ភ្នំពេញៈ កូនឈើចម្រុះប្រភេទប្រណីតជាង ៩ ពាន់ដើម កាលពីចុងសប្តាហ៍ត្រូវបានអាជ្ញាធរជាតិអប្សរាបន្តចែកជូនប្រជាពលរដ្ឋរស់នៅជុំវិញតំបន់ប្រាសាទអង្គរវត្ត និងតាមស្ថាប័នរដ្ឋ ឯកជន នៅខេត្តសៀមរាប។ ចាប់តាំងពីឆ្នាំ ២០០៤ មកអាជ្ញាធរជាតិអប្សរាបានដាំកូនឈើក្នុងបរិវេណតំបន់ប្រាសាទអង្គរវត្តបានចំនួនជាង ២ លានដើម រួមនឹងការចែកជូនប្រជាពលរដ្ឋបានរាប់ម៉ឺនដើមផង។
លោក ឡុង កុសល អ្នកនាំពាក្យអាជ្ញាធរជាតិអប្សរាប្រាប់ ភ្នំពេញ ប៉ុស្តិ៍ នៅថ្ងៃទី ១៦ វិច្ឆិកាថា អាជ្ញាធរជាតិអប្សរា កាលពីថ្ងៃទី ១៣ វិច្ឆិកា បានបន្តចែកកូនឈើប្រណីតដល់ប្រជាពលរដ្ឋរស់នៅជុំវិញតំបន់ប្រាសាទអង្គរវត្តចំនួន ៩ ៣១០ ដើម។ កូនឈើទាំងនោះមានដូចជាដើមឈើទាល ដើមគ្រញូង ដើមគគីរ ដើមនាងនួន ដើមធ្នង់ រួមនឹងកូនឈើប្រណីតផ្សេងៗទៀត។
លោកបន្តថា ការចែកកូនឈើរបស់អាជ្ញាធរជាតិអប្សរានេះមិនសំដៅតែប្រជាពលរដ្ឋទេ ប៉ុន្តែក៏មាននៅតាមបណ្តាអង្គភាពរដ្ឋផ្សេងៗតាមសាលារៀន។ ក្រៅពីនេះ ក៏មានចែកជូនដល់ក្រុមហ៊ុនឯកជនផងដែរ ដែលគាត់យកទៅដាំនៅតាមទីតាំងណាដែលមានអំណោយផលដល់ការលូតលាស់របស់កូនឈើ។ ជាពិសេសនោះ គឺអាជ្ញាធរជាតិអប្សរា មានបំណងអប់រំប្រជាពលរដ្ឋដែលរស់នៅក្នុងតំបន់ និងនៅជុំវិញប្រាសាទអង្គរវត្ត ឱ្យមានស្មារតីចេះស្រឡាញ់ព្រៃឈើ និងចេះដាំកូនឈើដើម្បីជាការចូលរួមចំណែកក្នុងការលើកនូវគុណតម្លៃរបស់រមណីយដ្ឋានប្រាសាទអង្គរវត្ត។
លោកថ្លែងថា៖«យើងចង់ឱ្យប្រជាពលរដ្ឋយើង ចូលរួមលើកកម្ពស់គម្របព្រៃឈើបរិស្ថាន។ យើងចង់ឱ្យគាត់រួមចំណែកនូវគុណតម្លៃលេចធ្លោរបស់ប្រាសាទអង្គរវត្ត គឺបរិស្ថាននៅជុំវិញប្រាសាទអង្គរវត្តនេះឯង»។
លោកបន្ថែមថា៖«យើងលើកទឹកចិត្ត ឱ្យពលរដ្ឋរស់នៅជុំវិញរមណីយដ្ឋានអង្គរវត្តឱ្យចូលរួមជាមួយយើង។ អ្វីដែលសំខាន់ គឺការលើកកម្ពស់គម្របព្រៃឈើក្នុងព្រះរាជាណាចក្រកម្ពុជាយើង»។
លោកកុសលបញ្ជាក់ថា ការងារចែកកូនឈើនេះ គឺអាជ្ញាធរអប្សរាចាប់ផ្តើមតែនៅរដូវភ្លៀងធ្លាក់ ហើយកម្មវិធីចែកកូនឈើនេះគឺខាងអាជ្ញាធរអប្សរា បានធ្វើជាបន្តបន្ទាប់ជាច្រើនលើកមកហើយ។ ប៉ុន្តែលោកមិនបានចាំថា កូនឈើដែលចែកជូនពលរដ្ឋមានចំនួនសរុបប៉ុន្មានដែរនោះទេ។ ពេលនេះនៅតាមតំបន់ប្រាសាទអង្គរវត្តសម្បូរទៅដោយដើមឈើ ទាំងដើមឈើដែលមានអាយុកាលរាប់រយឆ្នាំ និងទាំងដើមឈើដែលអាជ្ញាធរជាតិអប្សរាទើបតែដាំ គឺមានវត្តមានចម្រុះគ្នា។
បើតាមលោក ឡុង កុសល ពាក់ព័ន្ធនឹងការចំណាយលើកការបណ្តុះកូនឈើវិញ គឺជាថវិការបស់រាជរដ្ឋាភិបាល ហើយអាជ្ញាធរជាតិអប្សរាមានសួនសម្រាប់បណ្តុះកូនឈើដោយខ្លួនឯង។ ចំពោះសួនបណ្តុះកូនឈើ អាជា្ញធរជាតិអប្សរាប្រមែប្រមូលនូវគ្រាប់ពូជដោយខ្លួនឯងខ្លះ និងទិញគ្រាប់ពូជពីតាមទីផ្សារខ្លះផង។ ពិសេសដូចជាប្រភេទដើមនាងនួន គឺពិបាករកគ្រាប់ពូជណាស់។
លោកកុសលបន្ថែមថា អ្វីដែលអាជ្ញាធរជាតិអប្សរាធ្វើនេះ ដើម្បីផលប្រយោជន៍រួមរបស់ជាតិ ទោះជានៅគ្រប់មជ្ឈដ្ឋានណាក៏ដោយសូមយកប្រយោជន៍ជាតិជាធំ។ កន្លងមកមានជនខិលខូចមួយចំនួនតូចបានលួចកាប់ដើមគ្រញូងក្នុងតំបន់ប្រាសាទអង្គរវត្ត ដែលមានខ្លឹមមិនដល់ប៉ុនភ្លៅមនុស្សចាស់ផង។ បញ្ហានេះហើយលោកស្នើឱ្យប្រជាពលរដ្ឋមានការគិតគូរឱ្យបានត្រឹមត្រូវកុំបំផ្លាញព្រៃឈើតទៅទៀត៕