ភ្នំពេញៈ ផ្ទាំងគំនូរបុរាណល្បីៗលំដាប់ពិភពលោក ដែលមានអាយុកាលប្រមាណ ៣០០ ឆ្នាំ និងផ្ទាំងគំនូរសម័យដែលមានតម្លៃខ្ទង់ ១០ ម៉ឺនដុល្លារ រួមនឹងវត្ថុបុរាណជាច្រើននឹងត្រូវដាក់តាំងបង្ហាញនៅសារមន្ទីរជាតិចាប់ពីថ្ងៃទី ២២ វិច្ឆិកា នាព្រឹត្តិការណ៍មហោស្រពវប្បធម៌អាស៊ី-អឺរ៉ុប ដែលកម្ពុជាធ្វើជាម្ចាស់ផ្ទះនៃព្រឹត្តិការណ៍នេះ។
ព្រឹត្តិការណ៍ មហោស្រពវប្បធម៌អាស៊ី-អឺរ៉ុបនឹងប្រព្រឹត្តទៅចាប់ពីថ្ងៃទី ២២ ដល់ថ្ងៃទី ២៦ វិច្ឆិកា ឆ្នាំ ២០២១ តាមប្រព័ន្ធអនឡាញដែលកម្ពុជាធ្វើជាម្ចាស់ផ្ទះរៀបចំព្រឹត្តិការណ៍នេះ ព្រមទាំងមានការរៀបចំតាំងពិព័រណ៍វប្បធម៌ដោយផ្ទាល់នៅសារមន្ទីរជាតិ និងការបញ្ចាំងខ្សែភាពយន្តផងដែរ។
ក្នុងសន្និសីទសារព័ត៌មានស្តីពីមហោស្រពវប្បធម៌អាស៊ី-អឺរ៉ុប ក្រោមប្រធានបទ «អាស៊ី និង អឺរ៉ុប៖ ចំណងវប្បធម៌» “Asia and Europe: Cultures Connect” កាលពីថ្ងៃទី ១៥ វិច្ឆិកា លោក គឹម ពីនន់ អនុរដ្ឋលេខាធិការ ក្រសួងវប្បធម៌ និងវិចិត្រសិល្បៈ និងជាអនុប្រធានគណៈកម្មការជាតិរៀបចំកិច្ចប្រជុំកំពូលអាស៊ី-អឺរ៉ុបលើកទី ១៣ បានថ្លែងថា មហោស្រពវប្បធម៌អាស៊ី-អឺរ៉ុប គឺជាព្រឹត្តិការណ៍អមមួយដែលរៀបចំឡើងសម្រាប់អបអរសាទរនៃកិច្ចប្រជុំកំពូលអាស៊ី-អឺរ៉ុប លើកទី ១៣ ដែលកម្ពុជាធ្វើជាម្ចាស់ផ្ទះ។
លោកបន្តថា៖ «ប្រធានបទដ៏សំខាន់នេះ ជាការបង្ហាញ និងជំរុញការផ្សារភ្ជាប់ទំនាក់ទំនងរវាងប្រជាជននៃទ្វីបអាស៊ី និងប្រជាជនទ្វីបអឺរ៉ុប ដើម្បីផ្សារទំនាក់ទំនងគ្នាឱ្យកាន់តែជិតស្និទ្ធតាមរយៈវិស័យសិល្បៈ វប្បធម៌ ដែលយើងនឹងមានកិច្ចសហប្រតិបត្តិការណ៍ជិតស្និទ្ធ ហើយនឹងធ្វើឱ្យមានការអភិវឌ្ឍប្រកបដោយចីរភាពរវាងទ្វីបទាំង ២»។ មហោស្រពនេះ នឹងបង្ហាញពីសកម្មភាពសិល្បៈចម្រុះរវាងទ្វីបទាំង ២ ដោយជ្រើសរើសយកសកម្មភាពសិល្បៈធំៗចំនួន ៣ ទី ១ បង្ហាញពីសិល្បៈទស្សនីយភាព ដែលក្នុងនោះមានរបាំប្រពៃណី របាំបុរាណ សហសម័យ តន្ត្រី និងល្ខោនជាដើម។
ទី ២ ធ្វើការតាំងពិព័រណ៍ ដែលការតាំងពិព័រណ៍នេះនឹងមានការរៀបចំតាំងផ្ទាំងគំនូរដូចជាវត្ថុសិល្បៈផ្សេងៗ។ សកម្មភាពទី ៣ ជាការបញ្ចាំងខ្សែភាពយន្តរឿងខ្នាតវែង ខ្នាតខ្លី និងខ្សែភាពយន្តឯកសារផ្សេងៗ។ គម្រោងដាក់តាំងពិព័រណ៍មានវត្ថុ និងផ្ទាំងគំនូររហូតទៅដល់ជិត ៣០ ស្នាដៃដែលសុទ្ធសឹងតែជាស្នាដៃកម្រឃើញ និងភាពប្រណីត។
