ស្ថានភាពទឹកជំនន់នៅក្រុងពោធិ៍សាត់ បានស្រកផុតពីកម្រិតនៃការប្រកាសអាសន្នហើយនៅព្រឹកថ្ងៃទី ១៧ ខែ វិច្ឆិកា ឆ្នាំ ២០២១ ខណៈនៅស្រុករុក្ខគិរី និងស្រុកមោងឫស្សី ខេត្តបាត់ដំបង ទឹកក៏បានចាប់ផ្ដើមស្រកទៅវិញជាបណ្ដើរៗផងដែរ ប៉ុន្តែនៅឯខេត្តកំពង់ស្ពឺ អាជ្ញាធរអំពាវនាវឱ្យពលរដ្ឋ ដែលរស់នៅតាមដីសណ្ដរស្ទឹងព្រែកត្នោតនៃខ្សែទឹកខាងក្រោមបង្កើនការប្រុងប្រយ័ត្ន អំពីជំនន់ទឹកភ្លៀង។ នេះបើតាមការអះអាងរបស់អាជ្ញាធរមូលដ្ឋាន។
លោក ចាប នាង អភិបាលក្រុងពោធិ៍សាត់ បានប្រាប់ ភ្នំពេញ ប៉ុស្តិ៍ថា នៅរសៀលថ្ងៃទី ១៧ ខែ វិច្ឆិកា ឆ្នាំ ២០២១ កម្ពស់ទឹកស្ទឹងពោធិ៍សាត់ បានស្រកចុះផុតពីកម្រិតនៃការប្រកាសអាសន្នហើយ។ ទឹកដែលបានហូរជន់លិចផ្លូវនិងភូមិឋានរបស់ប្រជាពលរដ្ឋ នៅក្នុងក្រុងនេះ កាលពីព្រឹកថ្ងៃទី ១៦ ខែ វិច្ឆិកា ឆ្នាំ ២០២១ នោះ ក៏បានស្រកទៅវិញអស់ដែរ។
លោកថ្លែងថា៖ «ទោះយ៉ាងណា កម្លាំងសមត្ថកិច្ចយើងនៅតែបន្តអំពាវនាវឱ្យពលរដ្ឋដែលរស់នៅជាប់តាមបណ្ដោយស្ទឹងនេះ បង្កើនការប្រុងប្រយ័ត្ន ព្រោះភ្លៀងនៅតែបន្តធ្លាក់ នៅផ្នែកខាងលើនៃតំបន់ជួរភ្នំក្រវាញ ដែលធ្វើឱ្យស្ទឹងអារ៉ៃ ស្ទឹងធំ និងស្ទឹងព្រៃខ្ញុង ដែលស្ថិតនៅក្នុងស្រុកក្រវាញ និងស្រុកវាលវែង ខេត្តពោធិ៍សាត់ បន្តជន់ឡើងនិងហូរធ្លាក់មកក្នុងស្ទឹងពោធិ៍សាត់នៅឡើយ»។
បើតាមលោកចាប នាង កម្ពស់ទឹកស្ទឹងពោធិ៍សាត់ គិតត្រឹមវេលា ម៉ោង២រសៀលថ្ងៃទី ១៧ ខែវិច្ឆិកា ឆ្នាំ ២០២១ បានស្រកចុះមកនូវត្រឹម ៤,៧៥ ម៉ត្រែ ទាបជាងកាលពីថ្ងៃទី ១៦ ខែ វិច្ឆិកា ឆ្នាំ២០២១ ចំនួន ៤៥ សង់ទីម៉ែត្រ ឬ ៤ តឹកកន្លះ។
ចំណែកលោក សុខ លូ អភិបាលខេត្តបាត់ដំបង បានប្រាប់ ភ្នំពេញ ប៉ុស្តិ៍ថា ជំនន់ទឹកភ្លៀងក្នុងស្រុករុក្ខគិរី និង ស្រុកមោងឫស្សី ក៏បានចាប់ផ្ដើមស្រកចុះជាបណ្ដើរៗហើយ ក្នុងនោះមានភូមិ-ឃុំមួយចំនួនទឹកបានស្រកអស់ហើយ។ ក្នុងរយៈពេល ២ ថ្ងៃជាប់គ្នានេះ លោកក៏បានដឹកនាំក្រុមការងាររដ្ឋបាលខេត្តបាត់ដំបង