តាកែវៈក្រុមអាជីវករនៅផ្សារធំខេត្តតាកែវបានសម្ដែងក្ដីរីករាយ ក្រោយពីលោក អ៊ូច ភា អភិបាលខេត្តតាកែវ នៅរសៀលថ្ងៃទី ១៥ ខែ វិច្ឆិកា ឆ្នាំ ២០២១ បានសម្រេចចេញលិខិតមួយច្បាប់ស្ដីពី «ការលុបការសាងសង់ចំនួនតូបបន្ថែម និងជួសជុលផ្សារតាកែវឡើងវិញ» តបតាមការស្នើសុំរបស់ពួកគាត់នាពេលកន្លងមក។
អ្នកស្រី កែវ បុទុមស អាយុ ៤៦ ឆ្នាំ ជាអាជីវករលក់សម្លៀកបំពាក់នៅក្នុងផ្សារនេះ បានប្រាប់ ភ្នំពេញ ប៉ុស្តិ៍ថា ក្រោយពីក្រុមអាជីវករប្រមាណជាង ១០០ នាក់ បានប្រមូលផ្ដុំគ្នាតវ៉ាជាថ្មីម្ដងទៀតនៅមុខសាលាខេត្តតាកែវ នាព្រឹកថ្ងៃទី ១៥ ខែ វិច្ឆិកា ឆ្នាំ ២០២១ នេះ ដើម្បីជំទាស់ទៅនឹងគម្រោងវិនិយោគរបស់ក្រុមហ៊ុនក្នុងស្រុកមួយ ដែលមានផែនការុះរើ និងសាងសង់ផ្សារនេះឡើងវិញ ដោយអះអាងថា ផ្សារនេះមានសភាពចាស់ទ្រុឌទ្រោមទៅហើយ។
អ្នកស្រី បុទុមស បានបន្តថា កាលពីអំឡុងខែកញ្ញាកន្លងទៅថ្មីៗនេះ មានក្រុមហ៊ុនក្នុងស្រុកមួយគេចង់វិនិយោគផ្សារតាកែវ ដែលតាមផែនការបស់ក្រុមហ៊ុននោះគឺចង់រុះរើ និងសាងសង់ផ្សារថ្មីឡើងវិញ ប៉ុន្តែពួកគេមិនបានប្រាប់ឲ្យដឹងថា តើក្រោយពីសាងសង់ផ្សារថ្មីរួច ក្រុមអាជីវករ ដែលមានស្តង់លក់ដូរពីមុនៗមក អាចចូលលក់ដូរនៅក្នុងទីតាំងចាស់របស់ខ្លួនបានឬយ៉ាងណានោះទេ។ លុះក្រោយមកមានការលេចឮពីមាត់មួយទៅមាត់មួយថា ភាគីក្រុមហ៊ុនតម្រូវឲ្យអាជីវករជាម្ចាស់តូបនីមួយៗបង់ប្រាក់ទៅឲ្យក្រុមហ៊ុនក្នុងមួយឆ្នាំ៦លានរៀលដោយមិនទាន់បូកបញ្ចូលនូវសេវាកម្មផ្សេងៗទៀតឡើយ។ ដំណឹងនេះបានធ្វើឲ្យក្រុមអាជីវករទាំងអស់មិនសប្បាយចិត្តហើយបានព្រមព្រៀងគ្នាធ្វើការតវ៉ាជំទាស់កាលពីថ្ងៃទី ៣០ ខែ កញ្ញា ឆ្នាំ ២០២១។
អ្នកស្រី បុទុមស ដែលមានស្តង់លក់សម្លៀកបំពាក់ នៅក្នុងផ្សារនេះចំនួន៣កន្លែង បានបញ្ជាក់ថា៖«នៅព្រឹកមិញនេះ [១៥ វិច្ឆិកា ២០២១] យើងខ្ញុំជាអាជីវករ បាននាំគ្នាទៅតវ៉ាម្ដងទៀត ហើយជាលទ្ធផល គឺឯកឧត្តម អ៊ូច ភា គណៈអភិបាលខេត្តតាកែវ បានសម្រេចយល់ព្រមតាមសំណើរបស់យើងខ្ញុំ ដោយបានចេញលិខិតមួយច្បាប់លុបចោលការសាងសង់តូបបន្ថែម និងជួសជុលផ្សារតាកែវឡើងវិញ។ ការសម្រេចនេះ ធ្វើឲ្យយើងខ្ញុំជាអាជីវកររីករាយខ្លាំងណាស់»។
ស្រដៀងគ្នានេះ អាជីវករលក់សាច់ជ្រូកក្នុងផ្សារនេះដែរ គឺអ្នកស្រី តាំង ស្រ៊ូយ បានថ្លែងថា ការសម្រេចរបស់រដ្ឋបាលខេត្តតាកែវ នាពេលនេះ បានបង្ហាញថា អាជ្ញាធរបានពិនិត្យ និងគាំទ្រលើសំណើរបស់ប្រជាពលរដ្ឋជាអាជីវករ។
អ្នកស្រីថ្លែងថា៖ «ខ្ញុំសប្បាយចិត្តណាស់នាពេលនេះ ហើយយើងសង្ឃឹមថាអាជ្ញាធរនឹងមិនមានការកែប្រែអ្វីទៀតឡើយ»។
យ៉ាងណាក៏ដោយ នៅក្នុងលិខិតចុះថ្ងៃទី ១៥ ខែ វិច្ឆិកា ឆ្នាំ ២០២១ របស់រដ្ឋបាលខេត្តតាកែវស្ដីពី «ការលុបការសាងសង់តូបបន្ថែម និងជួសជុលផ្សារតាកែវឡើងវិញ» លោក អ៊ូច ភា អភិបាលខេត្តតាកែវ បានបញ្ជាក់ថា រដ្ឋបាលខេត្តតាកែវ នឹងធ្វើសំណើទៅក្រសួងសេដ្ឋកិច្ចនិងហិរញ្ញវត្ថុដើម្បីស្នើសុំគោលការណ៍លុបចោលការសាងសង់ផ្សារតាកែវ ទៅតាមសំណូមពរ របស់បងប្អូនអាជីវករផ្សារតាកែវ។
នៅក្នុងលិខិតដដែលនោះ លោក អ៊ូច ភា បានបញ្ជាក់បន្ថែមថា៖ «រដ្ឋបាលខេត្តនឹងរាយការណ៍អំពីសំណូមពររបស់បងប្អូនដែលស្នើសុំមិនឲ្យសាងសង់ចំនួនតូបបន្ថែម និងជួសជុលផ្សារតាកែវឡើងវិញនេះទៅក្រសួងសេដ្ឋកិច្ច និង ហិរញ្ញវត្ថុ ដើម្បីស្នើសុំគោលការណ៍លុបចោលការសាងសង់»៕
វីដេអូ៖