សៀមរាបៈ មន្ទីរពេទ្យកុមារជ័យវរ្ម័នទី៧ ឬហៅថា មន្ទីរពេទ្យគន្ធបុប្ផាទី ៣ ដែលមានទីតាំងស្ថិតនៅខេត្តសៀមរាប បានវះកាត់ជំងឺប្រឹសបេះដូងឱ្យកុមារ បានជិត៥ពាន់អ្នក ដោយជោគជ័យក្នុងរយៈពេល១០ឆ្នាំ។
ក្នុងទំព័រហ្វេសប៊ុករបស់ Dr. Beat Richner ដែលជាស្ថាបនិកមន្ទីរពេទ្យគន្ធបុប្ផា បានបង្ហោះសារ អបអរខួប ១០ ឆ្នាំ នៃការបង្កើតផ្នែកវះកាត់បេះដូងនៅមន្ទីរពេទ្យកុមារជ័យវរ្ម័នទី៧ (មន្ទីរពេទ្យគន្ធបុប្ផា) ថ្ងៃទី ២១ ខែវិច្ឆិកា ឆ្នាំ២០១១-២១ ខែវិច្ឆិកា ឆ្នាំ ២០២១ ។
នាឱកាសនេះ មន្ទីរពេទ្យគន្ធបុប្ផា បានឱ្យដឹងថា ក្មេងស្រីអាយុ១៥ឆ្នាំនេះ មានបញ្ហាវិបត្តិសង្វាក់បេះដូង ពោលខូចប្រឹសបេះដូងថតខាងស្តាំពីកំណើត ត្រូវបានធ្វើការវះកាត់ដាក់ថ្មបេះដូង ដោយជោគជ័យ ដោយក្រុមគ្រូពេទ្យឯកទេសកម្ពុជានៃមន្ទីរពេទ្យជ័យវរ្ម័នទី៧ កាលពីថ្ងៃទី១៦ខែវិច្ឆិកាឆ្នាំ២០២១ ។ មន្ទីរពេទ្យបានគូសបញ្ជាក់ថា៖ « នេះគឺជាករណីទី ៤៦៦៩ នៃកុមារ ដែលបានទទួលការវះកាត់បេះដូង ក្នុងរយៈពេល១០ឆ្នាំកន្លងមកនេះ»។
ជាមួយគ្នានេះដែរ មន្ទីរពេទ្យគន្ធបុប្ផា បានថ្លែងអរគុណ និងកោតសរសើរដល់ក្រុមគ្រូពេទ្យ ឯកទេសវះកាត់បេះដូងកម្ពុជា នៅមន្ទីរពេទ្យជ័យវរ្ម័នទី ៧ ដែលបានខិតខំវះកាត់ទទួលបានជោគជ័យ។
ប្រធានមន្ទីពេទ្យជ័យវរ្ម័នទី៧ លោក សាស្ត្រាចារ្យ យ៉ៃ ចន្ទនា ប្រាប់ភ្នំពេញប៉ុស្តិ៍ថា នេះជាសមិទ្ធផលដ៏ធំធេងមួយដែលក្រុមគ្រូពេទ្យខ្មែរអាចវះកាត់ជំងឺបេះដូងបានដោយជោគជ័យ ។ រាល់ឆ្នាំតែងតែមានក្រុមគ្រូពេទ្យបរទេសពីប្រទេសស្វីស ពីបារាំង តែងមកជួយបង្រៀន និងចូលរួមវះកាត់ ប៉ុន្តែដោយសារបញ្ហាកូវីដ ១៩ អត់មានបេសសកម្មបរទេសមកមកទៀតទេ។
លោកថា៖« ក្នុងរយៈពេល ១០ឆ្នាំមកនេះ ទើបតែឆ្នាំ ២០១៩ ដល់ឆ្នាំ ២០២១ អត់មានបេសសកម្មបរទេសមកទេ ហើយវេជ្ជៈបណ្ឌិតខ្មែរយើងបានធ្វើការវះកាត់ នេះជាសមិទ្ធិផលធំធេងមួយ ដែលខ្មែរអាចធ្វើបាន »។
