ភ្នំពេញៈ សាលាដំបូងរាជធានីភ្នំពេញបានចេញដីកាសម្រេចលក់ដោយបង្ខំផ្ទះលោក សម រង្ស៊ី ដែលជាអតីតទីស្នាក់ការអតីតគណបក្សសង្គ្រោះជាតិ ដើម្បីយកលុយទៅសងម្ចាស់បំណុលចំនួន ៤ ភាគី គឺមានលោកនាយករដ្ឋមន្ត្រី ហ៊ុន សែន លោក ហេង សំរិន និង ស ខេង និងរាជរដ្ឋាភិបាលជាង ២ លាន ៥ សែនដុល្លារចំពេលខួប ៤ ឆ្នាំនៃអតីតគណបក្សសង្គ្រោះជាតិដែលត្រូវបានតុលាការកម្ពុជារំលាយកាលពីថ្ងៃទី ១៦ វិច្ឆិកា ២០១៧។
យោងតាមដីកាចំនួន ៤ ដែលចេញដាច់ឡែកពីគ្នាដោយលោក អ៊ឹម វណ្ណៈ ចៅក្រមអនុវត្តសាលាដំបូងរាជធានី-ភ្នំពេញកាលពីថ្ងៃទី ៤ ខែវិច្ឆិកាឱ្យដឹងថា ផ្ទះដែលលក់ទាំងបង្ខំនេះនឹងត្រូវបង់ជិត ១ លានដុល្លារជូនលោកនាយករដ្ឋមន្ត្រី ហ៊ុន សែន បង់ប្រាក់ ៦ សែនដុល្លារជូនលោក ហេង សំរិន បង់ប្រាក់ប្រមាណ ៥ សែនដុល្លារ ជូនលោក ស ខេង និងបង់ប្រាក់ជាង ៤,៤ សែនដុល្លារ ជូនរដ្ឋាភិបាលកម្ពុជា។
ដីកាសម្រេចនេះបន្តថា ផ្ទះត្រូវបានរឹបអូសអចលនវត្ថុចេញដោយមន្ទីររៀបចំដែនដីនគរូបនីយកម្មសំណង់ និងសុរិយោដីរាជធានីភ្នំពេញដែលមានប័ណ្ណសម្គាល់លេខ ភព ០៩ ៧២៥ ចុះថ្ងៃទី ១៥ ខែសីហាឆ្នាំ ២០០៧ គឺស្ថិតនៅផ្ទះលេខ ៥៧៦ ផ្លូវជាតិលេខ ២ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដែលជាកម្មសិទ្ធិរបស់កូនបំណុលនៃការអនុវត្ត ឈ្មោះ សម រង្ស៊ី និងប្រពន្ធឈ្មោះ ជូឡុង សូមួរ៉ា ដើម្បីយកប្រាក់មកទូទាត់បំណុលឱ្យម្ចាស់បំណុលនៃការអនុវត្តរហូតដល់គ្រប់ចំនួន។
លោក ជូង ជូងី ដែលធ្លាប់ធ្វើជាមេធាវីការពារក្តីឱ្យមេដឹកនាំអតីតគណបក្សសង្គ្រោះជាតិថ្លែងថា ពាក់ព័ន្ធនឹងករណីនេះ លោកស្នើសុំមិនធ្វើអត្ថាធិប្បាយទេ ដោយសារលោកកំពុងស្ថិតក្នុងបម្រាមធ្វើនយោបាយ និងការបញ្ចេញមតិផ្សេងៗ។
ភ្នំពេញប៉ុស្តិ៍មិនអាចទាក់ទង លោក សម រង្ស៊ី ដើម្បីសុំធ្វើអត្ថាធិប្បាយជុំវិញករណីខាងលើនេះបានទេកាលពីថ្ងៃទី ១៦ ខែវិច្ឆិកា ឆ្នាំ ២០២១។
លោក សេង សារី អ្នកវិភាគនយោបាយ និងសង្គមថ្លែងថា តុលាការចេញដីកាលក់ផ្ទះរបស់លោក សម រង្ស៊ី ដែលជាអតីតទីស្នាក់ការគណបក្សសង្គ្រោះជាតិនាពេលនេះបានបង្ហាញថា គណបក្សកាន់អំណាចកំពុងបិទទំព័រប្រវត្តិសាស្ត្ររបស់គណបក្សសង្គ្រោះជាតិ និងបង្ហាញថា គណបក្សនេះមិនអាចរស់ឡើងវិញទៀតទេ។
លោកថ្លែងថា៖ «នេះក៏បង្ហាញពីដំណើរការរបស់តុលាការភ្នំពេញបន្តនីតិវិធី ហើយអ្វីដែលសំខាន់ថា តើអ្នកគាំទ្ររបស់គណបក្សសង្គ្រោះជាតិមានវិធីបែបណាអាចរក្សាទីតាំងកណ្តាលរបស់ខ្លួន»។
