.jpg)
សកម្មភាពក្រុមការងារអភិរក្សប្រាសាទ កំពុងបំពេញការងារក្នុងបរិវេណប្រាសាទអង្គរវត្ត។ រូបថ ANA page
ភ្នំពេញៈ ក្រុមការងារនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ កំពុងបង្ហើយការងារដែលនៅសេសសល់ក្នុងការដ្ឋានជួសជុលស្ពានហាលប្រាសាទអង្គរវត្ត ដែលផែនការនៃគម្រោងនេះ នឹងត្រូវបញ្ចប់ទាំងស្រុងនៅចុងឆ្នាំ ២០២១ នេះ។
លោក អន សុភាព បុរាណវិទូ និងជាប្រធានក្រុមការងារជួសជុលស្ពានហាលអង្គរវត្ត មានប្រសាសន៍ថា គិតត្រឹមពាក់កណ្ដាលខែវិច្ឆិកានេះ គម្រោងជួសជុលស្ពានហាលអង្គរវត្តសម្រេចបានជិត ១០០ ភាគរយហើយ។
លោកថ្លែងថា៖ «ការងារនៅផ្នែកខាងលើនៃកម្រាលស្ពានសម្រេច ៩៩ ភាគរយហើយ។ ចំណែកនៅផ្នែកខាងក្រោមនៃជញ្ជាំងថ្មបាយក្រៀម សម្រេចបានប្រមាណ ៨០ ភាគរយ ហើយអាចនឹងបញ្ចប់ទាំងស្រុងនៅចុងឆ្នាំ ២០២១ នេះ»។
លោកបន្តថា បើទោះបី គម្រោងជួសជុលស្ពានហាល នឹងត្រូវបញ្ចប់ចុងឆ្នាំក្តី ប៉ុន្តែក្រុមការងារ នឹងបន្តជួសជុលកំពង់ទឹកនៅផ្នែកខាងជើងបន្តទៀត ដែលគម្រោងនេះអាចនឹងប្រើពេល ១ ឆ្នាំទៀតដើម្បីជួសជុលរួច។
គម្រោងជួសជុលស្ពានហាលអង្គរវត្តប៉ែកខាងជើងដំណាក់កាលទី២ មានប្រវែងសរុប ៩៤ ម៉ែត្រ បានចាប់ផ្តើមដំណើរការ ពីឆ្នាំ ២០១៦ មក ដែលជាគម្រោងកិច្ចសហប្រតិបត្តិការ រវាងអាជ្ញាធរជាតិអប្សរា និងសាកលវិទ្យាល័យសូហ្វីយ៉ា ប្រទេសជប៉ុន។
ដោយឡែក ក្រុមអ្នកបច្ចេកទេសអាជ្ញាធរជាតិអប្សរា ក៏កំពុងយកចិត្តទុកដាក់ជួសជុលខ្លោងទ្វារខាងលិចប្រាសាទបន្ទាយក្តី ដែលទទួលរងការខូចខាតធ្ងន់ធ្ងរ ប្រឈមនឹងគ្រោះថ្នាក់ខ្លាំងផងដែរ។
អាជ្ញាធរជាតិអប្សរាឱ្យដឹងថា៖ «ការជួសជុលខ្លោងទ្វារខាងលិចប្រាសាទបន្ទាយក្តី បានចាប់ដំណើរការ ពីខែតុលា ឆ្នាំ ២០២១ មក ឃើញថា ខ្លោងទ្វារមានការខូចខាតខ្លាំង និងរចនាសម្ព័ន្ធសំណង់ដែលមានភាពស្មុគស្មាញ»។
អាជ្ញាធរជាតិអប្សរាបានបញ្ជាក់ថា រហូតមកដល់ពេលនេះការងារសម្រេចបានជាង ៣០ ភាគរយ ហើយគ្រោងបញ្ចប់នាដំណាច់ឆ្នាំ ២០២២ ខាងមុខ៕
