ព្រះសីហនុៈ ឯកអគ្គរាជទូតជប៉ុន និងមន្ត្រីជាន់ខ្ពស់អង្គការ UNDP ប្រចាំកម្ពុជា បានចុះពិនិត្យគម្រោងគ្រប់គ្រងកាកសំណល់ប្លាស្ទិក ក្នុងខេត្តព្រះសីហនុ ដោយពួកគេចង់ឃើញការគ្រប់គ្រងសំរាម នៅក្នុងខេត្តជាប់មាត់សមុទ្រមួយនេះ ត្រូវធ្វើឡើងប្រកបដោយប្រសិទ្ធភាព ដើម្បីរៀបចំទីក្រុងឱ្យក្លាយជាទីក្រុងពហុវប្បធម៌ ដែលប្រកបដោយការប្រកួតប្រជែង និងវិបុលភាព។
ការចុះពិនិត្យគម្រោងគ្រប់គ្រងសំរាមនេះ បានធ្វើឡើងកាលពីថ្ងៃទី ១៦ ខែវិច្ឆិកា អំឡុងពេលមន្ត្រីជាន់ខ្ពស់ស្ថាប័នទាំង ២ នេះ បានជួបនិងពិភាក្សាការងារ ជាមួយលោក គួច ចំរើន អភិបាលនៃគណៈអភិបាលខេត្តព្រះសីហនុ។
តាមទំព័រហ្វេសប៊ុករបស់អង្គការ UNDP បានឱ្យដឹងនៅថ្ងៃទី ១៧ វិច្ឆិកាថា ឯកអគ្គរាជទូតជប៉ុន លោក MIKAMI Masahiro និងមន្ត្រី UNDP បានចូលជួបសម្តែងការគួរសម ជាមួយនឹងអភិបាលខេត្តព្រះសីហនុ ដោយក្នុងឱកាសនោះ លោក MIKAMI Masahiro បានជម្រាបពីគោលបំណងដែលគណៈប្រតិភូមកបំពេញទស្សនកិច្ចនៅខេត្តព្រះសីហនុ។
លោក MIKAMI Masahiro ក៏បានចុះពិនិត្យទីលានចាក់សំរាមនៅស្រុកព្រៃនប់ និងសាលារៀននៅក្នុងក្រុងព្រះសីហនុ ជាមួយប្រតិភូអង្គការ UNDP ដោយបានវាយតម្លៃខ្ពស់ចំពោះខេត្តព្រះសីហនុ ដែលមានការអភិវឌ្ឍហេដ្ឋារចនាសម្ព័ន្ធរីកចម្រើនគួរឱ្យកត់សម្គាល់។
ទំព័រហ្វេសប៊ុករបស់ UNDP បានបញ្ជាក់ថា៖ «ពួកគេរួមគ្នាបញ្ជាក់ពីសារៈសំខាន់នៃបរិស្ថានស្អាត និងបៃតង ជាមួយនឹងការគ្រប់គ្រងសំរាមប្រកបដោយប្រសិទ្ធភាព ដែលជាកត្តាសំខាន់មួយដែលរួមចំណែក ដល់ការសម្រេចបាននូវគោលបំណងមួយនេះ ដើម្បីរៀបចំក្រុងព្រះសីហនុឱ្យក្លាយជាទីក្រុងពហុវប្បធម៌ ដែលប្រកបដោយការប្រកួតប្រជែង និងវិបុលភាព»។
លោក គួច ចំរើន បានថ្លែងក្នុងជំនួបនេះថា រដ្ឋាភិបាលជប៉ុន និងកម្ពុជានឹងកាន់តែមានទំនាក់ទំនងល្អបន្ថែមទៀត ពិសេសរដ្ឋាភិបាលនៃប្រទេសជប៉ុន នឹងបន្តជួយជំរុញក្រុមហ៊ុនជប៉ុនមកធ្វើការវិនិយោគនៅខេត្តព្រះសីហនុ ខណៈរដ្ឋបាលខេត្តព្រះសីហនុ មានការគ្រប់គ្រងបញ្ហាផ្លូវ កាកសំណល់បានត្រឹមត្រូវ។