ភ្នំពេញប៉ុស្តិ៍ មិនអាចទាក់ទងលោក ជិន ម៉ាលីន អ្នកនាំពាក្យក្រសួងយុត្តិធម៌ ដើម្បីសុំធ្វើអត្ថាធិប្បាយបានទេ នៅថ្ងៃទី ១៦ ខែវិច្ឆិកា។ ប៉ុន្តែលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ការលក់ផ្ទះរបស់លោក សម រង្ស៊ី ដែលជាអតីតទីស្នាក់ការអតីតគណបក្សសង្គ្រោះជាតិនេះ ពេលនេះពាក់ព័ន្ធនឹងទិដ្ឋភាពផ្លូវច្បាប់ ព្រោះនៅពេលដែលមានគូភាគីរឿងក្តីមួយដែលត្រូវបានកាត់ឱ្យសងនូវជំងឺចិត្តទៅរដ្ឋាភិបាល ឬក៏ទៅគូដើមបណ្តឹង ហើយគូភាគីនោះមិនចូលខ្លួនដោះស្រាយទេ គឺតុលាការមានសិទ្ធិក្នុងការលក់ដោយបង្ខំនូវទ្រព្យនោះ។
លោកបន្តថា ដោយឡែកពាក់ព័ន្ធនឹងទិដ្ឋភាពនយោបាយវិញ បើតុលាការចង់លក់ផ្ទះលោក សម រង្ស៊ី ដោយបង្ខំវិញគឺលក់តាំងពីយូរមកហើយ ពីព្រោះសាលក្រមនេះចូលជាធរមានយូរដែរហើយ ប៉ុន្តែនេះដោយរង់ចាំលោក សម រង្ស៊ី ចូលខ្លួនមកដោះស្រាយជាមួយកូនបំណុលយូរពេកក៏តុលាការសម្រេចលក់។
លោកថ្លែងថា៖ លោក សម រង្ស៊ី កន្លងមកតែងលើកឡើងថា វាជាកិត្តិយសទៅវិញទេ នៅពេលដែលតុលាការកាត់ទោសកាន់ច្រើន។ អ៊ីចឹងយើងឃើញថា លោក សម រង្ស៊ី ខ្លួនឯង ហាក់បីដូចជាប្រើនយោបាយមួយចង់ឱ្យមានការជំរុញឱ្យអនុវត្តលើសាលក្រម ដើម្បីហេតុផលនយោបាយ ដោយឱ្យមើលឃើញគាត់ថាជាជនរងគ្រោះទៅវិញ តាមរយៈគេធ្វើទុក្ខបុកម្នេញជាដើម»។
ដោយឡែកអតីតគណបក្សសង្គ្រោះជាតិនៅក្រៅប្រទេសបានចេញសេចក្តីថ្លែងការណ៍មួយនៅថ្ងៃទី ១៦ ខែវិច្ឆិកា ឆ្នាំ ២០២១ ថា ថ្ងៃនេះគឺជាខួប ៤ ឆ្នាំ (១៦វិច្ឆិកា ២០១៧-១៦ វិច្ឆិកា ២០២១) ដែលតុលាការកំពូលបានចេញសាលដីការំលាយគណបក្សសង្គ្រោះជាតិ។
សេចក្តីថ្លែងការណ៍នេះ បានអំពាវនាវឱ្យសហគមន៍អន្តរជាតិបន្តការដាក់គំនាបដល់រាជដ្ឋាភិបាលឱ្យអនុវត្តតាមការទាមទាររបស់សហគមន៍អន្តរជាតិដោយផ្ដល់សេរីភាពពេញលេញ និងទម្លាក់បទចោទលើលោក កឹម សុខា និងអ្នកទោសមនសិការទាំងអស់ដោយឥតលក្ខខណ្ឌ។ ផ្តល់នីតិសម្បទាគណបក្សសង្គ្រោះជាតិឡើងវិញ ស្តារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញហើយត្រូវរៀបចំការបោះឆ្នោតសេរី ត្រឹមត្រូវ និងយុត្តិធម៌ដោយមានការចូលរួមពីគណបក្សសង្គ្រោះជាតិ។
ពាក់ព័ន្ធនឹងករណីនេះ តុលាការកំពូលកម្ពុជាបានប្រកាសរំលាយគណបក្សសង្គ្រោះជាតិពីថ្ងៃទី ១៦ ខែវិច្ឆិកាឆ្នាំ ២០១៧ ដោយចោទប្រធានគណបក្សប្រឆាំងលោក កឹម សុខា មានទោសសន្ទិដ្ឋភាព ឬក្បត់ជាតិតាមមាត្រា ៤៤៣ នៃក្រមព្រហ្មទណ្ឌ និងដាក់បម្រាមថ្នាក់ដឹកនាំអតីតគណបក្សសង្គ្រោះជាតិ ១១៨ នាក់ មិនឱ្យធ្វើនយោបាយរយៈពេល ៥ ឆ្នាំផងដែរ៕
វីដេអូ៖