.jpg)
សមត្ថកិច្ចបង្ហាញខ្លួនអ្នកលេងមាន់ជល់ និងមាន់ជល់ដែលរឹបអូសបាន។ រូបថត FB
ត្បូងឃ្មុំៈ ប្រជាពលរដ្ឋនៅឃុំកក់ ស្រុកពញាក្រែក ខេត្តត្បូងឃុំបាននិយាយថា «កាស៊ីណូភូមិយើង» ដែលមានទីតាំងនៅភូមិអន្លង់ជ្រៃ ឃុំកក់ បានចាប់ផ្ដើមបើកទ្វារទទួលឲ្យពលរដ្ឋខ្មែរទូទៅចូលលែងល្បែងភ្នាល់ប្រជល់មាន់ឡើងវិញហើយ ប៉ុន្តែសមត្ថកិច្ចមូលដ្ឋានបានបដិសេធ។
លោក គឹម សារី អាយ ៥៦ ឆ្នាំ ដែលអះអាងថាមានទីលំនៅប្រមាណជាង ៣០០ ម៉ែត្រពី «កាស៊ីណូភូមិយើង» បានប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែ វិច្ឆិកា ឆ្នាំ ២០២១ ថា បច្ចុប្បន្នកាស៊ីណូនេះ បានចាប់ផ្ដើមលួចបើកឲ្យពលរដ្ឋខ្មែរដែលញៀនល្បែងភ្នាល់ប្រជល់មាន់ នាំយកមាន់ទៅជល់នៅក្នុងសង្វៀនរបស់កាស៊ីណូនេះដោយមិនខ្វល់ពីបម្រាមរបស់ក្រសួងសុខាភិបាលឡើយ។
លោក សារី បាននិយាយថា៖ «កាលពីថ្ងៃទី ១ នៃពិធីបុណ្យអុំទូក កូនប្រុសខ្ញុំ ២ នាក់ បានទៅលេងជល់មាន់នៅទីនោះ ហើយពួកវាបានចាញ់លក់អស់ម៉ូតូមួយគ្រឿង»។
លោក សារី បានបន្តថា៖ «នៅពេលនេះ ខ្ញុំបារម្ភខ្លាចកូនៗខ្ញុំវាវក់នឹងល្បែងភ្លេចការងារ អស់លុយកាក់ហើយនឹងឆ្លងជំងឺកូវីដ ១៩ ចឹងទេ សូមឲ្យអាជ្ញាធរចុះទៅពិនិត្យ និង ហាមឃាត់ម្ចាស់កាស៊ីណូនោះ កុំឲ្យពលរដ្ឋខ្មែរចូលលេងទៀត»។
ស្រដៀងគ្នានេះ លោក បន ហុន មេភូមិអន្លង់ជ្រៃ បានប្រាប់ ភ្នំពេញ ប៉ុស្តិ៍ថា «កាស៊ីណូភូមិយើង» នោះបានបើកឲ្យពលរដ្ឋខ្មែរចូលលេងជល់មាន់ ចាក់អាប៉ោង បៀ និងល្បែងភ្នាល់ផ្សេងៗទៀត។
លោកបាននិយាយថា៖ «ខ្ញុំមិនដឹងថាតើកាស៊ីណូផ្សេងទៀតមានបើកល្បែងជល់មាន់ ហើយបើកឲ្យអ្នកភូមិនាំមាន់យកទៅជល់ភ្នាល់គ្នារាប់សិបម៉ឺនក្នុង ១ គូៗកាស៊ីណូភូមិយើងហ្នឹងដែរ ឬយ៉ាងណា? បើយ៉ាងនេះពលរដ្ឋខ្មែរយើងវក់នឹងល្បែងងើបមុខមិនរួចទេ»។
បើតាមលោក ហុន នៅទល់មុខ «កាស៊ីណូភូមិយើង» នោះ មានប៉ុស្តិ៍នគរបាលមួយប៉ុន្តែមិនឃើញមានសមត្ថកិច្ចនគរបាលចុះត្រួតពិនិត្យ ឬហាមឃាត់ពលរដ្ឋខ្មែរកុំឲ្យចូលលេងនោះទេ។
