The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ថា ដំណើរការ​ប្រឡង​ឌីប្លូម​​នៅ​ឆ្នាំនេះ​ អាច​ទទួល​យក​បាន

មន្ត្រី​ថា ដំណើរការ​ប្រឡង​ឌីប្លូម​​នៅ​ឆ្នាំនេះ​ អាច​ទទួល​យក​បាន

Content image - Phnom Penh Post
សកម្មភាព​ត្រួតពិនិត្យ​សិស្ស​ចូល​ប្រឡង​សញ្ញាបត្រ​មធ្យមសិក្សា​បឋមភូមិ នៅ​មណ្ឌល​វិទ្យាល័យ​ទួលទំពូង​កាលពី​ថ្ងៃ​ម្សិលមិញ​។ ហ៊ាន រង្សី

មន្ត្រី​ថា ដំណើរការ​ប្រឡង​ឌីប្លូម​​នៅ​ឆ្នាំនេះ​ អាច​ទទួល​យក​បាន

ភ្នំពេញៈ មន្ដ្រី​នៃ​ក្រសួង​អប់រំ-យុវជន និង​កីឡា អះអាងថា ដំណើរ​ការប្រឡង​សញ្ញាបត្រ​មធ្យមសិក្សា​បឋមភូមិ​ (​ថ្នាក់ទី​ ៩) ​នៅ​ឆ្នាំនេះ​កំពុង​ប្រព្រឹត្ត​ទៅតាម​ការគ្រោងទុក​ ដែល​មាន​លទ្ធផល​អាច​ទទួល​យកបាន ខណៈ​មាន​សិស្សសាលា​រដ្ឋ និង​ឯកជន​ជាង​ ១៦ ​ម៉ឺន​នាក់​នៅ​ទូទាំង​ប្រទេស​បាន​ចូលរួម​ប្រឡង​ចាប់ពី​ថ្ងៃទី​ ១៥ ដល់​​ថ្ងៃទី​ ១៦ ខែវិច្ឆិកា​នេះ​។

លោក រស់ សុវាចា អ្នកនាំពាក្យ​ក្រសួង​អប់រំ​បាន​ប្រាប់ ​ភ្នំពេញ ​ប៉ុស្ដិ៍ ​នៅ​ថ្ងៃទី​ ១៥ វិច្ឆិកា​នេះ​ថា ជាទូទៅ​ដំណើរការ​ប្រឡង​ឌីប្លូម​នា​ថ្ងៃ​ ១៥ ​វិច្ឆិកា បាន​ប្រព្រឹត្ត​ទៅតាម​ការគ្រោងទុក​ដោយ​​មាន​លទ្ធផល​អាច​ទទួល​យកបាន​។

លោក​បាន​ថ្លែងថា​៖ «​ការប្រឡង​ឌីប្លូម​ត្រូវ​បន្ត​អនុវត្ត​គោលការណ៍​ច្បាប់ យុត្តិធម៌ តម្លាភាព និង​លទ្ធផល​ទទួល​យក​បាន​ស្រប​នឹង​វិធានការ​សុវត្ថិភាព​សុខភាព​»​។

លោក​បានឱ្យដឹងថា សិស្ស​ប្រឡង​ឌីប្លូម​ឆ្នាំនេះ សរុប​មាន ១៦២ ៥៨៩ ​នាក់ (​នារី ៨៧ ៨៧១ ​នាក់​)​។ ​ចំនួន​មណ្ឌល​ប្រឡង​មាន​ចំនួន​ ១ ៧២២ និង​បន្ទប់​ប្រឡង​មាន ៧ ៣២៧​។

លោ ហែម ស៊ីណារ៉េត ប្រធាន​មន្ទីរអប់រំ យុវជន និង​កីឡា រាជធានី​ភ្នំពេញ បានឱ្យ​ដឹង​ដែរ​ថា ដំណើរការ​ប្រឡង​ឌីប្លូម​នា​ថ្ងៃ​ ១៥ វិច្ឆិកា​នេះ គឺមាន​ដំណើរការ​ធម្មតា មិនមាន​បញ្ហា​អ្វី​កើតឡើង​គួរឱ្យ​កត់សម្គាល់​នោះទេ តែមាន​មណ្ឌល​ប្រឡង​មួយ​នៅ​វិទ្យាល័យ​ជម្ពូវ័ន​មានទឹក​លិច​​បន្តិច ដោយសារ​ទឹកភ្លៀង ប៉ុន្ដែ​មិន​ប៉ះពាល់​ដល់​ការប្រឡង​ទេ​។

