ភ្នំពេញៈ ក្រុមហ៊ុន S.T.P INTERNATIONAL (CAMBODIA) PUBLIC CO., LTD បានយល់ព្រមបញ្ចុះតម្លៃ សម្រាប់រថយន្តយោធិន ដែលចង់ប្តូរចង្កូតរថយន្តពីស្តាំមកឆ្វេងឱ្យស្របតាមច្បាប់កម្ពុជា។ ការយល់ព្រមនេះបានធ្វើឡើង បន្ទាប់ពីមានការសម្របសម្រួលពីអគ្គមេបញ្ជាការរងនៃកងយោធពលខេមរភូមិន្ទលោក ហ៊ុន ម៉ាណែត ជាមួយម្ចាស់ក្រុមហ៊ុននេះ ដើម្បីជួយសម្រាលបន្ទុកយោធិន។
សេចក្តីជូនដំណឹងរបស់ខុទ្ទកាល័យនៃកងទ័ពជើងគោក ចុះថ្ងៃទី ១៦ ខែវិច្ឆិកា បានឱ្យដឹងថា ដើម្បីជួយសម្រាលបន្ទុកយោធិន ដែលជាម្ចាស់រថយន្តចង្កូតស្តាំ កំពុងប្រើប្រាស់ស្លាកលេខកងយោធពលខេមរភូមិន្ទ (ខ.ម) ដែលត្រូវធ្វើការប្តូរចង្កូតពីស្តាំមកឆ្វេង ឱ្យស្របតាមច្បាប់កម្ពុជា និងបង់ពន្ធអាករនាំចូល លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានជួបប្រជុំពិភាក្សាជាមួយលោក តែ តាំងប៉ អគ្គនាយក ក្រុមហ៊ុន S.T.P INTERNATIONAL (CAMBODIA) PUBLIC CO., LTD. ដើម្បីរកដំណោះស្រាយក្នុងការបញ្ចុះតម្លៃលើការប្តូរចង្កូតរថយន្តពីស្ដាំមកឆ្វេង ដោយធានាបាននូវគុណភាព លក្ខណៈបច្ចេកទេស និងស្ដង់ដាសុវត្ថិភាពរថយន្ត។
សេចក្តីជូនដំណឹងបន្តថា៖ «ជាលទ្ធផល លោក តែ តាំងប៉ បានយល់ព្រមធ្វើការបញ្ចុះតម្លៃពិសេសលើថ្លៃប្តូរចង្កូត រថយន្តសម្រាប់យោធិននៃកងយោធពលខេមរភូមិន្ទ ដែលកំពុងប្រើប្រាស់រថយន្តចង្កូតស្ដាំក្រោមស្លាកលេខ ខ.ម ទៅតាមប្រភេទ និងឆ្នាំផលិត ដោយធានាលើគុណភាពសម្ភារ លក្ខណៈបច្ចេកទេស និងស្តង់ដាសុវត្ថិភាព រថយន្ត ដើម្បីអាចធ្វើចរាចរណ៍លើដងផ្លូវប្រកបដោយសុវត្ថិភាព» ។
ជាមួយគ្នានេះដែរ អគ្គបញ្ជាការដ្ឋាន កងទ័ពជើងគោក បានស្នើដល់ម្ចាស់រថយន្តចង្កូតស្តាំ ដែលមានបំណងស្នើសុំ អន្តរាគមន៍ បញ្ចុះតម្លៃលើការប្តូរចង្កូតរថយន្តត្រូវធ្វើសំណើជូនអគ្គមេបញ្ជាការរងនៃកងយោធពលខេមរភូមិន្ទ តាមឋានានុក្រម ដោយផ្តល់នូវតារាងព័ត៌មានអំពីម្ចាស់រថយន្ត និងរថយន្តរបស់ខ្លួន។