ចុះសួរសុខទុក្ខ និងនាំយកអំណោយសង្គ្រោះបឋមរបស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ទៅចែកជូនប្រជាពលរដ្ឋរងគ្រោះដោយទឹកជំនន់ ក្នុងភូមិសាស្ត្រនៃស្រុកទាំង ២ នោះ ចំនួន ៤៣៨ គ្រួសារផងដែរ ដោយក្នុង១គ្រួសារទទួលបានអង្ករ២៥គ.ក ត្រីខ ១ យួរ ស្មើ ១២ កំប៉ុង មី ១ កេះ និង ទឹកត្រី-ទឹកស៊ីអ៊ីវ ១ យួរ (៦ ដប) ព្រមទាំងថវិកាមួយចំនួនទៀត សម្រាប់ដោះស្រាយជីវភាពគ្រួសារក្នុងគ្រាដ៏លំបាកនេះ។
លោកបានបញ្ជាក់ថា៖ «នៅពេលនេះ ទឹកបានស្រកហើយ ដូច្នេះអ្វីដែលយើងត្រូវត្រៀមគឺការដាំដុះស្ដារឡើងវិញ ប៉ុន្តែយើងក៏ត្រូវស្វែងយល់ផងដែរ ថាគួរដាំដុះដំណាំអ្វី ក្នុងផ្ទៃដីប៉ុន្មាន ដើម្បីកុំឱ្យមានផលប៉ះពាល់និងខូចខាតដោយសារតែកង្វះទឹកស្រោចស្រពនៅក្នុងរដូវប្រាំងខាងមុខនេះ»។
យោងតាមរបាយការណ៍បឋម ដែល ភ្នំពេញ ប៉ុស្តិ៍ ទទួលបាន នៅរសៀលថ្ងៃទី ១៧ ខែ វិច្ឆិកា ឆ្នាំ ២០២១ ជំនន់ទឹកភ្លៀង ដែលទើបកើតមានជាថ្មីទៀត នៅក្នុងស្រុករុក្ខគិរី និងស្រុកមោងឫស្សី បានបង្កផលប៉ះពាល់លំនៅឋានប្រជាពលរដ្ឋសរុបជាង ៣ ០០០ គ្រួសារ ក្នុងនោះនៅស្រុករុក្ខគិរី ចំនួន ១ ៦៥៥ គ្រួសារ និង ប៉ះពាល់ដីស្រែចម្ការសរុប ជាង ១ ០០០ ហិកតា ក្នុងនោះនៅស្រុកមោងឫស្សី ចំនួន ៦៦០ ហិកតា ព្រមទាំងប៉ះពាល់និងខូចខាតហេដ្ឋារចនាសម្ព័ន្ធផ្លូវមួយចំនួនទៀត។
ដោយឡែកនៅឯខេត្តកំពង់ស្ពឺវិញ អាជ្ញាធរបានអំពាវនាវ ឱ្យពលរដ្ឋដែលរស់នៅប្របជាប់មាត់ទឹកនៃតំបន់ដីសណ្ដរស្ទឹងព្រែកត្នោត បង្កើនការប្រុងប្រយ័ត្នចំពោះគ្រោះជំនន់ទឹកភ្លៀង និងជំនន់ទឹកស្ទឹងព្រែកត្នោត ខណៈមានភ្លៀងធ្លាក់ជាច្រើនថ្ងៃនៅតំបន់ប្រជុំភ្នំឱរ៉ាល់ ដែលធ្វើឱ្យទឹកនៅតាមសំណង់ស្ទាក់ទឹកមួយចំនួន ជន់ឡើងនិងហូរលើខ្នងទំនប់ ដែលតម្រូវឱ្យមន្ត្រីជំនាញសម្រេចបើកទ្វារទឹក បង្ហូរទឹកចេញពីអាងការពារបាក់ស្រុតខ្នងទំនប់។
