.jpg)
សមត្ថកិច្ចទុកពេល ៣ ថ្ងៃ ឱ្យអ្នកលក់ដូរលើចិញ្ចើមផ្លូវម្ដុំវត្តសន្សំកុសលរុះរើចេញ។ ប៉ូលិស
ភ្នំពេញៈ អាជ្ញាធរមានសមត្ថកិច្ចទុកពេល ៣ ថ្ងៃដល់អាជីវករដែលកំពុងលក់ដូរយ៉ាងអនាធិបតេយ្យនៅលើកំណាត់ផ្លូវលេខ ២៧១ ម្តុំខ្លោងទ្វារវត្តសន្សំកុសល ខណ្ឌមានជ័យឱ្យរុះរើសសម្ភារផ្សេងៗ ឬទំនិញឱ្យអស់ បើពុំនោះទេនឹងចាត់វិធានការតាមផ្លូវច្បាប់។ នេះបើតាមប្រភពពីស្នងការដ្ឋាននគរបាលជាតិ។
ការបញ្ជាឱ្យរុះរើនេះ បន្ទាប់ពីកម្លាំងការិយាល័យសណ្តាប់ធ្នាប់នៃស្នងការដ្ឋាននគរបាលរាជធានីភ្នំពេញនៅព្រឹកថ្ងៃទី ១៦ ខែវិច្ឆិកា ឆ្នាំ ២០២១ បានចុះទៅរៀបចំសណ្តាប់ធ្នាប់ និងរំដោះចិញ្ចើមផ្លូវឱ្យបានធំទូលាយ និងមានរបៀបរៀបរយឡើងវិញ។ ក្នុងដំណើរការត្រួតពិនិត្យនោះ អាជ្ញាធរ សង្កេតឃើញថា នៅលើកំណាត់ផ្លូវលេខ ២៧១ ម្តុំខ្លោងទ្វារវត្តសន្សំកុសល តែងតែរងការកកស្ទះចរាចរណ៍បង្កប៉ះពាល់សណ្តាប់សុវត្ថិភាពចរាចរណ៍ដោយការយកចិញ្ចើមផ្លូវធ្វើអាជីវកម្មពីសំណាក់អាជីវករនៅម្តុំនោះ។
លោក អេម សម្បត្តិ នាយការិយាល័យនគរបាលសណ្តាប់ធ្នាប់រាជធានីភ្នំពេញបានថ្លែងថា ការចុះរៀបចំសណ្តាប់ធ្នាប់នៅពេលនេះ ដើម្បីពង្រឹងការអនុវត្តការងារសណ្តាប់ធ្នាប់ឱ្យមានភាពប្រសើរ ដោយសមត្ថកិច្ចនឹងបន្តចុះអនុវត្តជាប្រចាំទៅលើគោលដៅនានាដែលមានភាពស្មុគស្មាញ។
លោកបន្តថា៖ «ជាមួយនឹងការព្រមានទុកពេលវេលា ៣ ថ្ងៃចំពោះបងប្អូនអាជីវករត្រូវរុះរើ ឱ្យអស់ដោយខ្លួនឯងនូវឧបករណ៍សម្ភារ ឬទំនិញផ្សេងៗ ដែលបានដាក់តាំងលក់រំលោភលើចិញ្ចើមផ្លូវនោះ ប្រសិនផុតឱសានវាទមិនគោរពទៅតាមការណែនាំរបស់សមត្ថកិច្ចនឹងត្រូវចាត់វិធានការតាមផ្លូវច្បាប់ហើយ»។
លោកបានបន្តទៀតថា កម្លាំងស្នងការដ្ឋាននគរបាលរាជធានីភ្នំពេញនឹងបន្តចុះសហការជាមួយកម្លាំងតាមបណ្តាខណ្ឌទាំង ១៤ និងប្រើប្រាស់នូវមធ្យោបាយផ្សេងៗ ដើម្បីបន្តដោះស្រាយទៅលើបញ្ហាសណ្តាប់ធ្នាប់នៅក្នុងភូមិសាស្ត្ររាជធានីភ្នំពេញឱ្យមានគុណភាព ប្រសិទ្ធភាព និងឱ្យល្អប្រសើរ។
