.jpg)
កម្ពុជា-កូរ៉េ ធ្វើជាម្ចាស់ផ្ទះរៀបចំសិក្ខាសាលា ស្តីពីកិច្ចសហប្រតិបត្តិការមេគង្គ-កូរ៉េ សម្រាប់ខួប ១០ ឆ្នាំនៃកិច្ចសហប្រតិបត្តិការនេះ។ ហុង មិនា
ភ្នំពេញៈ ក្នុងឱកាសគម្រប់ខួប ១០ ឆ្នាំនៃកិច្ចសហប្រតិបត្តិការមេគង្គ-សាធារណរដ្ឋកូរ៉េ ស្ថានទូតសាធារណរដ្ឋកូរ៉េប្រចាំនៅកម្ពុជា ក្រសួងការបរទេស និងសហប្រតិបត្តិការអន្តរជាតិកម្ពុជា និងវិទ្យាស្ថានខ្មែរសម្រាប់កិច្ចសហប្រតិបត្តិការ និងសន្តិភាព (CICP) នៅថ្ងៃទី ១៧ វិច្ឆិកា បានធ្វើជាម្ចាស់ផ្ទះរៀបចំសិក្ខាសាលា ស្តីពីកិច្ចសហប្រតិបត្តិការមេគង្គ-កូរ៉េ។
លោក បណ្ឌិត ពូ សុធីរ៉ា នាយកប្រតិបត្តិនៃ CICP ថ្លែងក្នុងសិក្ខាសាលានេះថា គំនិតផ្តួចផ្តើមនៃកិច្ចសហប្រតិបត្តិការមេគង្គ-សាធារណរដ្ឋកូរ៉េ គឺជាកិច្ចខិតខំប្រឹងប្រែងយ៉ាងល្អពីសាធារណរដ្ឋកូរ៉េ ដើម្បីបង្រួមគម្លាតអភិវឌ្ឍន៍នៃប្រទេសមេគង្គ និងលើកកម្ពស់ការតភ្ជាប់ក្នុងតំបន់អាស៊ាន។
លោកថ្លែងថា៖ «កិច្ចសហប្រតិបត្តិការកូរ៉េ-មេគង្គ គួរតែត្រូវបានជំរុញឱ្យកាន់តែមានភាពរួមបញ្ចូលគ្នា និងបើកចំហ ដើម្បីក្លាយជាការបំពេញបន្ថែមប្រកបដោយប្រសិទ្ធភាព និងគួរឱ្យទុកចិត្តចំពោះក្របខ័ណ្ឌមេគង្គដែលមានស្រាប់ផ្សេងទៀត»។
លោក Park Heung-kyeong ឯកអគ្គរដ្ឋទូតនៃសាធារណរដ្ឋកូរ៉េ ថ្លែងក្នុងសិក្ខាសាលានេះដែរថា តំបន់មេគង្គមិនត្រឹមតែសម្រេចបាននូវកំណើនសេដ្ឋកិច្ចដ៏អស្ចារ្យប៉ុណ្ណោះទេ ប៉ុន្តែថែមទាំងសកម្មក្នុងការដោះស្រាយបញ្ហាប្រឈមរយៈពេលវែង ដូចជាការប្រែប្រួលអាកាសធាតុ ការដាក់មូលដ្ឋានគ្រឹះសម្រាប់ការអភិវឌ្ឍប្រកបដោយចីរភាព។
លោករំឭកឡើងវិញថា៖ «ស្របពេលយើងប្រារព្ធខួបលើកទី ១០ នៃកិច្ចសហប្រតិបត្តិការមេគង្គ-សាធារណរដ្ឋកូរ៉េ។ ប្រទេសកូរ៉េ ស្វែងរកការជំរុញបន្ថែមទៀតនូវកិច្ចសហប្រតិបត្តិការផ្អែកលើតម្រូវការនៅក្នុងតំបន់»។