លោក ញ៉ាញ់ ជាបហ៊ង ប្រធានមន្ទីរធនធានទឹក និងឧតុនិយម ខេត្តកំពង់ស្ពឺ បានប្រាប់ ភ្នំពេញ ប៉ុស្តិ៍ថា មន្ត្រីធនធានទឹក ប្រចាំនៅសំណង់ស្ទាក់ទឹករលាំងជ្រៃ នៅថ្ងៃទី ១៧ ខែ វិច្ឆិកា ឆ្នាំ២០២១ បានសម្រេចបើកទ្វារទឹកចំនួន ៥ ដើម្បីបន្ធូរសម្ពាធទឹក និងកាត់បន្ថយការជន់លិចស្រែចម្ការ និងលំនៅឋានរបស់ប្រជាពលរដ្ឋ នៅផ្នែកខាងលើសំណង់ស្ទាក់ទឹកនេះ។
លោកបានបញ្ជាក់ថា៖ «នៅពេលនេះ ក្រុមការងារយើងបានសម្រេចបើកទ្វារទឹករលាំងជ្រៃចំនួន ៥ ក្នុងនោះទ្វារទឹក ២ យើងបើកបង្ហើបត្រឹមតែកម្ពស់ ៦ តឹកប៉ុណ្ណោះ ខណៈទ្វារទឹក ២ ទៀត យើងបើកបង្ហើបត្រឹមកម្ពស់១ម៉ែត្រ និងទ្វារទឹក ១ ទៀត យើងបើកកម្ពស់ ២ ម៉ែត្រ»។
បើតាមលោក ជាបហ៊ង ទឹកស្ទឹងព្រែកត្នោត នៅចំណុចទំនប់រលាំងជ្រៃ នាថ្ងៃទី ១៧ ខែ វិច្ឆិកា ឆ្នាំ ២០២១ ទឹកមានកម្ពស់ ៧,១៨ ម៉ែត្រ នៅចំណុចពាមឃ្លៃ ទឹកមានកម្ពស់ ៤,៨៦ ម៉ែត្រ និងនៅចំណុចទំនប់អាងទឹកតាសាល ទឹកមានកម្ពស់ ១៩,៨៦ ម៉ែត្រ។ ការហក់ឡើងនៃកម្ពស់ទឹកនៅចំណុចសំណង់អាងស្ទាក់ទឹកតាសាលនេះ ក៏ព្រោះតែមន្ត្រីជំនាញនៅមិនទាន់បើកទ្វារទឹកណាមួយនៅឡើយ ព្រោះបារម្ភខ្លាចមានជំនន់ធ្ងន់ធ្ងរជាថ្មីនៅក្នុងរាជធានីភ្នំពេញ និងខេត្តកណ្ដាល។
លោកបានបន្តថា ក្នុងករណីមានភ្លៀងធ្លាក់ខ្លាំងជាបន្តបន្ទាប់នៅផ្នែកខាងលើនៃតំបន់ប្រជុំភ្នំឱរ៉ាល់ទៀតនោះ មន្ត្រីជំនាញអាចនឹងបើកទ្វារទឹកនៅចំណុចទំនប់តាសាល ដើម្បីបន្ធូរសម្ពាធទឹកនៅក្នុងអាង ចៀសវាងការបាក់ស្រុត ដែលអាចបង្កជាមហន្តរាយធំ។ អាស្រ័យដូច្នេះ អ្នករស់នៅតាមដីសណ្ដរស្ទឹងព្រែកត្នោតទាំងក្នុងខេត្តកំពង់ស្ពឺ កណ្ដាល និងរាជធានីភ្នំពេញ គប្បីបង្កើនការប្រុងប្រយ័ត្ន ខណៈក្រសួងធនធានទឹក និង ឧតុនិយម បានព្យាករណ៍ថា ភ្លៀងនឹងបន្តធ្លាក់នៅក្នុងកម្រិតពីតិចទៅច្រើនរហូតដល់ថ្ងៃទី ២៣ ខែវិច្ឆិកា ខាងមុខនេះ ពិសេសបណ្ដាខេត្តដែលស្ថិតនៅជាប់ព្រំដែនប្រទេសវៀតណាម និងបណ្ដាខេត្តមួយចំនួនទៀត ដែលស្ថិតនៅតាមបណ្ដោយនៃតំបន់ជួរភ្នំក្រវាញ៕
វីដេអូ៖