លោកបានបញ្ជាក់ថា៖ «ខេត្តព្រះសីហនុមានផ្លូវស្អាត កាកសំណល់ត្រូវបានដោះស្រាយ ការអភិវឌ្ឍកំពង់ផែស្វយ័ត ក្រុងព្រះសីហនុ និងការរៀបចំផែនការមេអភិវឌ្ឍខេត្ត ដើម្បីប្រែក្លាយជាតំបន់សេដ្ឋកិច្ចពិសេសគំរូពហុបំណង វាមានសារ:សំខាន់ ក្នុងការទាក់ទាញវិនិយោគមកកាន់ខេត្តព្រះសីហនុកាន់តែច្រើននាពេលខាងមុខ»។
លោក គួច ចំរើន បានថ្លែងបន្ថែមថា ជប៉ុនជាមិត្តដ៏ស្មោះត្រង់ជួយកម្ពុជា ក្នុងការងារមនុស្សធម៌ ការចែករំលែក បទពិសោធ ជួយកសាង និងផ្តល់ជំនួយមនុស្សធម៌ជាច្រើន ជាពិសេសវិស័យអភិវឌ្ឍធនធានមនុស្ស តាមរយៈរាជរដ្ឋាភិបាល និងប្រជាជនជប៉ុន ដោយបានជួយកសាងសាលាបឋមសិក្សាចំនួន ២៤ សាលា និងអនុវិទ្យាល័យ ចំនួន ២ សាលា នៅក្នុងខេត្តព្រះសីហនុ។
សូមជម្រាបថា នេះគឺជាលើកទី៣ ហើយ ដែលឯកអគ្គរាជទូតជប៉ុន និងមន្ត្រីជាន់ខ្ពស់អង្គការ UNDP ប្រចាំកម្ពុជា បានទៅបំពេញទស្សនកិច្ចនៅខេត្តព្រះសីហនុ ដែលការចុះបំពេញទស្សនកិច្ចនេះ គឺដើម្បីរំឭកដល់ចំណងមិត្តភាព សាមគ្គីភាពរវាងកម្ពុជា និងជប៉ុន។
តាមទំព័រហ្វេសប៊ុករបស់រដ្ឋបាលខេត្តព្រះសីហនុបានដឹងថា ជប៉ុនបានចូលរួមចំណែកក្នុងកំណើនសេដ្ឋកិច្ចជាតិ ពិសេសជួយកសាងកំពង់ផែទឹកជ្រៅ ដោយអភិវឌ្ឍន៍ជាដំណាក់កាល ជំហានទី១ និងជំហានទី២ នឹងត្រូវបញ្ចប់ នៅឆ្នាំ ២០២៥ ដែលអាចឱ្យនាវាមានជម្រៅទឹក ១៤,៥០ ម៉ែត្រ ចូលចតបាន។
ការកសាងកំពង់ផែទឹកជ្រៅនេះ អាចធ្វើឱ្យនាវាមកពីតំបន់អាស៊ីប៉ាស៊ីហ្វិក ប្រមាណជា ៩៣ ភាគរយ អាចចូលចតបានដែលធ្វើឱ្យតម្លៃនៃការដឹកជញ្ជូនមានការថយចុះ ដើម្បីប្រកួតប្រជែងទីផ្សារជាមួយប្រទេសជិតខាង។
ក្រៅពីនេះជប៉ុន ក៏បានផ្តល់កម្ចីដល់កំពង់ផែស្វយ័តក្រុងព្រះសីហនុ ជួយគាំទ្រដល់កំណើនសេដ្ឋកិច្ច ហើយអ្នកវិនិយោគជប៉ុន បានមកវិនិយោគលើវិស័យរោងចក្រ សហគ្រាស ទេសចរណ៍ សណ្ឋាគារ និងភោជនីយដ្ឋាន ដែលបានចូលរួមចំណែកអភិវឌ្ឍដល់សេដ្ឋកិច្ច និងសង្គមជាច្រើន។ នេះបើតាមទំព័រហ្វេសប៊ុករបស់រដ្ឋបាលខេត្តព្រះសីហនុ៕