លោក​បានឱ្យ​ដឹងថា តាម​មណ្ឌល​នីមួយៗ​បាន​អនុវត្តតាម​ការណែនាំ​បាន​ល្អប្រសើរ​។ គ្រប់​ច្រកចូល​ក្នុង​មណ្ឌល​មាន​ឧបករណ៍​បាញ់​អាល់កុល និង​វាស់​កម្ដៅ​។ ​គ្រប់​មណ្ឌល​ប្រឡង​ទាំងអស់​សុទ្ធតែ​មាន​រៀបចំ​បន្ទប់​បម្រុង​សម្រាប់​ដាក់​បេក្ខជន​ប្រឡង​ដែល​បាន​វាស់​កម្ដៅ​លើសពី​ ៣៧,៥ អង្សាសេ​ឡើង​​ទៅ ហើយ​លោកគ្រូ អ្នកគ្រូ សិស្សានុសិស្ស​សុទ្ធតែ​ពាក់​ម៉ាស់​។ ​

លោក​បញ្ជាក់ថា​៖ «​សម្រាប់​​ការប្រឡង​នៅ​ថ្ងៃទី​ ១៥ ខែវិច្ឆិកា ឆ្នាំ​ ២០២១​នេះ គ្រប់​មណ្ឌល​ដំណើរការ​ធម្មតា ពុំមាន​បញ្ហា​អ្វី​គួរឱ្យ​កត់សម្គាល់​ទេ​»​។

បើតាម​លោក ស៊ីណារ៉េត ចំនួន​បេក្ខជន​ប្រឡង​សរុប​នៅ​រាជធានី​ភ្នំពេញ​មាន ១៥ ៨៥៨ ​នាក់​ក្នុង​នោះ​មាន​ស្រី ៨ ១០៦ នាក់​។ មាន​មណ្ឌល​ប្រឡង​ចំនួន ៦៣ ​មណ្ឌល និង​បន្ទប់​ប្រឡង​ចំនួន ៦៦៤ ​បន្ទប់​។ ចំនួន​នេះ​គឺមាន​ប្រហាក់ប្រហែល​ទៅនឹង​ចំនួន​សិស្ស​ជាប់​ដោយ​ស្វ័យប្រវត្ដិ​កាលពី​ឆ្នាំ​ ២០២០​។

យុវតី​ម្នាក់​ឈ្មោះ ប៊ុនធៀន ម៉ូលីកា ដែល​កំពុង​ប្រឡង​នៅ​មណ្ឌល​ប្រឡង​មួយ​ក្នុង​រាជធានីភ្នំពេញ​បានឱ្យដឹងថា នៅ​ថ្ងៃ​ប្រឡង​ដំបូង​លើ​វិញ្ញាសា​តែងសេចក្ដី បន្ទប់​ប្រឡង​របស់​កញ្ញា​បាន​ចេញ​វិញ្ញាសា​ក្រោម​ប្រធាន «​សាមគ្គីរស់ បែកបាក់​សាមគ្គី​ស្លាប់​» ដែល​មុខវិជ្ជា​នេះ​កញ្ញា​​អះអាង​ថា​មាន​ភាពងាយស្រួល និង​អាច​សរសេរ​បាន​ច្រើន​។

យុវតី​រូបនេះ​បាន​បញ្ជាក់ថា​៖ «​វិញ្ញាសា​លើ​មុខវិជ្ជា​តែងសេចក្ដី​ជា​ភាសា​ខ្មែរ​នេះ​ ខ្ញុំ​សរសេរ​លើកឡើង​តែ​បញ្ហា​កើតឡើង​ក្នុងសង្គម​ផ្ទាល់​តែប៉ុណ្ណោះ​»​។

