.jpg)
បុរសម្នាក់ត្រូវបាននគរបាលចាប់ខ្លួន ករណីចាប់ក្មេងស្រីអាយុ ៦ ឆ្នាំម្នាក់រំលោភសេពសន្ថវៈ នៅថ្ងៃនេះ។ រូបថត ប៉ូលិស
បុរសសង្ស័យម្នាក់ត្រូវបាននគរបាលខណ្ឌដង្កោចាប់ខ្លួននៅព្រឹកថ្ងៃទី ១៧ វិច្ឆិកា ករណីរំលោភក្មេងស្រីម្នាក់អាយុ ៦ ឆ្នាំ បន្ទាប់ពីធ្វើសកម្មភាពបាន ១ ថ្ងៃនៅក្នុងមូលដ្ឋានសង្កាត់-ខណ្ឌដង្កោ រាជធានីភ្នំពេញ។
លោក ជឹម ស៊ីថា អធិការនគរបាលខណ្ឌដង្កោប្រាប់នៅថ្ងៃទី ១៧ វិច្ឆិកា ថាជនសង្ស័យឈ្មោះ លី សេងធិន អាយុ ៤៨ ឆ្នាំ។ ចំណែកក្មេងស្រីរងគ្រោះមាន ឈ្មោះ ម.ន. អាយុ ៦ ឆ្នាំ ស្នាក់នៅជាមួយម្តាយនៅបន្ទប់ជួលស្ថិតក្នុងភូមិសាស្ត្រទឹកដីសង្កាត់-ខណ្ឌដង្កោ។
លោកបញ្ជាក់ថា៖ «យើងចាប់ខ្លួនជនសង្ស័យនៅព្រឹកមិញនេះ (ថ្ងៃទី ១៧ វិច្ឆិកា) តាមបណ្តឹងរបស់ម្តាយក្មេងរងគ្រោះ។ ពេលនេះខាងជំនាញយើងកំពុងសាកសួរជនសង្ស័យនៅអធិការដ្ឋាននគរបាលយើង»។
បើតាមកំណត់ហេតុរបស់នគរបាលខណ្ឌដង្កោដែល ភ្នំពេញ ប៉ុស្តិ៍ ទទួលបាននៅថ្ងៃទី ១៧ វិច្ឆិកាបង្ហាញថា ជនសង្ស័យ លី សេងធិន មានរបរជាអ្នកលក់ភេសជ្ជៈ ស្នាក់នៅភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ។ រវាងជនសង្ស័យ និងម្តាយក្មេងស្រីរងគ្រោះមានទំនាក់ទំនងស្នេហាជាមួយគ្នារយៈពេលជាង ១ ឆ្នាំហើយ។
កំណត់ហេតុបន្តថាលុះនៅថ្ងៃកើតហេតុវេលារសៀលថ្ងៃទី ១៦ វិច្ឆិកា ជនសង្ស័យបានទៅរកម្តាយក្មេងស្រីរងគ្រោះដល់កន្លែងស្នាក់នៅ។ ប៉ុន្តែពេលនោះម្តាយក្មេងរងគ្រោះទៅធ្វើការរោងចក្រកាត់ដេរ ហើយនៅតែក្មេងស្រីរងគ្រោះម្នាក់ឯង។
ពេលនោះជនសង្ស័យបានឱ្យលុយក្មេងរងគ្រោះទិញនំហូប និងល្បួងឱ្យមើលទូរស័ព្ទរឿងសិចក្នុងបន្ទប់ជួលរួចចាប់នាងរំលោភបានសម្រេចតែម្តង។
ប្រភពដដែលបន្តថា ក្រោយពីម្តាយក្មេងត្រឡប់មកពីធ្វើការវិញពេលល្ងាចក្មេងស្រីរងគ្រោះបាននិយាយប្រាប់ម្តាយ។
លុះព្រឹកឡើងថ្ងៃទី ១៧ វិច្ឆិកា ស្ត្រីជាម្តាយបានទៅប្តឹងនគរបាលប៉ុស្តិ៍សង្កាត់ដង្កោ។ បន្ទាប់ពីសមត្ថកិច្ចបានទទួលបណ្តឹងផ្ទាល់មាត់ពីម្តាយក្មេងរងគ្រោះ សមត្ថកិច្ចក៏ស្រាវជ្រាវអត្តសញ្ញាណជនសង្ស័យតាមដែលម្តាយក្មេងរងគ្រោះនិយាយប្រាប់រហូតឃាត់ខ្លួនបាននៅព្រឹកថ្ងៃដដែល ក្នុងភូមិជើងឯក សង្កាត់ជើងឯក ខណ្ឌដង្កោ៕
