.jpg)
គម្រោងអគាររដ្ឋបាលរដ្ឋសភាដែលត្រូវប្រកាសដាក់ឱ្យដេញថ្លៃសាងសង់។ រូបថត រដ្ឋសភា
ភ្នំពេញៈ រដ្ឋសភាកម្ពុជាបានប្រកាសដាក់ឱ្យដេញថ្លៃសម្រាប់គម្រោងសាងសង់អគាររដ្ឋបាលរដ្ឋសភា ក្រោមជំនួយឥតសំណងចំនួន ២៥ លានដុល្លារសហរដ្ឋអាមេរិក ដែលជាជំនួយរបស់រដ្ឋាភិបាលនៃសាធារណរដ្ឋសង្គមនិយមវៀតណាម ដោយកាលបរិច្ឆេទឈប់ទទួលសំណើដេញថ្លៃនៅត្រឹមថ្ងៃទី ២៧ ខែវិច្ឆិកា។
សេចក្តីជូនដំណឹងស្តីពីការអញ្ជើញឱ្យចូលរួមដេញថ្លៃ សម្រាប់គម្រោងសាងសង់អគាររដ្ឋបាលថ្មីរបស់រដ្ឋសភា ចុះថ្ងៃទី ១២ វិច្ឆិកា បានឱ្យដឹងថា រដ្ឋាភិបាលកម្ពុជាបានទទួលជំនួយឥតសំណងចំនួន ២៥ លានដុល្លារសហរដ្ឋអាមេរិកពីរដ្ឋាភិបាលនៃសាធារណរដ្ឋសង្គមនិយមវៀតណាម ដើម្បីអនុវត្តគម្រោងសាងសង់អគាររដ្ឋបាលរដ្ឋសភាថ្មីនេះ។
សម្រាប់កាលបរិច្ឆេទឈប់ទទួលសំណើដេញថ្លៃ គឺនៅថ្ងៃទី ២៧ វិច្ឆិកា ឆ្នាំ ២០២១ ឬឱ្យបានមុនថ្ងៃទី ២៧ វិច្ឆិកា បន្ទាប់ពីថ្ងៃប្រកាសផ្សព្វផ្សាយ ដែលបណ្តាក្រុមហ៊ុនដែលមានបំណងចូលរួមដេញថ្លៃគម្រោងនេះ អាចយកពាក្យមកដាក់នៅបន្ទប់កោះកេរនៃអគ្គលេខាធិការដ្ឋានរដ្ឋសភារៀងរាល់ម៉ោងធ្វើការ។
សេចក្តីប្រកាសបញ្ជាក់ថា៖ «ពេលនេះអគ្គលេខាធិការដ្ឋានរដ្ឋសភាកម្ពុជា អញ្ជើញអ្នកដេញថ្លៃដែលមានលក្ខណសម្បត្តិគ្រប់គ្រាន់ ដើម្បីសាងសង់អគាររដ្ឋបាលថ្មីនៃរដ្ឋសភាកម្ពុជា ដែលមានទីតាំងស្ថិតនៅក្នុងបរិវេណរដ្ឋសភា។ លទ្ធកម្មនឹងធ្វើឡើងតាមរយៈការដេញថ្លៃប្រកួតប្រជែងអន្តរជាតិ ICB ដោយអនុលោមតាមដំណាក់កាលតែមួយស្របតាមស្តង់ដាដេញថ្លៃរបស់រដ្ឋាភិបាលកម្ពុជា»។
លោក ឡេង ប៉េងឡុង អ្នកនាំពាក្យរដ្ឋសភាបានប្រាប់ ភ្នំពេញ ប៉ុស្តិ៍ នៅថ្ងៃទី ១៤ វិច្ឆិកាថា អគាររដ្ឋបាលថ្មីរដ្ឋសភានេះនឹងត្រូវសាងសង់លើផ្ទៃដីទំហំទទឹង ២៧ ម៉ែត្រ និងបណ្តាយ ៤៩ ម៉ែត្រ ដែលមានកម្ពស់ ១២ ជាន់។ អគារថ្មីនេះមានចំណតឡាន ២ ជាន់ខាងក្រោម និងសាលប្រជុំធំតូចចំនួន ៤ ជាន់ ខណៈជាន់លើៗគឺជាបន្ទប់ធ្វើការរបស់បុគ្គលិក និងតំណាងរាស្ត្រ។
អគាររដ្ឋបាលថ្មីនេះ គឺមានរំលេចពីរចនាប័ទ្មខ្មែរពីខាងមុខច្រកចេញ-ចូល ហើយការរចនាដទៃទៀត គឺធ្វើឡើងតាមរយៈលក្ខណៈបច្ចេកទេស ដោយមានការសហការជាមួយអ្នកជំនាញ និងឆ្លងយោបល់ពីរដ្ឋសភា។