លោក តែ តាំងប៉ អគ្គនាយកក្រុមហ៊ុន S.T.P បានប្រាប់ភ្នំពេញប៉ុស្តិ៍នៅថ្ងៃទី ១៧ វិច្ឆិកាថា ក្នុងនាមជាក្រុមហ៊ុនឯកជនដែលមានជំនាញផ្នែកកែចង្កូតរថយន្ត ពិតជាមានកិត្តិយសដែលបានរួមចំណែកក្នុងការជួយសម្រាលបន្ទុកកងទ័ពក្នុងការបញ្ចុះតម្លៃលើការកែចង្កូតរថយន្តពីស្តាំមកឆ្វេង។
លោកថា៖ «ក្រោយពីរដ្ឋាភិបាលប្រកាស គឺកងទ័ពមួយចំនួនបានទៅបង់ពន្ធ រួចហើយ ត្រូវមកកែចង្កូតរថយន្តពីស្តាំមកឆ្វេងវិញ ដើម្បីឱ្យស្របច្បាប់កម្ពុជា»។
លោកបញ្ជាក់ថា៖ «លោកក្មួយ ហ៊ុន ម៉ាណែត គាត់បានពិភាក្សាជាមួយក្រុមហ៊ុនយើង ដើម្បីជួយសម្រួលធ្វើម៉េច ឱ្យបានតម្លៃធូរ ដើម្បីជួយសម្រួលបន្ទុកដល់យោធិនមួយចំនួនដែលមានការខ្វះខាតលុយ។ អ៊ីចឹងបានជួយ សម្រួលបញ្ចុះតម្លៃ ដើម្បីឱ្យកងទ័ពមានលទ្ធភាពកែចង្កូត»។
លោកបន្ថែមថា ក្រុមហ៊ុនរបស់លោកនឹងធានាលើប្រព័ន្ធកែចង្កូតរយៈពេល ១ ឆ្នាំ ព្រោះនេះគឺជាការប្តូរ និងធានាខុសត្រូវពីសុវត្ថិភាពចរាចរណ៍។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) បានគាំទ្រចំពោះចំណាត់ការហាមឃាត់ការនាំចូលរថយន្តចង្កូតស្តាំ និងការណែនាំឱ្យកែចង្កូតរថយន្ត ដោយលោកថា តាមច្បាប់កម្ពុជាមិនត្រូវបានអនុញ្ញាតឱ្យប្រើរថយន្តចង្កូតស្តាំនោះទេ។
លោកបញ្ជាក់ថា៖ «ការប្រើប្រាស់រថយន្តចង្កូតស្តាំនៅពេលវ៉ាជែង វាបង្កឱ្យមានគ្រោះថ្នាក់ខ្លាំងណាស់ ព្រោះយើងត្រូវវ៉ាជែងខាងឆ្វេងដែលនេះ ត្រូវតែចេញមកឱ្យផុតផ្លូវ ទើបអាចវ៉ាជែងបាន ហើយរថយន្តប្រភេទនេះមានគ្រោះថ្នាក់ដល់ខ្លួនឯងផង និងអ្នកដទៃផងនៅពេលដែលវ៉ាជែងនៅលើដងផ្លូវ»។
សូមជម្រាបថា ក្រសួងសេដ្ឋកិច្ច និងហិរញ្ញវត្ថុកាលពីខែសីហា ឆ្នាំ ២០២១ បានប្រកាសឱ្យរថយន្តឯកជន ជ្រកក្រោមស្លាកលេខរដ្ឋ ស្លាកលេខ ខ.ម និង ន.ប ដែលមានចង្កូតឆ្វេង និងពុំមានចុះបញ្ជីទ្រព្យរបស់រដ្ឋ ត្រូវបង់ ពន្ធលើមធ្យោយបាយដឹកជញ្ជូនប្រចាំឆ្នាំ និងបង់ពន្ធនាំចូលតាមច្បាប់ជាធរមាន ដើម្បីពង្រឹងការគ្រប់គ្រងការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ។
ទន្ទឹមនេះដែរ ក្រសួងក៏បានក្រើនរំឭកដល់រថយន្តចង្កូតស្តាំទាំងអស់ត្រូវបង់ពន្ធឱ្យបានរួចរាល់នៅត្រឹមខែមិថុនាឆ្នាំ ២០២២ បើពុំនោះទេនឹងប្រឈមនឹងការកម្ទេចចោល ក្រោយពេលបង្ក្រាបបាន៕