ប៉ុន្ដែ ម៉ូលីកា អះអាងថា វិញ្ញាសា​ទី​ ២ គីមីវិទ្យា បានចេញ​ចំនួន ២ ​លំហាត់ គឺមាន​ការលំបាក ហើយ​រយៈពេល​ក្នុង​ការធ្វើ​គឺ​ត្រឹម ៣០ ​នាទី​ប៉ុណ្ណោះ ដែល​សិស្ស​ភាគច្រើន​ធ្វើ​មិនបាន​រួចរាល់​ទេ​។

ចំណែក​យុវតី​ម្នាក់ទៀត ឈ្មោះ គៀង មួយខេង កំពុង​ប្រឡង​នៅ​មណ្ឌល​ប្រឡង​នៅ​រាជធានី-ភ្នំពេញ​ដែរនោះ ក៏បាន​អះអាង​​ថា វិញ្ញាសា​គីមី នៅ​បន្ទប់​ប្រឡង​របស់​កញ្ញា​ក៏មាន​ការលំបាក​ខ្លះ​ដែរ​។

កញ្ញា​ប្រាប់ថា​៖ «​វិញ្ញាសា​គីមី​មួយ ក្នុង​ចំណោម​ ២ ​លំហាត់ ខ្ញុំ​ធ្វើបាន​តែមួយ​លំហាត់​ទេ ហើយ​ធ្វើ​មិនទាន់​រួច​ស្រួលបួល​ផង​ដល់​ម៉ោង​គ្រូ​មក​ប្រមូល​វិញ្ញាសា​ទៀត​»​។

មួយខេង បានឱ្យដឹងថា នៅ​​ក្នុង​លំហាត់​ទី​ ២ វិញ្ញាសា​គីមីវិទ្យា គឺ​ចេញ​ប្រធានបទ​ទាក់ទង​នឹង​ការរក​ម៉ាស់​ម៉ូល​របស់​អំបិល ដែល​មុខ​វិជ្ជា​នេះ កាល​រៀន​នៅ​សាលា គឺ​គ្រូបង្រៀន​បាន​តិច​។

បើតាម​សេចក្ដី​ណែនាំ​របស់​ក្រសួង​អប់រំ ការប្រឡង​ឌីប្លូម​ឆ្នាំ​សិក្សា​ ២០២០-២០២១ ​នេះ​ក្រសួង​បន្ត​ប្រគល់​សិទ្ធិអំណាច និង​ការទទួល​ខុសត្រូវ​ទាំងស្រុង​ជូន​គ្រឹះស្ថាន​មធ្យមសិក្សា​នីមួយៗ​​រៀបចំ​ការប្រឡង​ចាប់តាំងពី​ការរៀបចំ​ប្រធាន​វិញ្ញាសា ដំណើរការ​សំណេរ កំណែ ស្រង់​បូក​ពិន្ទុ និង​ការប្រកាស​លទ្ធផល​នៅតាម​គ្រឹះស្ថាន​មធ្យមសិក្សា​នីមួយៗ​។

វិញ្ញាសា​ប្រឡង​ឌីប្លូម​ ២ ​ថ្ងៃនេះ​មាន​ចំនួន ១១ មុខវិជ្ជា រួមមាន តែងសេចក្ដី សរសេរ​តាម​អាន គណិតវិទ្យា រូបវិទ្យា គីមីវិទ្យា ជីវវិទ្យា ផែនដីវិទ្យា និង​បរិស្ថាន សីលធម៌ ពលរដ្ឋ​វិជ្ជា ភូមិវិទ្យា ប្រវត្ដិវិទ្យា និង​ភាសាបរទេស​។

ការប្រឡង​ឌីប្លូម​កាលពី​ឆ្នាំ​ ២០២០ ​ក្រសួង​អប់រំ​បាន​សម្រេច​​ឱ្យ​បេក្ខជន​ចុះឈ្មោះ​ប្រឡង​ជាប់​ជា​ស្ថាពរ​ដោយ​គ្មាន​ការកំណត់​និទ្ទេស ដោយ​អនុវត្ដ​តាម​អនុសាសន៍​របស់​លោក ហ៊ុន សែន នាយករដ្ឋមន្ត្រី​កម្ពុជា​៕

វីដេអូ៖

អត្ថបទគួរចាប់អារម្មណ៍