ជុំវិញករណីនេះ លោក អាំ សុផល អធិការងស្រុកពញាក្រែក មិនអាចទាក់ទងសុំការអធិប្បាយបានទេកាលពីម្សិលមិញ។ ទោះយ៉ាងណា លោក ម៉ុន មាគ៌ា ស្នងការនគរបាលខេត្តត្បូងឃ្មុំ បានប្រាប់ ភ្នំពេញ ប៉ុស្តិ៍ថា លោកបានដឹកនាំកម្លាំងសមត្ថកិច្ចជំនាញចុះទៅត្រួតពិនិត្យហើយ ប៉ុន្តែពុំមានករណីនោះទេ។
លោក មាគ៌ា បានបញ្ជាក់ថា៖ «ថ្មីៗនេះខ្ញុំបានដឹកនាំកម្លាំងនគរបាលជំនាញចុះត្រួតពិនិត្យ និងធ្វើរដ្ឋបាលនៅក្នុងកាស៊ីណូនេះ ប៉ុន្តែរកមិនឃើញមានករណីដូចជាការអះអាងរបស់អ្នកភូមិឡើយ»។
ទោះយ៉ាងណាអ្វីដែលអ្នកភូមិបានលើកឡើង ក្រុមសមត្ថកិច្ចជំនាញនឹងបន្តធ្វើការស្រាវជ្រាវបន្ថែមទៀត។ ក្នុងករណីរកឃើញមានប្រព្រឹត្តខុសទៅនឹងបទដ្ឋានច្បាប់ណាមួយ ឬមិនអនុវត្តតាមវិធានសុខាភិបាលស្ដីពីការទប់ស្កាត់ការឆ្លងរីករាលដាលនៃជំងឺកូវីដ ១៩ នោះ «សមត្ថកិច្ចយើងនឹងចាត់វិធានការតាមច្បាប់រដ្ឋបាល ដោយគ្មានការលើកលែង»។
ដោយឡែក នៅឯស្រុកសំរោងទង ខេត្តកំពង់ស្ពឺ ក្រុមអ្នកវក់នឹងល្បែងស៊ីសងជល់មាន់ ៨ នាក់ ត្រូវបានកម្លាំងសមត្ថកិច្ចចាប់ឃាត់ខ្លួនយកទៅសួរនាំ និងចាត់វិធានការតាមនីតិវិធីច្បាប់ ក្រោយពីបានប្រមូលផ្ដុំគ្នាភ្នាល់ជល់មាន់នៅក្បែរមាត់បឹងមួយកន្លែង ក្នុងភូមិព្នៅ ឃុំត្រពាំងគង ស្រុកសំរោងទង ខេត្តកំពង់ស្ពឺ កាលពីថ្ងៃទី ២០ ខែ វិច្ឆិកា ឆ្នាំ ២០២១។
លោក ឃុត សុផល អធិការនគរបាលស្រុកសំរោងទងបានប្រាប់ ភ្នំពេញ ប៉ុស្តិ៍ថា ក្រៅពីឃាត់ខ្លួនក្រុមអ្នកញៀនល្បែងប្រជល់មាន់បាន ៨ នាក់ សមត្ថកិច្ចបានដកហូតវត្ថុតាងមួយចំនួនរួមមានមាន់ជល់ចំនួន ៨ ក្បាលជញ្ជីងចំនួន ១ ខ្នាយដែកចំនួន ១ គូ កន្ត្រកសម្រាប់ដាក់មាន់ចំនួន ៩ ស្កុត សម្រាប់រុំជើងមាន់មួយចំនួន ស្បែកជើងចំនួន ១៤ គូ លុយរៀលប្រមាណ ៦,៥ លានរៀល លុយដុល្លារចំនួន ២៣០ ដុល្លារ លុយថៃចំនួន ១ ០០០ បាត។
លោកបានបញ្ជាក់ថា៖ «នៅព្រឹកថ្ងៃទី ២១ វិច្ឆិកា ឆ្នាំ ២០២១ នេះ សមត្ថកិច្ចយើងបានកសាងសំណុំរឿង និងបញ្ជូនពួកគេទាំង ៨ នាក់ទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមនីតិវិធីច្បាប់»៕