លោក ឯក ប៊ុនថា អគ្គនាយករងបច្ចេកទេសវប្បធម៌បានថ្លែងថា វត្ថុ និងស្នាដៃដែលត្រូវយកមកដាក់តាំងបង្ហាញនៅសារមន្ទីរជាតិមិនមែនចេះតែយកមកបង្ហាញទេគឺត្រូវឆ្លងការជ្រើសរើសពីក្រុមអ្នកជំនាញហើយរបស់នោះទាល់តែមានស្នាដៃ និងមានកេរ្តិ៍ឈ្មោះ។ អ្វីដែលមានការចាប់អារម្មណ៍ខ្លាំង ទី១ ស្នាដៃទាំងនោះ ជាដៃគូសហការរវាងប្រទេសនៅសហភាពអឺរ៉ុបជាមួយអាស៊ី ដែលយកមកដាក់តាំងមានស្នាដៃជាបុគ្គល ជាក្រុម និងសិល្បៈករសហការគ្នាយកមកដាក់តាំងបង្ហាញ។ ទី២ វិចិត្រកម្ម សិល្បៈករបរទេសដែលនៅស្រុកខ្មែរ ជ្រើសរើសស្នាដៃគាត់មកដាក់តាំងបង្ហាញដែលក្នុងនោះ មានគំនូរ ១ តម្លៃ ១០ ម៉ឺនដុល្លារ។ ក្រៅពីនេះផ្ទាំងរូបថតជាង ២០០ ទៅ ៣០០ ឆ្នាំ ក៏មានការតាំងបង្ហាញផងដែរ។
លោកបញ្ជាក់ថា៖ «ទាំងអស់នេះហើយ ដែលយើងមិនដែលបានឃើញ ហើយជាកិត្តិយសរបស់សាធារណជន សារមន្ទីរជាតិ ដែលបានចាប់ផ្តើមរៀបចំ ហើយជាគំរូមួយនៅថ្ងៃក្រោយយើងអាចធ្វើបន្តទៀត»។
តាមរយៈព្រឹត្តិការណ៍មហោស្រពនេះ កម្ពុជាបានជ្រើសរើសយកខ្សែភាពយន្តចំនួន ៤ មកដាក់បញ្ចាំងជូនសាធារណជន ដែលក្នុងរឿងទាំងនេះមានទំនាក់ទំនងជាមួយនឹងការថត និងអត្ថន័យទាក់ទងអាស៊ី និងអឺរ៉ុប ហើយភាពយន្តទាំងអស់នេះថតនៅលើទឹកដីកម្ពុជា។
អនុប្រធានបេសកកម្មការទូតនៃប្រតិភូសហភាពអឺរ៉ុបប្រចាំកម្ពុជាលោក Tihamer CZIKa ថ្លែងថា ព្រឹត្តិការណ៍នេះពិតជាមានសារៈសំខាន់ខ្លាំងណាស់ដែលបង្ហាញពីវប្បធម៌ដ៏សម្បូរបែបរវាងទ្វីប អឺរ៉ុប និងអាស៊ី។
លោកបញ្ជាក់ថា បើទោះជាមានផលរំខានដែលបណ្តាលមកពីជំងឺកូវីដ ១៩ ក៏ដោយ ក៏ព្រឹត្តិការណ៍នេះនឹងនៅតែបន្ត ហើយនឹងមានការអនុញ្ញាតឱ្យទស្សនិកជនធ្វើការទស្សនាតាមរយៈជាប្រព័ន្ធអនឡាញផង និងដោយផ្ទាល់ផង។ លោកបន្តថា៖ «យើងនឹងបានឃើញនូវភាពសម្បូរបែប និងភាពចម្រុះនៃវប្បធម៌របស់ទ្វីបទាំង ២ ហើយនេះគឺជាអ្វីដែលបង្ហាញអំពីចំណងសហប្រតិបត្តិការកាន់តែមានភាពស្អិតល្មួតឡើងរវាងបណ្តាប្រទេសនៅក្នុងទ្វីបអឺរ៉ុប និងទ្វីបអាស៊ី»។
ប្រធានសារមន្ទីរជាតិ លោក ឆាយ វិសុទ្ធ បានថ្លែងថាលក្ខណពិសេសដែលបង្ហាញនៅសារមន្ទីរជាតិនេះ ជារូបភាពក្នុងការតាំងពិព័រណ៍បែបសហសម័យធំ ដែលកម្ពុជាពុំធ្លាប់រៀបចំព្រឹត្តិការណ៍ធំបែបនេះនៅក្នុងសារមន្ទីរជាតិ។ ពីមុនមកមានការតាំងពិព័រណ៍បែបសហសម័យដែរ ប៉ុន្តែជាកម្មវិធីតូច ហើយភាគច្រើនសិល្បករដែលបង្ហាញនោះ ជាសិល្បករខ្មែរ យើងអត់មានឱកាសដាក់តាំងបង្ហាញសិល្បៈបែបសហសម័យ ដែលមិនមានការចូលរួមពីបណ្តាប្រទេសអាស៊ី និងអឺរ៉ុបទេ។
លោកបញ្ជាក់ថា៖ «មានន័យថា ការតាំងពិព័រណ៍លើកនេះខុសគ្នា ពីការបើកសារមន្ទីរជាតិ ១០០ ឆ្នាំមកនេះ ដែលសារមន្ទីរយើងបើកបែបបុរាណជាពិសេសសិល្បៈខ្មែរសុទ្ធសាធ ប៉ុន្តែអ្វីដែលប្លែកសម្រាប់យើងនាពេលនេះគឺការតាំងរបស់ដែលថ្មី ហើយជាឱកាសមួយផ្តល់ជូនសាធារណជន»៕