លោកឱ្យដឹងដែរថា ក្នុងមួយថ្ងៃមានកុមារវះកាត់ជំងឺបេះដូងចន្លោះពី ២ទៅ៣ករណីឯណោះ។
លោកថា៖«កុមារដែលមានបញ្ហាបេះដូងពីកំណើតមានច្រើន ហើយអត់មានលទ្ធភាពវះកាត់ ព្រោះករណីនេះថ្លៃណាស់ ត្រូវការសម្ភារៈ គ្រូពេទ្យឯកទេស អូច្នេះ Dr. Beat Richner បានបើកការវះកាត់ជំងឺបេះដូងតាំងពីឆ្នាំ ២០១១មក ដើម្បីជួយវះកាត់ដោយឥតគិតថ្លៃ ហើយក្នងមួយវះកាត់បេះដូង មាន២ទៅ ៣ ករណី» ។
បើតាមលោក យ៉ៃ ចន្ទនា ក្នុងករណីកុមារមានបញ្ហាបេះដូងធូរស្រាលអាចវះកាត់នៅភ្នំពេញ ប៉ុន្តែក្នុងករណីធ្ងន់ធ្ងរគឺបញ្ជូនមកវះកាត់នៅមន្ទីរពេទ្យគន្ធបុប្ផា ខេត្តសៀមរាប។
លោកថា៖« ករណីលំបាក ករណីស្មុកស្មាញគឺវះកាត់នៅសៀមរាប បេះដូងខ្លះខូចពីកំណើត ដល់ទៅ ៥កន្លែងដែលស្មុគស្មាញ ហើយវះគាត់ម្តងហើយម្តងទៀត វាមានដំណាក់កាល មិនអាចធ្វើការវះកាត់ម្តងហើយចប់ទេ»។ «បើករណីធូរស្រាល អាចវះកាត់នៅភ្នំពេញបាន តែបើស្មុគស្មាញវះកាត់នៅសៀមរាប ហើយរាល់ការវះកាត់មិនដែលយកប្រាក់ទេ»។
ទន្ទឹមនេះដែរ លោកបានថ្លែងអំណរគុណដល់សប្បុរជនទាំងក្នុង និងក្រៅប្រទេស និងរាជរដ្ឋាភិបាលកម្ពុជាដែលនៅបន្តគាំទ្រដល់មន្ទីរពេទ្យគន្ធបុប្ផា ឱ្យមាននិរន្តភាពដំណើររការមកដល់សព្វថ្ងៃ ទោះបីអវិជ្ជមានស្ថាបនិក Dr. Beat Richner។
សូមជម្រាបផងដែរថា មន្ទីរពេទ្យគន្ធបុប្ផាទាំង០៥ទីតាំង បានផ្ដល់សេវាពិនិត្យ ព្យាបាល និងសង្គ្រោះជីវិតកុមាររាប់ម៉ឺននាក់ដោយឥតគិតថ្លៃ ជាមួយនឹងការចំណាយថវិកាប្រមាណពី ៤៥លាន ទៅ ៥០លានដុល្លារ ក្នុងមួយឆ្នាំៗ។ ថវិកាចំណាយទាំងនេះ ទទួលបានពីការចូលរួមបរិច្ចាគពីសំណាក់សប្បុរសជនទាំងក្នុងវិស័យឯកជន និងវិស័យសាធារណៈ រួមមាន មូលនិធិគន្ធបុប្ផាស្វីស ឬមូលនិធិគន្ធបុប្ផា Dr. Beat Richner និងមូលនិធិគន្ធបុប្ផាកម្ពុជា ព្រមទាំងរាជរដ្ឋាភិបាលកម្ពុជា៕
វីដេអូ៖