.jpg)
កម្ពុជាបញ្ជូនទ័ពមួកខៀវ ៧៣ នាក់ថ្មីទៀត ទៅបំពេញបេសកកម្មនៅប្រទេសស៊ូដង់ខាងត្បូង ក្រោមឆត្រអង្គការសហប្រជាជាតិ។ រូបថត មជ្ឈមណ្ឌលជាតិរក្សាសន្តិភាព
ភ្នំពេញៈ កងអនុសេនាធំកងរាជអាវុធហត្ថលេខ ៧៣៩ របស់កម្ពុជាចំនួន ៧៣ នាក់ក្នុងនោះមាននារី ៣៤ នាក់ បានចេញទៅបំពេញបេសកកម្មមនុស្សធម៌រក្សាសន្តិភាពនៅសាធារណរដ្ឋស៊ូដង់ខាងត្បូងក្រោមឆត្រអង្គការសហប្រជាជាតិ កាលពីថ្ងៃទី ១៦ ខែ វិច្ឆិកា ឆ្នាំ ២០២១ ដើម្បីជំនួសអ្នកចាស់ដែលទើបត្រឡប់មកដល់កម្ពុជា។ នេះបើតាមមន្ត្រីនាំពាក្យមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព។
អ្នកស្រី កុសល ម៉ាលីនដា អ្នកនាំពាក្យមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ១៧ ខែវិច្ឆិកា នេះថា ការទៅបំពេញបេសកកម្មរបស់កងកម្លាំងកងអនុសេនាធំកងរាជអាវុធហត្ថលេខ ៧៣៩ នាពេលនេះ គឺជាការប្ដូរវេនកម្លាំងកងអនុសេនាធំកងរាជអាវុធហត្ថលេខ ១៨៦ ចំនួន ៧៣ នាក់ ក្នុងនោះមាននារី ២៨ នាក់ ដែលទើបបានធ្វើមាតុភូមិនិវត្តន៍មកកម្ពុជាវិញកាលពីថ្ងៃទី ១៦ ខែវិច្ឆិកា ឆ្នាំនេះ ក្រោយពីបញ្ចប់បេសកកម្មនៅទីនោះអស់រយៈពេល ១ ឆ្នាំប្រកបដោយជោគជ័យ។
អ្នកស្រីបានបញ្ជាក់ថា៖ «តួនាទីនិងភារកិច្ចរបស់ក្រុមកម្លាំងកងអនុសេនាធំកងរាជអាវុធហត្ថលេខ ៧៣៩ ទាំង ៧៣ នាក់ ដែលត្រូវអនុវត្តក្នុងប្រទេសស៊ូដង់ខាងត្បូង ក្រោមបេសកកម្មមនុស្សធម៌របស់អង្គការសហប្រជាជាតិនោះ គឺចុះត្រួតពិនិត្យសណ្ដាប់ធ្នាប់ ចរាចរណ៍ ការពារក្បួនដង្ហែរបស់ឥស្សរជនខ្ពស់របស់អង្គការសហប្រជាជាតិដែលកំពុងបំពេញបេសកកម្មការងារនៅក្នុងប្រទេសនេះ និងការល្បាតរក្សាសន្តិភាពសម្រាប់ពលរដ្ឋនៃប្រទេសស៊ូដង់»។
បើតាមអ្នកស្រី ម៉ាលីនដា អត្រាចូលរួមរបស់នារីក្នុងកងអនុសេនាធំកងរាជអាវុធហត្ថលេខ ៧៣៩ នាពេលនេះ ស្មើ ៤៦% លើសពីតម្រូវការរបស់ អ.ស.ប. ១៥%។ ប្រការនេះ បានបញ្ជាក់ឱ្យឃើញថា កម្លាំងមួកខៀវកម្ពុជា ពិតជាបានធ្វើនវានុវត្តន៍ចំណេះជំនាញក្នុងបរិបទនៃការរស់នៅថ្មី និងសាមគ្គីភាព សហប្រតិបត្តិការ គោរពវិន័យល្អ និងភាពអង់អាចក្លាហានក្នុងការអនុវត្តតួនាទីរបស់ខ្លួនគ្រប់ពេលវេលា និងគ្រប់ទីកន្លែងនៃតំបន់ដែលខ្លួនបានចូលរួម ពិសេសការអនុវត្តនូវវិធានការការពារមេរោគកូវីដ ១៩។
