ពោធិ៍សាត់ៈ អាជ្ញាធរខេត្តពោធិ៍សាត់កំពុងច្រកដីដាក់ការុង ដើម្បីទប់ទឹកកុំឱ្យហូរលើផ្លូវ និងលង់លិចចូលក្នុងលំនៅឋានប្រជាពលរដ្ឋនៅក្នុងក្រុងពោធិ៍សាត់ ខណៈទឹកស្ទឹងពោធិ៍សាត់បានជន់ឡើង ៥,២ ម៉ែត្រលើសពីកម្រិតត្រូវប្រកាសអាសន្ន បន្ទាប់ពីមានភ្លៀងធ្លាក់ខ្លាំងនៅតំបន់ជួរភ្នំក្រវាញក្នុងរយៈពេលប៉ុន្មានថ្ងៃកន្លងមកនេះ។
លោក កែវ វ័យ ប្រធានមន្ទីរធនធានទឹកប្រាប់ ភ្នំពេញ ប៉ុស្តិ៍ នៅថ្ងៃទី ១៦ វិច្ឆិកាថា កម្លាំងចម្រុះនៃរដ្ឋបាលខេត្តពោធិ៍សាត់បានចុះអន្តរាគមន៍រៀបចំបាវខ្សាច់ធ្វើជាទំនប់តាមមាត់ស្ទឹង និងតាមដងផ្លូវក្នុងភូមិមួយចំនួន ដើម្បីបង្កភាពងាយស្រួលដល់ប្រជាពលរដ្ឋធ្វើដំណើរ និងកាត់បន្ថយការជន់លិចហូរកាត់ផ្លូវ។ លោកថា៖ «នៅពេលនេះ ស្ថានភាពកម្ពស់ទឹកស្ទឹងពោធិ៍សាត់បានជន់ឡើងលើសពីកម្រិតប្រកាសអាសន្ន ២ តឹកទៅហើយ គិតត្រឹមវេលាម៉ោង ១១ ព្រឹកថ្ងៃទី ១៦ វិច្ឆិកា»។
ការជន់ឡើងយ៉ាងឆាប់រហ័សនៃទឹកស្ទឹងពោធិ៍សាត់នេះ គឺបណ្ដាលមកពីមានភ្លៀងធ្លាក់ខ្លាំងនៅផ្នែកខាងលើនៃតំបន់ជួរភ្នំក្រវាញ ធ្វើឱ្យលំហូរទឹកពីស្ទឹងអារ៉ៃ ស្ទឹងធំ និងស្ទឹងព្រៃខ្ញុង នៃស្រុកភ្នំក្រវាញ និងស្រុកវាលវែងបានធ្លាក់មកយ៉ាងគំហុកមកលើដងស្ទឹងពោធិ៍សាត់។ លោកបន្ថែមថានៅពេលនេះរដ្ឋបាលខេត្តពោធិ៍សាត់បានត្រៀមកម្លាំងនិង មធ្យោបាយដើម្បីជម្លៀសពលរដ្ឋទៅកាន់ទីទួលសុវត្ថិភាព ក្នុងករណីភ្លៀងនៅតែបន្តធ្លាក់ដែលអាចធ្វើឱ្យទឹកស្ទឹងពោធិ៍សាត់បន្តហក់ឡើងកាន់តែខ្ពស់ជាងនេះ។
នៅថ្ងៃ ១៦ វិច្ឆិកានេះដែរ នៅឯស្រុកមោងឫស្សី ខេត្តបាត់ដំបងជំនន់ទឹកភ្លៀង និងទឹកដែលបើកទម្លាក់ពីទំនប់អាងស្ទាក់ទឹកបាសាក់ក្នុងស្រុករុក្ខគិរីបានបង្កការជន់លិចស្រែចម្ការ និងប៉ះពាល់លំនៅឋានពលរដ្ឋជាច្រើនរយខ្នង។
លោក ទេព ហន អភិបាលស្រុកមោងឫស្សីថ្លែងថា នៅពេលនេះទឹកបានជន់លិច និងប៉ះពាល់ដល់ការរស់នៅរបស់ប្រជាពលរដ្ឋចំនួន ៤៥០ គ្រួសារនៃភូមិចំនួន ៥ ក្នុងឃុំជ្រៃ និងប៉ះពាល់ដល់ដំណាំរួមផ្សំចំនួន ៦៦០ ហិកតា ព្រមទាំងហេដ្ឋារចនាសម្ព័ន្ធផ្លូវថ្នល់មួយចំនួន។
លោកថា៖ «ស្រុកមោងឫស្សីយើងនៅក្នុងឆ្នាំនេះ ជួបគ្រោះទឹកជំនន់ចំនួន ៣ លើក ចាប់តាំងពីចុងខែកញ្ញាមក។ កត្តានេះបានធ្វើឱ្យជីវភាពរស់នៅរបស់បងប្អូនប្រជាកសិករយើង ជួបប្រទះការលំបាក់ថែមមួយកម្រិតទៀត ខណៈទឹកបានជន់លិច និងខូចខាតផលដំណាំស្ទើរទាំងអស់»។
យោងតាមការព្យាករអាកាសធាតុរបស់ក្រសួងធនធានទឹក និងឧតុនិយម ដែលបានចេញផ្សាយនៅថ្ងៃទី ១៦ វិច្ឆិកា ភ្លៀងនឹងបន្តធ្លាក់នៅក្នុងកម្រិតពីតិចទៅច្រើនរហូតដល់ថ្ងៃទី ២៣ ខែវិច្ឆិកាពិសេសបណ្ដាខេត្តដែលស្ថិតនៅជាប់ព្រំដែនប្រទេសវៀតណាម និងបណ្ដាខេត្តមួយចំនួនទៀត ដែលស្ថិតនៅតាមបណ្ដោយតំបន់ជួរភ្នំក្រវាញ៕