.jpg)
អាជ្ញាធររក្សាសន្តិសុខក្នុងថ្ងៃឈប់សម្រាកបុណ្យអុំទូក កាលពីឆ្នាំ ២០១៩។ ហុង មិនា
ភ្នំពេញៈ អភិបាលរាជធានីភ្នំពេញលោក ឃួង ស្រេង បានណែនាំឱ្យកងកម្លាំងមានសមត្ថកិច្ចអាជ្ញាធរខណ្ឌទាំង ១៤ និងមន្ទីរពាក់ព័ន្ធទាំងអស់ រក្សាឱ្យបាននូវសន្តិសុខសណ្ដាប់ធ្នាប់ និងសុវត្ថិភាពជូនប្រជាពលរដ្ឋក្នុងអំឡុងពេលថ្ងៃឈប់សម្រាកនៃពិធីបុណ្យអុំទូកចាប់ពីថ្ងៃទី ១៨ ដល់ថ្ងៃទី ២០ វិច្ឆិកា។
ការជំរុញបែបនេះធ្វើឡើងក្នុងកិច្ចប្រជុំគណៈបញ្ជាការឯកភាព រាជធានីភ្នំពេញ តាមរយៈប្រព័ន្ធអនឡាញកាលពីទី ១៥ វិច្ឆិកា ស្ដីពីផែនការការពាររក្សាសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ សម្រាប់ថ្ងៃឈប់សម្រាកក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែអកអំបុក ឆ្នាំ ២០២១។ ក្នុងកិច្ចប្រជុំនេះ ក៏បានណែនាំដល់អភិបាលខណ្ឌឱ្យដាក់កម្លាំងគ្រូពេទ្យប្រចាំការនៅតាមគោលដៅ និងត្រូវតាមដានជាប់ជានិច្ច ចំពោះអ្នកសម្រាកព្យាបាលជំងឺកូវីដ ១៩ តាមផ្ទះឱ្យបានតឹងរ៉ឹង។
លោក ឃួង ស្រេង ថ្លែងនៅក្នុងកិច្ចប្រជុំនោះថា នៅសល់តែប៉ុន្មានថ្ងៃទៀតទេ ថ្ងៃឈប់សម្រាកនឹងឈានមកដល់ដូច្នេះអាជ្ញាធរខណ្ឌទាំង ១៤ និងកងកម្លាំងសមត្ថកិច្ចទាំងអស់ត្រូវរក្សាឱ្យបាននូវសន្តិសុខសណ្ដាប់ធ្នាប់ជូនប្រជាពលរដ្ឋនៅក្នុងរាជធានីភ្នំពេញ ក៏ដូចជា ប្រជាពលរដ្ឋដែលធ្វើដំណើរពីខេត្តមកលេងនៅរាជធានីភ្នំពេញ។ ជាពិសេសត្រូវឱ្យមានអ្នកប្រចាំការទាំងសមត្ថកិច្ច ទាំងអាជ្ញាធរខណ្ឌ សង្កាត់ និងមន្ទីរពាក់ព័ន្ធមួយចំនួន។ «ពាក់ព័ន្ធនឹងប៉ូលិសប៉ុស្តិ៍រដ្ឋបាលត្រូវមានកម្លាំងប្រចាំការ ដើម្បីទទួលពាក្យបណ្ដឹងបងប្អូនប្រជាពលរដ្ឋ ដើម្បីបង្កលក្ខណៈងាយស្រួលដល់ពលរដ្ឋ»។
បន្ថែមពីនេះលោក ឃួង ស្រេង បានជំរុញឱ្យក្រុមសមត្ថកិច្ច ដូចជាអាជ្ញាធរមូលដ្ឋាន ត្រូវចុះល្បាតជាប្រចាំ ដើម្បីតាមដានរាល់សកម្មភាពការលួចបើកខារ៉ាអូខេ ក្លិបកម្សាន្ត និងរង្គសាល ខណៈទីតាំងទាំងនេះមិនទាន់អនុញ្ញាតឱ្យបើកវិញឡើយ។ ដូច្នេះអាជ្ញាធរខណ្ឌទាំង ១៤ និងកងកម្លាំងពាក់ព័ន្ធត្រូវអនុវត្តឱ្យបានម៉ឺងម៉ាត់ចំពោះការលួចបើកក្លិបកម្សាន្ត និងខារ៉ាអូខេ ដោយសារទីតាំង ២ នេះមានហានិភ័យខ្ពស់បំផុតនៃការឆ្លងរីករាលដាលជំងឺកូវីដ។
ជាមួយគ្នានេះដែរ រដ្ឋមន្ត្រីក្រសួងទេសចរណ៍ លោក ថោង ខុន បានជំរុញឱ្យបណ្តាមូលដ្ឋានអាជីវកម្មទេសចរណ៍បន្តក្នុងការអនុវត្តនូវវិធានការ គោលការណ៍ប្រតិបត្តិអប្បបរមា SOP ឱ្យបានម៉ឺងម៉ាត់ ខណៈប្រជាពលរដ្ឋនឹងចេញដំណើរកម្សាន្តនៅតាមបណ្តាខេត្ត នាឱកាសឈប់សម្រាកនេះ។ លោកថា៖ «គោលការណ៍ SOP ដែលយើងបានអនុវត្តពីមុនមកនៅតែត្រូវបន្តពង្រឹងបន្ថែមទៀតឱ្យកាន់តែល្អ ដើម្បីពង្រឹងប្រសិទ្ធភាព ផ្តល់ភាពជឿជាក់ដល់ភ្ញៀវទេសចរ ព្រោះប្រជាពលរដ្ឋនឹងធ្វើដំណើរទៅគ្រប់ទីកន្លែងមិនថានៅតាម ភោជនីយដ្ឋាន សណ្ឋាគារ និងផ្ទះសំណាក់»។
អ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ថ្លែងថា ជាទូទៅទោះមិនមានការរៀបចំពិធីប្រណាំងទូក ប៉ុន្តែនៅតែមានការរៀបចំស្តង់ដាក់តាំងលក់ផលិតផលនៅតាមទីសាធារណៈដែលបានអនុញ្ញាតដោយសាលារាជធានីភ្នំពេញ ដូច្នេះប្រជាពលរដ្ឋគាត់នឹងអាចដើរទស្សនា និងទិញផលិតផល ក៏ដូចជាការចូលរួមកម្មវិធីកម្សាន្តផ្សេងៗទៀត។
លោកថា៖ «ដូច្នេះ ស្នងការនគរបាលរាជធានីភ្នំពេញ យើងមានការរៀបចំកម្លាំងច្បាស់លាស់ដើម្បីការពារសន្តិសុខសណ្តាប់ធ្នាប់សាធារណៈ និងសុវត្ថិភាពជូនភ្ញៀវជាតិ និងអន្តរជាតិ»។ លោកឱ្យដឹងថា នាឱកាសនោះនឹងប្រើកម្លាំងសរុបជាង ១ ៦០០ នាក់ទាំងកម្លាំងការិយាល័យជំនាញកម្លាំងអធិការនគរបាលខណ្ឌ ដើម្បីចេញប្រតិបត្តិការរយៈពេល ៣ ថ្ងៃ៕
