ជនសង្ស័យត្រូវបានឃាត់ខ្លួនបញ្ជូនទៅអធិការដ្ឋាននគរបាលខណ្ឌមានជ័យ។ រូបថត នគរបាល
ភ្នំពេញៈ ប្រជាការពារសង្កាត់បឹងទំពន់ម្នាក់ ត្រូវបានកម្លាំងប៉ុស្តិ៍នគរបាលបឹងទំពន់ទី ២ ឃាត់ខ្លួនបញ្ជូនទៅអធិការដ្ឋាននគរបាលខណ្ឌមានជ័យ ពាក់ព័ន្ធហិង្សាដោយចេតនាមានស្ថានទម្ងន់ទោស ដោយសារមរណភាពនៃជនរងគ្រោះក្នុងរឿងជម្លោះច្រានប្រជាការពារដូចគ្នា ឱ្យដួលផ្ងារក្រោយបោកក្បាលស្លាប់ នៅក្នុងសាលាសង្កាត់បឹងទំពន់ទី ២ កាលពីយប់ថ្ងៃទី ១៧ វិច្ឆិកា ឆ្នាំ ២០២១។ នេះបើតាមអគ្គស្នងការដ្ឋាននគរបាលជាតិ។
សមត្ថកិច្ចបានឱ្យដឹងថា ជនសង្ស័យឈ្មោះ ហេង សារ៉េត ភេទប្រុស អាយុ ៦២ ឆ្នាំ ជនជាតិខ្មែរ ទីលំនៅ ភូមិក្បាលទំនប់ ២ សង្កាត់បឹងទំពន់ទី ១ ខណ្ឌមានជ័យ មុខរបរប្រជាការពារសង្កាត់បឹងទំពន់ទី ២។
ជនរងគ្រោះឈ្មោះ អេម វន ភេទប្រុស អាយុ ៧១ ឆ្នាំ ជនជាតិខ្មែរ ទីលំនៅ ភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ មុខរបរ ប្រជាការពារ សង្កាត់បឹងទំពន់ទី ២។
សមត្ថកិច្ចបានបន្តថា កាលពីថ្ងៃទី ១៧ ខែវិច្ឆិកា ឆ្នាំ ២០២១ វេលាម៉ោង ២០ និង ០០ នាទី នៅចំណុចក្នុងសាលាសង្កាត់បឹងទំពន់ទី ២ ជនរងគ្រោះឈ្មោះ អេម វន និងឈ្មោះ នន់ ភឿង ភេទប្រុស អាយុ ៤៧ ឆ្នាំ (ជាប្រជាការពារ សង្កាត់បឹងទំពន់ទី២) បានអង្គុយលេងនៅក្នុងសង្កាត់បឹងទំពន់ទី ២ ខណ្ឌមានជ័យ (ជាមួយប្រជាការពារដទៃទៀត) ពេលនោះជនសង្ស័យឈ្មោះ ហេង សារ៉េត បានជិះម៉ូតូតែម្នាក់ឯងចូលមកសាលាសង្កាត់បឹងទំពន់ទី ២ ហើយនិយាយជេរប្រមាថមើលងាយទៅលើជនរងគ្រោះ។
ភ្លាមនោះជនរងគ្រោះឈ្មោះ អេម វន (ជាមនុស្សពិការជើងខាងស្តាំ) បានដើរទៅសួរនាំក៏ត្រូវជនសង្ស័យច្រានបណ្តាលឱ្យដួលផ្ងារ ក្រោយបោកក្បាលទៅលើជម្រាលបេតុងក្នុងសង្កាត់បឹងទំពន់ទី ២ សន្លប់បាត់ស្មារតី។
បន្ទាប់មកក្រុមគ្រួសារ និងមន្ត្រីសាលាសង្កាត់បឹងទំពន់ទី ២ បានបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យមិត្តភាពខ្មែរ-សូវៀត ប៉ុន្តែជនរងគ្រោះមានស្ថានភាពរបួសធ្ងន់ធ្ងរពេក ខាងគ្រូពេទ្យមិនអាចសង្គ្រោះបានឱ្យក្រុមគ្រួសារដឹកជនរងគ្រោះយកត្រឡប់មកផ្ទះវិញ រហូតដល់វេលាម៉ោង ១២ និង ៥០ នាទីថ្ងៃទី ១៨ ខែវិច្ឆិកា ឆ្នាំ ២០២១ ទើបជនរងគ្រោះស្លាប់។
បន្ទាប់មកកម្លាំងនគរបាលការិយាល័យបច្ចេកទេសវិទ្យានៃស្នងការដ្ឋាននគរបាលរាជធានីភ្នំពេញ និងលោកឧកញ៉ាវេជ្ជបណ្ឌិត នង សុវណ្ណារ័ត្ន គ្រូពេទ្យកោសល្យវិច័យរាជធានីភ្នំពេញបានចុះមកពិនិត្យសាកសពជនរងគ្រោះឈ្មោះ អេម វន ឃើញមានស្នាមហើម ប៉ោងក្បាលចំហៀងខាងស្តាំមួយកន្លែង។
សាកសពជនរងគ្រោះឈ្មោះ អេម វន បានប្រគល់ឱ្យទៅឈ្មោះ វន នៅ ភេទស្រី អាយុ ៤១ ឆ្នាំ (ជាកូនបង្កើតរបស់ជនរងគ្រោះ) យកទៅធ្វើបុណ្យតាមប្រពៃណីនៅសង្កាត់ចាក់អង្រែលើ។
ឈ្មោះ វន ពន្លក ភេទប្រុស អាយុ ៣២ ឆ្នាំ (ត្រូវជាកូនបង្កើតរបស់ជនរងគ្រោះ) បានមកដាក់ពាក្យបណ្តឹងនៅទីស្នាក់ការប៉ុស្តិ៍នគរបាល បឹងទំពន់ទី ២ សូមឱ្យចាត់ការជនសង្ស័យតាមផ្លូវច្បាប់។
នៅពេលនោះ ជនសង្ស័យឈ្មោះ ហេង សារ៉េត ត្រូវបានកម្លាំងសមត្ថកិច្ចឃាត់ខ្លួននៅស្នាក់ការប៉ុស្តិ៍នគរបាលបឹងទំពន់ទី ២ សាកសួរតែម្តង។
បច្ចុប្បន្នជនសង្ស័យកំពុងត្រូវបានឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់ការតាមនីតិវិធី៕
.jpg)
