ភ្នំពេញៈបេក្ខជន ៣ រូប ក្នុងចំណោមបេក្ខជនជិត ២០០ រូប បានឈ្នះជយលាភីក្នុងកម្មវិធីប្រកួតគូរ និងរចនារូបភាព ស្ដីពីផលប៉ះពាល់នៃគ្រឿងស្រវឹង និងវិធានការមានប្រសិទ្ធភាពក្នុងការកាត់បន្ថយការប្រើប្រាស់គ្រឿងស្រវឹង ដោយយុវជនទាំងនេះ សំណូមពរឱ្យមានការហាមឃាត់ការផ្សាយពាណិជ្ជកម្មគ្រឿងស្រវឹង។
កម្មវិធីប្រគល់រង្វាន់ជយលាភី និងការប្រកួតគូរ និងរចនារូបភាពស្ដីពីផលប៉ះពាល់នៃការប្រើប្រាស់គ្រឿងស្រវឹង ត្រូវបានរៀបចំឡើង ដោយក្រសួងអប់រំ យុវជន និងកីឡា សហការជាមួយអង្គការចលនាដើម្បីសុខភាពកម្ពុជា ហៅកាត់ CMH កាលពីថ្ងៃទី ១៥ វិច្ឆិកា ឆ្នាំ ២០២១។
ក្រសួងអប់រំ បានឱ្យដឹងថា កម្មវិធីនេះ គឺធ្វើឡើងដើម្បីជាការលើកទឹកចិត្តដល់ជយលាភី ដែលមានសមត្ថភាពបកស្រាយបានស៊ីជម្រៅ និងក្បោះក្បាយ លើប្រធានបទតាមរយៈរូបគំនូរ ក៏ដូចជាការលើកទឹកចិត្តមួយដែលបេក្ខជន បានរួមចំណែក ជួយបំផុសការយល់ដឹង អំពីផលប៉ះពាល់ នៃការប្រើប្រាស់គ្រឿងស្រវឹង ដល់សិស្សនិស្សិតនិងយុវជន និងគាំទ្រឱ្យមានវិធានការមានប្រសិទ្ធភាព ក្នុងការកាត់បន្ថយគ្រោះថ្នាក់ ដែលបណ្ដាលមកពីការប្រើប្រាស់គ្រឿងស្រវឹងក្នុងចំណោមសិស្សនិស្សិតនិងយុវជន។
ក្រសួងបានបញ្ជាក់ថា ការប្រកួតពានរង្វាន់នេះគឺមានយុវជន ចំនួន ១៧៥ នាក់ បានផ្ញើស្នាដៃគំនូរមកកាន់គណៈកម្មការ ហើយស្នាដៃគំនូរទាំងនេះ ត្រូវបានឆ្លងកាត់ការជម្រុះជាបន្តបន្ទាប់ រហូតរកឃើញស្នាដៃល្អបំផុតចំនួន៥ ឆ្លងចូលវគ្គផ្ដាច់ព្រ័ត្រ។
ក្រសួងបន្តថា៖ «ម្ចាស់ជយលាភីទាំង ៥ នេះ ត្រូវបានបកស្រាយនូវខ្លឹមសារគំនូររបស់ខ្លួននៅព្រឹកថ្ងៃទី ០៨ វិច្ឆិកា ឆ្នាំ ២០២១ តាមប្រព័ន្ធអនឡាញ (zoom) រហូតគណៈកម្មការជ្រើសរើសបានជយលាភីលេខ ១ លេខ ២ និងលេខ ៣ ដែលជយលាភីលេខ១ បានទៅលើយុវជន ជ័រ ម៉េងស៊ាង មកពីខេត្តព្រះសីហនុ ជ័យលាភីលេខ២ យុវជន ជា វង្សនរិន្ទ មកខេត្តសៀមរាប ជ័យលាភីលេខ៣ យុវនារី នី ស្ទីនណា មកពីខេត្តស្ទឹងត្រែង»។
លោកស្រី សឿ សុជាតា អនុរដ្ឋលេខាធិការ ក្រសួងអប់រំ ដែលដឹកនាំការប្រកួតនេះ បានថ្លែងថា កម្មវិធីប្រកួតគូរគំនូរនេះ ចង់បំផុសការយល់ដឹង អំពីផលប៉ះពាល់នៃការប្រើប្រាស់គ្រឿងស្រវឹង ដល់សិស្សនិស្សិតនិងយុវជន និងគាំទ្រឱ្យមានវិធានការ មានប្រសិទ្ធភាព ក្នុងការកាត់បន្ថយគ្រោះថ្នាក់ ដែលបណ្ដាលមកពីការប្រើប្រាស់គ្រឿងស្រវឹងក្នុងចំណោមសិស្សនិស្សិតនិងយុវជន។
