.jpg)
សមត្ថកិច្ចបញ្ជូនស្ត្រីជនជាតិថៃម្នាក់ទៅតុលាការ ពាក់ព័ន្ធករណីជួញគ្រឿងញៀនជិត ២ គីឡូ។ រូបថត ប៉ូលិស
ភ្នំពេញៈ ស្ត្រីចំណាស់ជនជាតិថៃម្នាក់ ត្រូវបានសមត្ថកិច្ចបញ្ជូនទៅតុលាការ កាលពីថ្ងៃទី ១៦ វិច្ឆិកា បន្ទាប់ពីចាប់ខ្លួននៅព្រលានយន្តហោះអន្តរជាតិភ្នំពេញ កាលពីរំលងអធ្រាត្រឈានចូលថ្ងៃទី ១៥ វិច្ឆិកា ជាមួយគ្រឿងញៀនប្រភេទកូកាអ៊ីនជិត ២ គីឡូក្រាម។
លោកឧត្តមសេនីយ៍ឯក ឡឹក វណ្ណៈ ប្រធានមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានឱ្យ ភ្នំពេញ ប៉ុស្តិ៍ ដឹងនៅរសៀលថ្ងៃទី ១៧ វិច្ឆិកានេះថា ស្ត្រីសង្ស័យរូបនេះ ឈ្មោះ SINEE SAISUWAN អាយុ ៦២ ឆ្នាំ។ គាត់ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញរួចហើយ កាលពីថ្ងៃទី ១៦ វិច្ឆិកា។
លោកថ្លែងថា៖ «ករណីស្ត្រីថៃនេះខ្ញុំបានបញ្ជូនទៅតុលាការតាំងពីម្សិលមិញម្ល៉េះ (ថ្ងៃទី ១៦ វិច្ឆិកា)។ គាត់ត្រូវបានសមត្ថកិច្ចយើងសហការជាមួយមន្ត្រីគយប្រចាំព្រលានឃាត់ខ្លួនគាត់»។
ទោះជាយ៉ាងណាលោកមិនបានបញ្ជាក់លម្អិតពីប្រតិបត្តិការបង្ក្រាបគ្រឿងញៀននេះទេ។ ក៏ប៉ុន្តែយោងតាមគេហទំព័ររបស់អគ្គស្នងការដ្ឋាននគរបាលជាតិដែលចុះផ្សាយនៅថ្ងៃទី ១៧ វិច្ឆិកានេះ បានសរសេរថា កម្លាំងជំនាញ (ក១០) របស់មន្ទីរប្រឆាំងបទល្មើសគ្រឿងញៀនបានបង្ក្រាបកាលពីវេលាម៉ោង ១ កន្លះរំលងអធ្រាត្រឈានចូលថ្ងៃទី ១៥ ខែ វិច្ឆិកា ឆ្នាំ ២០២១។
គេហទំព័រដដែលបានឱ្យដឹងថា ប្រតិបត្តិការនេះ ដឹកនាំដោយលោក ឧត្តមសេនីយ៍ទោ សារី បុត្រសត្យា សហការជាមួយសមត្ថកិច្ចគយនិងរដ្ឋាករប្រចាំអាកាសយានដ្ឋានអន្តរជាតិភ្នំពេញ (ច្រកអ្នកដំណើរមកដល់) និងមានការសម្របសម្រួលផ្លូវច្បាប់ពីលោក មុត ដារ៉ា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។ គ្រឿងញៀននេះ ត្រូវបានស្ត្រីសង្ស័យជិះយន្តហោះនាំមកជាមួយពីប្រទេសម៉ាលី ដោយឆ្លងកាត់ប្រទេសអេត្យូពី និងប្រទេសកូរ៉េខាងត្បូងចូលមកដល់កម្ពុជា។
បើតាមប្រភពដដែលថា ករណីនេះសមត្ថកិច្ចបានដកហូតវត្ថុតាងជាសារធាតុញៀនប្រភេទកូកាអ៊ីន (COCAINE) ទម្ងន់សុទ្ធជាង ១,៩៨៩ គីឡូក្រាម ដែលស្ត្រីសង្ស័យបង្កប់នៅបាតវ៉ាលិសរបស់ខ្លួន។
ពាក់ព័ន្ធនឹងការចោទប្រកាន់ពីតុលាការយ៉ាងណានោះ ភ្នំពេញ ប៉ុស្តិ៍ មិនអាចសុំការបញ្ជាក់ពីលោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញបានទេ នៅថ្ងៃទី ១៧ វិច្ឆិកានេះ៕