លោក Park Heung-kyeong បន្តថាជាមួយនឹងការបំពេញបន្ថែមសេដ្ឋកិច្ច និងភាពស្រដៀងគ្នានៃវប្បធម៌រវាងប្រទេសមេគង្គ និងកូរ៉េ និងជាមួយចំណេះដឹងរបស់ប្រទេសកូរ៉េ និងបទពិសោធដែលទទួលបានតាមរយៈប្រវត្តិនៃការអភិវឌ្ឍស្រដៀងគ្នា ភាពជាដៃគូមេគង្គ-កូរ៉េ អាចសម្រេចបាននូវភាពជឿនលឿនកាន់តែច្រើននៅក្នុងវិស័យផ្សេងៗ។
លោក ប៉ិច សុខេម ទីប្រឹក្សាក្រសួងការបរទេសថ្លែងក្នុងសិក្ខាសាលានេះដែរថា កិច្ចសហប្រតិបត្តិការមេគង្គ-កូរ៉េ សម្រេចបានលទ្ធផលជាប្រវត្តិសាស្ត្រចាប់តាំងពីសេចក្តីប្រកាសទន្លេមេគង្គ-ហាន (Mekong-Han) អនុម័តក្នុងឆ្នាំ ២០១១។
លោកបញ្ជាក់ថា៖ «កិច្ចសហប្រតិបត្តិការមេគង្គ- សាធារណរដ្ឋកូរ៉េ គួរតែមានយុទ្ធសាស្ត្រ និងភាពមិនអាចខ្វះបានក្នុងការបំពេញបន្ថែមក្នុងកិច្ចខិតខំប្រឹងប្រែង ដើម្បីបង្រួមគម្លាតអភិវឌ្ឍន៍ក្នុងអាស៊ាន ជាមួយនឹងការអនុវត្តយ៉ាងខ្ជាប់ខ្ជួននូវផែនការសកម្មភាពមេគង្គ-សាធារណរដ្ឋកូរ៉េ ២០២១-២០២៥»។
លោក ង្វៀន ហ៊ុយតាំង ឯកអគ្គរដ្ឋទូតនៃសាធារណរដ្ឋសង្គមនិយមវៀតណាមប្រចាំកម្ពុជា ថ្លែងក្នុងសិក្ខាសាលានេះដែរថា សិក្ខាសាលានេះ គឺជាឱកាសមួយសម្រាប់ទាំងអស់គ្នា ធ្វើការពិនិត្យឡើងវិញនូវរាល់លទ្ធផលនានានៃកិច្ចសហប្រតិបត្ដិការមេគង្គ-សាធារណរដ្ឋកូរ៉េ ដែលសម្រេចបានក្នុងអំឡុងពេល ១០ ឆ្នាំកន្លងមកនេះ ហើយធ្វើការពិភាក្សាអំពីដំណោះស្រាយសហការគ្នាប្រកបដោយប្រសិទ្ធភាព សម្រាប់ពេលខាងមុខ នេះឱ្យបានស័ក្តិសមទៅនឹងកិច្ចសហប្រតិបត្ដិការជាដៃគូយុទ្ធសាស្ដ្រដែលត្រូវបានដំឡើងកម្រិតតាំងពីឆ្នាំ ២០២០ មកម្ល៉េះ។
លោកថ្លែងថា៖ «ចាប់តាំងពីបង្កើតឡើងកាលពីឆ្នាំ ២០១១ មក យន្តការនៃកិច្ចសហប្រតិបត្ដិការមេគង្គ-សាធារណរដ្ឋកូរ៉េនេះឯងបានដើរតួនាទីដ៏សំខាន់ក្នុងការជំរុញនូវកិច្ចសហប្រតិបត្ដិការគ្នាលើផ្នែកជាច្រើនរវាងប្រទេសទាំង ៦ គឺកម្ពុជា ឡាវ មីយ៉ាន់ម៉ា ថៃ វៀតណាម និងកូរ៉េខាងត្បូង»៕