តាមសេចក្តីប្រកាសរបស់ អង្គការចលនា ដើម្បីសុខភាពកម្ពុជា បានឲ្យដឹងថា ផ្ទាំងគំនូរជយលាភីទាំង៣ គឺកើតចេញពីឆន្ទៈរបស់យុវជន ដែលប្រឡងប្រណាំងគូរគំនូរ បង្ហាញពីផលប៉ះពាល់យ៉ាងធ្ងន់ធ្ងរ នៃគ្រឿងស្រវឹង។
ជាមួយនឹងការបង្ហាញពីផលប៉ះពាល់នេះ សេចក្តីប្រកាសបានបញ្ជាក់ថា យុវជនទាំងនោះ ក៏សំណូមពរឱ្យមានវិធានការហាមឃាត់ការផ្សាយពាណិជ្ជកម្មគ្រឿងស្រវឹង ដើម្បីចៀសវាងការទាក់ទាញយុវជនឱ្យធ្លាក់ទៅក្នុងការញៀនគ្រឿងស្រវឹងផងដែរ។
សេចក្តីប្រកាស បានបញ្ជាក់ថា៖ «វិធានការមានប្រសិទ្ធភាពក្នុងការកាត់បន្ថយផលប៉ះពាល់បង្កដោយការប្រើប្រាស់គ្រឿងស្រវឹង ដែលលើកឡើងដោយអង្គការសុខភាពពិភពលោកមាន ១ ហាមឃាត់ការផ្សាយពាណិជ្ជកម្មគ្រឿងស្រវឹង ២ ដំឡើងពន្ធគ្រឿងស្រវឹង ៣ កំណត់អាយុដែលអាចទិញនិងប្រើប្រាស់គ្រឿងស្រវឹង និង ៤ កាត់បន្ថយភាពងាយរកបាននៃគ្រឿងស្រវឹង»។
ការប្រើប្រាស់គ្រឿងស្រវឹង បង្កឱ្យមានជំងឺជាង ២០០ មុខ ហើយជាកត្តាចម្បង បង្កឱ្យមានគ្រោះថ្នាក់ចរាចរណ៍ជាកត្តាហានិភ័យ ជំរុញឱ្យមានអំពើហិង្សាគ្រប់ប្រភេទ ព្រមទាំងភាពក្រីក្រ។
គ្រឿងស្រវឹង ជាមូលហេតុចម្បងដែលបណ្ដាលឱ្យមានអ្នកស្លាប់ប្រមាណ ៣លាននាក់ក្នុងមួយឆ្នាំ។ នេះបើយោងតាមអង្គការសុខភាពពិភពលោក។
យុវជនជ័យលាភីលេខ ១ ជ័រ ម៉េងស៊ាង បានប្រាប់ ភ្នំពេញ ប៉ុស្តិ៍ នៅថ្ងៃទី ១៥ វិច្ឆិកាថា ការដែលខ្លួនចូលរួមក្នុងកម្មវិធីនេះ ដោយសារតែមើលឃើញពីបញ្ហាគ្រឿងស្រវឹង ដែលបង្កគ្រោះថ្នាក់ដល់សង្គមជាតិ នៅក្នុងប្រទេសកម្ពុជា មានការកើនឡើងពីមួយថ្ងៃទៅមួយថ្ងៃ។ ជាងនេះទៅទៀតនោះ ការផ្សព្វផ្សាយពីផលិតផលគ្រៀងស្រវឹង ក៏កំពុងតែមានឥទ្ធពលខ្លាំងក្លា ដែលធ្វើឱ្យយុវជនកម្ពុជា ឈ្លក់វង្វេង។
យុវជនជ័យលាភីរូបនេះ សង្ឃឹមថា តាមរយៈផ្ទាំងគំនូរ និងខ្លឹមសារដែលខ្លួនបានបង្ហាញក្នុងកម្មវិធីនេះ នឹងអាចចូលរួមចំណែកជាមួយស្ថាប័នពាក់ព័ន្ធ ដើម្បីជំរុញឱ្យមានវិធានការបន្ថែមទៀត លើការផ្សព្វផ្សាយផលិតផលគ្រឿងស្រវឹង។
ម៉េងស៊ាង បញ្ជាក់ថា៖«ក្នុងនាមខ្ញុំ ជាជយលាភីលេខ១នេះ នឹងប្តេជ្ញាចិត្តថា ជាពិសេសខ្លួនឯង នឹងធ្វើឱ្យខ្លួនឯងមិនប្រើប្រាស់គ្រឿងស្រវឹងជាដាច់ខាត។ ការផ្សព្វផ្សាយនេះ នឹងបន្តជំរុញទៅដល់គ្រួសារខ្ញុំ និងសង្គមជាតិទៀតផង។ ខ្ញុំ ក៏ចង់សំណូមពរឱ្យស្ថាប័នពាក់ព័ន្ធ បង្កើតកម្មវិធីអប់រំ ពីបញ្ហាគ្រឿងស្រវឹងឱ្យធំជាងនេះ ដើម្បីជំរុញឱ្យពលរដ្ឋ មានការភ្ជាក់រលឹក»៕