បាត់ដំបងៈ ចៅក្រមស៊ីបសួរសាលាដំបូងខេត្តបាត់ដំបង លោក ចាប តុលា កាលពីថ្ងៃទី ១៤ វិច្ឆិកា បានសម្រេចធ្វើការចោទប្រកាន់ និងបញ្ជូន ស្ត្រីម្នាក់ទៅឃុំខ្លួននៅពន្ធនាគារ ខេត្តបាត់ដំបង ពីបទធ្វើទារុណកម្ម និងអំពើឃោឃៅមានស្ថានទម្ងន់ទោស ទាក់ទងទៅនឹងការប្រើអំពើហិង្សា ទៅលើកូនស្រីចិញ្ចឹម។
លោកស្រី ជា ចាន់រស្មី អ្នកនាំពាក្យសាលាដំបូងខេត្តបាត់ដំបង ថ្លែងនៅថ្ងៃទី ១៥ វិច្ឆិកាថា ស្ត្រីម្នាក់ ដែលបានប្រើអំពើហិង្សា លើកូនចិញ្ចឹមជាកុមារីអាយុ៨ឆ្នាំ ត្រូវបានតុលាការសម្រេចឃុំខ្លួនហើយ កាលពីថ្ងៃទី១៤ ខែវិច្ឆិកា។
លោកស្រីបញ្ជាក់ថា ៖«ករណីនេះ ចៅក្រមស៊ីបសួរលោក ចាប តុលា បានសម្រេចឃុំខ្លួន ក្រោមការចោទប្រកាន់ ពីបទទារុណកម្ម និងអំពើឃោឃៅ មានស្ថានទម្ងន់ទោសទាក់ទងជនរងគ្រោះ» ។
សមត្ថកិច្ចនគរបាលខេត្តបាត់ដំបង បានឱ្យដឹងថា ស្ត្រីរូបនេះ ត្រូវបានមន្ត្រីការិយាល័យ ប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបាត់ដំបង ធ្វើការឃាត់ខ្លួននៅថ្ងៃទី ១៣ វិច្ឆិកា ២០២១ ពីបទប្រើអំពើហិង្សា ក្នុងគ្រួសារ ហិង្សាដោយចេតនាមានស្ថានទំនង់ទោស ទាក់ទងទៅនឹងជនរងគ្រោះ ដែលបានកើតឡើងនៅចំណុច ក្រុមទី១២ ភូមិវត្តគ សង្កាត់វត្តគ ក្រុងបាត់ដំបង និងបានបញ្ជូនទៅតុលាការនៅថ្ងៃទី១៤ ខែវិច្ឆិកា។
ស្ត្រីសង្ស័យមានឈ្មោះ អ៊ឹង សុគន្ធី អាយុ៥៧ ឆ្នាំ ចំណែកក្មេងស្រីរងគ្រោះជាកុមារី ឈ្មោះ ឯ .ជ. ធ រស់នៅភូមិ សង្កាត់ជាមួយគ្នា។
សមត្ថកិច្ចបានបញ្ជាក់ថា ក្រោយបញ្ជូនម្តាយចិញ្ចឹមទៅតុលាការ សមត្ថកិច្ចបាននាំយកកុមារីរងគ្រោះទៅឱ្យមន្ទីរសង្គមកិច្ច អតីតយុទ្ធជន និងយុវនីតិសម្បទា ដើម្បីចិញ្ចឹមផ្តល់កន្លែងស្នាក់នៅសមរម្យ និងឱ្យទទួលបានការសិក្សារៀនសូត្រ ដូចក្មេងដទៃទៀត។
យោងតាម មាត្រា ២១៩ នៃក្រមព្រហ្មទណ្ឌចែងថា បទ ស្ថានទម្ងន់ទោសទាក់ទងនឹងជនរងគ្រោះ ត្រូវផ្តន្ទាទោស ដាក់ពន្ធនាគារ ពី២ ទៅ៥ឆ្នាំ និងពិន័យជាប្រាក់ពី ៤លាន ទៅ ១០លានរៀល កាលបើអំពើហិង្សានេះត្រូវបានប្រព្រឹត្តទៅលើ បុគ្គលដែលទន់ខ្សោយពិសេស ដោយមូលហេតុអាយុនៃបុគ្គលនោះ៕
វីដេអូ៖