នុងភូមិអ៊ុងឃុំរាម កាលពីល្ងាចថ្ងៃទី ១៣ ខែ វិច្ឆិកា ឆ្នាំ ២០២១។ នេះបើតាមលោក អ៊ួង វុទ្ធី អធិការស្រុកព្រៃនប់កាលពីព្រឹកថ្ងៃទី ១៥ ខែ វិច្ឆិកា ឆ្នាំ ២០២១។
លោកបានបញ្ជាក់ថា៖ «នៅក្នុងហេតុការណ៍នោះជនរងគ្រោះ២នាក់ត្រូវបានសង្គ្រោះដោយទូកអ្នកនេសាទដូចគ្នា ប៉ុន្តែជនរងគ្រោះម្នាក់ទៀតនៅបាត់ខ្លួននៅឡើយដែលគិតមកទល់ពេលនេះ ២ ថ្ងៃមកហើយទំនងជាត្រូវលង់ទឹកស្លាប់បាត់ទៅហើយ»។
លោក វុទ្ធី បានបន្តថា យោងតាមការបំភ្លឺពីជនរងគ្រោះឈ្មោះ លយ សុខជា អាយុ ២៥ ឆ្នាំ និងឈ្មោះ គង់ សុភា អាយុ ២៥ ឆ្នាំ ដែលត្រូវបានជួយសង្គ្រោះបានអះអាងថា ជនរងគ្រោះដែលបានបាត់ខ្លួនក្នុងករណីលិចទូកនាល្ងាចថ្ងៃនោះ ឈ្មោះ សុខ គឿន ហៅម៉ាប់ អាយុ ២៧ ឆ្នាំ មានលំនៅក្នុងសង្កាត់លេខ ១ ក្រុងព្រះសីហនុ។ ចំណែកសម្ភារបាត់បង់មានទូកនេសាទ ប្រភេទបេអឺ១គ្រឿងពណ៌ត្រួយចេក មានប្រវែងបណ្តោយ ១០,៥០ ម៉ែត្រ ទទឹងប្រវែង ២,៧០ ម៉ែត្រ ម៉ាស៊ីនម៉ាក HYUNDIA (ម៉ាស៊ីនឡាន) ១ គ្រឿង និងឧបករណ៍នេសាទមួយចំនួនទៀត៕
វីដេអូ៖