ជាមួយគ្នានេះលោក សម្បត្តិ ក៏អំពាវនាវឱ្យប្រជាពលរដ្ឋទូទៅនាំគ្នាចូលរួមសហការជាមួយអាជ្ញាធរសមត្ថកិច្ច ដើម្បីលើកកម្ពស់សោភណភាព សណ្តាប់ធ្នាប់សុវត្ថិភាព ចរាចរណ៍ នៅក្នុងរាជធានីភ្នំពេញ ឱ្យកាន់តែប្រសើរឡើង តាមរយៈនៃការចូលរួមគោរពច្បាប់ និងសេចក្តីណែនាំរបស់អាជ្ញាធរមានសមត្ថកិច្ច។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ បានថ្លែងថា ជាបទពិសោធរាល់ពេលដែលលោកធ្វើដំណើរឆ្លងកាត់មុខខ្លោងទ្វារវត្តសន្សំកុសល តែងតែឃើញកកស្ទះចរាចរណ៍ពិតមែន។ លោកបន្តថា ចំណាត់រៀបចំសណ្តាប់ធ្នាប់នៅតាមចិញ្ចើមផ្លូវជារឿងល្អ ប៉ុន្តែលោកស្នើឱ្យអាជ្ញាធរគួរមានវិធានការប្រកបដោយការទទួលខុសត្រូវ។
លោកថា៖ «ខ្ញុំគិតថាការរៀបចំសណ្តាប់ធ្នាប់គឺជារឿងល្អសម្រាប់ដោះស្រាយចិញ្ចើមផ្លូវ កុំឱ្យផ្លូវកកស្ទះ ប៉ុន្តែដើម្បីឱ្យប្រសើរជាងនេះ ការរៀបចំសណ្តាប់ធ្នាប់ អាជ្ញាធរត្រូវតែទទួលខុសត្រូវ ប្រសិនបើដេញគាត់ចេញពីកន្លែងនោះ មិនឱ្យលក់ សួរថាតើអាជ្ញាធរក្រុង មានកន្លែងផ្សេងណាដែលអាចឱ្យគាត់លក់បានក្នុងការបង្កើតប្រាក់ចំណូល ដើម្បីដោះស្រាយជីវភាពប្រចាំថ្ងៃ»។
លោកបន្តថា ការរៀបចំសណ្តាប់ធ្នាប់ត្រូវតែទទួលខុសត្រូវ ចំពោះប្រជាពលរដ្ឋ អាជីវករទាំងអស់មិនមែនមានន័យថា ការរៀបចំសណ្តាប់ធ្នាប់ដេញគាត់តាមអំពើចិត្តដោយគ្មានការទទួលខុសត្រូវនោះទេ។
លោកបានលើកជាឧទាហរណ៍ថា អាជ្ញាធរក្រុងគួររៀបចំយន្តការជាក់លាក់មួយសម្រាប់ឱ្យអាជីវករមានកន្លែងលក់ដូរ ដើម្បីរកចំណូលចិញ្ចឹមគ្រួសារ។
លោកថា៖ «ខ្ញុំគិតថាយើងអាចធ្វើដូចនៅស្រុកគេ ដូចប្រទេសជិតខាង គឺប្រទេសថៃ គេមានកន្លែងរៀបចំឱ្យអាជីវករលក់ គាត់អាចប្រកបមុខរបររកស៊ីបាន ហើយសណ្តាប់ធ្នាប់ល្អទៀត មួយទៀតនៅថៃមានផ្លូវខ្លះគេបិទសម្រាប់ថ្ងៃសៅរ៍ និងអាទិត្យ សម្រាប់ឱ្យអាជីវករលក់នៅតាមផ្លូវ ខ្ញុំគិតថាបើយើងអាចរៀបចំយន្តការនេះបាន ជាចំណុចល្អ»។
សូមជម្រាបថា កាលពីខែធ្នូ ឆ្នាំ ២០១៨ រដ្ឋបាលរាជធានីភ្នំពេញបានចេញសេចក្តីណែនាំស្តីពីការរៀបចំសណ្តាប់ធ្នាប់តាមដងផ្លូវ និងការប្រើប្រាស់ចិញ្ចើមផ្លូវសាធារណៈក្នុងរាជធានីភ្នំពេញ ដោយបញ្ជាឱ្យម្ចាស់ទីតាំងម្ចាស់ អាជីវកម្ម ម្ចាស់ការដ្ឋាន អ្នកគ្រប់គ្រងមន្ទីរពេទ្យ គ្រឹះស្ថានអប់រំ អគារសាធារណៈ វិស័យឯកជន អ្នកប្រើប្រាស់ផ្លូវថ្នល់ទាំងអស់ មិនត្រូវយកចំណីផ្លូវធ្វើអាជីវកម្ម។
បើទោះបីជាមានសេចក្តីណែនាំក្ដី ក៏ប៉ុន្តែអាជីវករមួយចំនួននៅរាជធានីភ្នំពេញមកទល់បច្ចុប្បន្ននេះ នៅតែយកចិញ្ចើមផ្លូវប្រកបអាជីវកម្ម ឬដាក់លក់ទំនិញផ្សេងៗដែលបង្កការកកស្ទះចរាចរណ៍នៅពេលធ្វើដំណើរម្តងៗ៕
វីដេអូ៖