អ្នកស្រី ម៉ាលីនដា ក៏បានប្រាប់ផងដែរថា កម្លាំងកងអនុសេនាធំកងរាជអាវុធហត្ថលេខ ១៨៦ ចំនួន ៧៣ នាក់ ដែលទើបបានវិលត្រឡប់មកដល់កម្ពុជាវិញនេះ ត្រូវបានទទួលស្វាគមន៍យ៉ាងកក់ក្ដៅពីថ្នាក់ដឹកនាំមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព និងពីមន្ត្រីជាន់ខ្ពស់មួយចំនួនទៀត នៃក្រសួងការពារជាតិ។ ពួកគេត្រូវបានក្រុមការងារបង្ការទប់ស្កាត់ការឆ្លងរីករាលដាលជំងឺកូវីដ ១៩ យកសំណាកធ្វើតេស្ដរហ័ស (Rapid Test) រកមេរោគកូវីដ ១៩ ភ្លាមៗផងដែរនៅឯព្រលានយន្តហោះអន្តរជាតិភ្នំពេញ ប៉ុន្តែជាលទ្ធផលគឺអវិជ្ជមានទាំងអស់គ្នា។
អ្នកស្រីបានបញ្ជាក់បន្ថែមថា៖ «ដោយសារពួកគាត់មិនទាន់បានចាក់វ៉ាក់សាំងប្រឆាំងកូវីដ ១៩ ដូសទី៣ ដែលជាដូសជំរុញ ក្រុមគ្រូពេទ្យក៏បានចាក់ដូសទី៣ នោះជូនពួកគាត់រួចជាស្រេចមុនពេលអនុញ្ញាតឱ្យត្រឡប់ទៅជួបជុំក្រុមគ្រួសាររបស់ពួកគាត់រៀងៗខ្លួននោះ»។
បើតាមអ្នកស្រី ម៉ាលីនដា ក្រុមកម្លាំងកងអនុសេនាធំកងរាជអាវុធហត្ថលេខ ១៨៦ ទាំង ៧៣ នាក់ មិនត្រូវបានបញ្ជូនទៅកាន់មណ្ឌលចត្តាឡីស័ករបស់កងកម្លាំងមួកខៀវកម្ពុជាក្នុងខេត្តកំពង់ឆ្នាំង ដូចកងមុនៗទេ។ ទោះយ៉ាងណា ពួកគាត់ ត្រូវបានណែនាំឱ្យធ្វើចត្តាឡីស័កនៅតាមផ្ទះរៀងៗខ្លួនក្នុងរយៈពេល ៧ ថ្ងៃ មុនពេលបង្ហាញភាពស្និទ្ធស្នាលជាមួយក្រុមគ្រួសារ ឬសាច់ញាតិ។
យោងតាមរបាយណ៍របស់មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព គិតចាប់ពីឆ្នាំ ២០០៦ រហូតមកទល់បច្ចុប្បន្នប្រទេសកម្ពុជា បានបញ្ជូនកងកម្លាំងមួកខៀវចូលរួមបេសកកម្មរក្សាសន្តិភាពរបស់អង្គការសហប្រជាជាតិចំនួន ៧ ៨៩៩ នាក់ ក្នុងនោះមាននារី ៥២៨ នាក់។ បច្ចុប្បន្ន កងកម្លាំងមួកខៀវកំពុងបំពេញបេសកកម្មក្រោមឆត្រអង្គការសហប្រជាជាតិមានចំនួន ៧៨៧ នាក់ ក្នុងនោះនារី ១១១ នាក់។
ដោយឡែកការចូលរួមបេសកកម្មរក្សាសន្តិភាពនៅសាធារណរដ្ឋស៊ូដង់ខាងត្បូងសម្រាប់ឆ្នាំ ២០២១ ដែលជាឆ្នាំទី១០ នៃការបំពេញបេសកកម្ម ក្រោមឆត្រអង្គការសហប្រជាជាតិនេះ គឺកម្ពុជាបានបញ្ជូនកម្លាំងមួកខៀវរបស់ខ្លួនសរុបចំនួន ៧៣០ នាក់ ក្នុងនោះមានកម្លាំងមួកខៀវជានារី ១២៤ នាក់៕
