ភ្នំពេញៈ នគរបាលក្រសួងមហាផ្ទៃ គ្រោងបញ្ជូនបុរសជនជាតិចិន៣នាក់ទៅសាលាដំបូងរាជធានីភ្នំពេញ នៅថ្ងៃទី ២២ វិច្ឆិកា ក្រោយចាប់ខ្លួនកាលពីថ្ងៃទី ១៨ វិច្ឆិកា ពាក់ព័ន្ធការបង្ខាំងជនជាតិថៃចំនួន ៩៩ នាក់ ដើម្បីជម្រិតទារប្រាក់ បន្ទាប់ពីត្រូវបានមេខ្យល់បោកពួកគេមកធ្វើការឱ្យក្រុមហ៊ុនលក់ផលិតផលតាមអនឡាញចិនមួយស្ថិតក្នុងខណ្ឌសែនសុខរាជធានីភ្នំពេញ។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២១ វិច្ឆិកាថា ជនជាតិចិនចំនួន ៣ នាក់ នឹងត្រូវសមត្ថកិច្ចកសាងសំណុំរឿង បញ្ជូនទៅសាលាដំបូងរាជធានីភ្នំពេញ នៅថ្ងៃទី ២២ វិច្ឆិកា។ ពួកគេត្រូវបានសមត្ថកិច្ចរកឃើញពាក់ព័ន្ធនឹងការប្រព្រឹត្តបទល្មើសក្នុងចំណោមជនជាតិចិនចំនួន ៧៧ នាក់។
លោកថ្លែងថា៖ «ចំពោះនីតិវិធី គឺបងប្អូនយើង (សមត្ថកិច្ចជំនាញ) អាចធ្វើចប់ល្ងាចនេះ (ថ្ងៃទី ២១ វិច្ឆិកា) ហើយអាចថ្ងៃស្អែកព្រឹកបញ្ជូនទៅតុលាការហើយ»។
លោកឧត្តមសេនីយ៍ឯកបញ្ជាក់ថា កាលពីថ្ងៃទី ១៨ វិច្ឆិកា ឆ្នាំ ២០២១ សមត្ថកិច្ចជំនាញក្រសួងមហាផ្ទៃបានធ្វើប្រតិបត្តិការបង្ក្រាបក្រុមជនជាតិចិនមួយក្រុមនៅក្នុងផ្ទះ១ក្នុងខណ្ឌសែន សុខ រាជធានីភ្នំពេញ។ ក្នុងប្រតិបត្តិការនោះ សមត្ថកិច្ចបានរំដោះជនជាតិថៃបានសរុប ៩៩ នាក់។ ក៏ប៉ុន្តែជនជាតិថៃទាំងនោះសុទ្ធតែចូលមកប្រទេសកម្ពុជា ដើម្បីបំពេញការងារដោយខុសច្បាប់។ ហេតុដូច្នេះហើយសមត្ថកិច្ចជំនាញបានចាប់បញ្ជូនតាមច្បាប់អន្តោប្រវេសន៍កម្ពុជា។
លោកបន្តថា ចំពោះជនជាតិចិនចំនួន ៧៧ នាក់ ក្នុងនោះមានចំនួន ៣ នាក់ ដែលពាក់ព័ន្ធនឹងការបង្ខាំងមនុស្ស។ ចំណែកជនជាតិចិនចំនួន ៧៤ នាក់ មិនពាក់ព័ន្ធនឹងបទល្មើស សមត្ថកិច្ចជំនាញបានអនុញ្ញាតឱ្យត្រឡប់ទៅបំពេញការងារជាធម្មតាវិញ។ ដោយឡែកក្រុមហ៊ុនដែលជនជាតិចិនធ្វើការនោះ គឺជាក្រុមហ៊ុនអាជីវកម្មផ្សព្វផ្សាយលក់ផលិតផលតាមអនឡាញ។
ពាក់ព័ន្ធករណីនេះ លោក ខៀវ កញ្ញារិទ្ធ រដ្ឋមន្រ្តីក្រសួងព័ត៌មានបានសរសេរនៅក្នុងបណ្តាញទំនាក់ទំនងសង្គមហ្វេសប៊ុករបស់លោកថា អ្នកនៅស្រុកខ្មែរមានមេខ្យល់បបួលទៅធ្វើការនៅថៃ។ ឯនៅថៃមានមេខ្យល់បបួលមកធ្វើការនៅខ្មែរ។
លោកបន្តថា៖ «នគរបាលខ្មែរបានរំដោះជនជាតិថៃ ចំនួន ៩៩ នាក់ ដែលគេយកមកធ្វើការនៅស្រុកខ្មែរ ដោយខុសច្បាប់ហើយឃុំឃាំងពួកគេនៅក្នុងអគារមួយកន្លែង»៕
វីដេអូ៖