លោក ប៉េងឡុង បានបញ្ជាក់ថា៖ «អគានេះ គឺមានរចនាប័ទ្មខ្មែរ ដោយយើងធ្វើរចនាប័ទ្មខ្មែរយើងធ្វើពីខាងមុខ ព្រោះតែទីតាំងយើងតូច ហើយអគារមានលក្ខណៈ ៤ ជ្រុង អ៊ីចឹងយើងមិនអាចធ្វើជាក្បាច់ក្បូរនោះទេ។ យើងដាក់រចនាប័ទ្មខ្មែរនៅពីមុខ គឺមានរំលេចសសរមាស និងសសរពេជ្រ និងរចនាប័ត្មខ្មែរមួយចំនួនជាមួយនឹងក្លោងទ្វារ»។
ជាមួយនឹងគម្រោងសាងសង់អគារថ្មីនេះ លោក ឡេង ប៉េងឡុង បញ្ជាក់ថា ចំពោះអគាររដ្ឋសភាចាស់ គឺនឹងនៅតែដាក់ដំណើរការជាធម្មតា ហើយក្រោយអគារថ្មីសាងសង់រួចរាល់ រដ្ឋសភា នឹងធ្វើការជួសជុលអគារចាស់សព្វថ្ងៃ ដើម្បីរក្សាគុណភាព និងសោភណភាព។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាសាទរចំពោះរដ្ឋសភា ដែលមានគំនិតច្នៃប្រឌិតផ្នែកស្ថាបត្យកម្មបែបទំនើបក្នុងការរចនាសំណង់អគាររដ្ឋបាលថ្មីរបស់រដ្ឋសភានេះ។
ប៉ុន្តែលោកយល់ថា ភាពច្នៃប្រឌិតនេះ គួរតែមានការបង្កប់រចនាប័ទ្មខ្មែរឱ្យបានច្រើនបន្ថែមទៀត ដើម្បីកុំឱ្យដាច់ឆ្ងាយពីប្រពៃណីទំនៀមទម្លាប់ ឬមរតកវប្បធម៌របស់ខ្មែរ ពីព្រោះការបង្ហាញពីរចនាប័ទ្មខ្មែរលើអគាររបស់រដ្ឋ គឺបង្ហាញពីគុណតម្លៃរបស់ខ្មែរ ដែលស្ថាប័នក្រសួងនីមួយៗ គួរយកចិត្តទុកដាក់។
បើអគារនៅក្នុងស្ថាប័នមួយ មានរចនាប័ទ្មបែបខ្មែរលាយជាមួយអគារខ្លះ ដែលមានរចនាប័ទ្មបែបទំនើបចាកឆ្ងាយពីគ្នាពេកនឹងធ្វើឱ្យស្ថាប័នទាំងនោះ មានលក្ខណៈច្របូកច្របល់ និងមិនបង្ហាញពីគុណតម្លៃរបស់ស្ថាប័នជាតិនោះទេ។
លោកបានបញ្ជាក់ថា៖ «ជាការពិតរដ្ឋសភា គឺជាស្ថាប័នជាតិកំពូលមួយ ដែលធ្វើកិច្ចការងារ ដើម្បីបម្រើប្រយោជន៍ជាតិ ហើយទាំងអគារ ទាំងដំណើរការនៃការធ្វើកិច្ចការ គឺសុទ្ធតែបង្កប់នូវលក្ខណៈជាតិ ស្មារតីជាតិ ប្រយោជន៍ជាតិ។ ក្នុងនោះដែរ ខ្ញុំជឿថា បើយើងធ្វើអគារ ដែលមានកន្លែងធ្វើការសម្រាប់តំណាងរាស្ត្រ និងបុគ្គលិករដ្ឋបាលសម្រាប់ស្ថាប័ននេះទាំងមូល ក៏វាគួរតែបង្កប់នូវរចនាប័ទ្មបែបខ្មែរផងដែរ ដើម្បីជាការឱ្យតម្លៃលើកកម្ពស់អភិរក្សវប្បធម៌ខ្មែរយើង»៕
វីដេអូ៖
